Ciibalusyo 5
Milawo iili kkumi
1 Lino Mozesi wakaita Baisilayeli boonse akwaamba kuti, “Nobantu Baisilayeli amuswiilile milawo ambeta zyoonse nzendimupa sunu, mwiiye kabotu akwiiswiililisya. 2 Mwami Leza, Leza wesu, wakapanga cizuminano andiswe kucilundu ca Sinai. 3 Cizuminano eeci Mwami Leza taakapangana buyo kulindinywe amatata alikke pe, pele andiswe notucipona sunu. 4 Kuzwa mumulilo wakali kuvwilima acilundu, Mwami Leza wakakanana kamulimvwidide. 5 Mebo ndakaimvwi akati kanu a Mwami Leza nkeambilizya nzyaakali kukanana nkaambo nywebo mwakali kuyoowa mulilo aboobo tiimwakatanta mucilundu.
“Mwami Leza wakaamba kuti, 6 ‘Ndime Mwami Leza wako wakakugwisya munyika ya Ijipiti, mubuzike.’
7 “Utabi aabaleza bambi kunze lyangu.
8 “Utalicitili cibumbwa niciba cikozyanyo cacilenge cimwi camujulu naa caansi, niciba camumaanzi kunsi aanyika. 9 Utakotamini cikozyanyo nikuba kucikomba, nkaambo mebo ndime Mwami Leza wako, uutalekeleli bakomba baleza bambi. Ndasubula bana babaabo bandisulide mane kuyoosika kuzyalani lyatatu alyane. 10 Pele kuli baabo bali zyuulu-zyuulu bandiyanda akubamba milawo yangu, nditondezya luyando lwangu lutamani kulimbabo.
11 “Utabelesyi zina lya Mwami Leza wako munzila iitaluleme, nkaambo kufumbwa muntu uubelesya zina lyakwe munzila eeyi, Mwami Leza takooyoomweengelela.
12 “Koyeeya buzuba bwa Sabata, ubusalazye mbubonya mbuli Mwami Leza mbwaakalailila. 13 Kobeleka milimo yako yoonse mumazuba aali cisambomwe, 14 pele buzuba bwa Sabata mbuzuba bwakulyookezya bwakulemeka Mwami Leza wako. Muli boobo toelede kubeleka milimo pe, noba nduwe, nibaba bana bako, nibaba babelesi bako baalumi, nibaba babelesi bako bakaintu, niziba ŋombe zyako, naba mweenzu uuli aanduwe. Babelesi bako abalo baleelede kuti bajane kulyookezya mbubonya mbuli mbojana ayebo. 15 Uleelede kuyeeya kuti yebo wakali muzike mu Ijipiti, akuti ndime, nde Mwami Leza wako, ndakakuvuna anguzu zyangu mpati. Aboobo ncendikulailila nkuti ubambe buzuba bwa Sabata.
16 “Kolemeka uso abanyoko, mbubonya mebo nde Mwami Leza, Leza wako mbwendikulailila kutegwa zintu zyoonse zikakweendele kabotu alimwi kuti upone ciindi cilamfu munyika eeyo Mwami Leza njayookupa.
17 “Utajayi.
18 “Utaciti bumambe.
19 “Utabbi.
20 “Utabejelezyi mweenzinyoko kaambo.
21 “Utanyonokeli mukamwenzinyoko. Utanyonokeli ŋanda yakwe pe, nuuba muunda wakwe, naba mubelesi wakwe mwaalumi naa mubelesi wakwe mukaintu naa mbongolo yakwe, naba musune wakwe niciba cimwi cakwe.
22 “Mwami Leza wakapa milawo eeyi kubantu boonse nibakabungene kucilundu, wakiipa, taakwe aimbi njaakayungizya pe, aawo naakaambaula ajwi pati lyanguzu kuzwa mumulilo akkumbi lisiya mbii. Mpoonya wakailemba milawo eeyi azilembelo zyobilo zyamabwe akundipa.
Bantu mbubakayoowa
23 “Lino aawo cilundu coonse nicakali kuvwilima mulilo nimwakalimvwa ijwi eelyo lyakali kuzwa mumudima, basololi banu abapati bamisyobo yanu bakaza kulindime. 24 Bakati, ‘Mwami Leza wesu sunu watutondezya bupati abulemu bwakwe mbobubede nitwamvwa kaambaula kuzwa mumulilo. Sunu twaziba kuti ani cilakonzyeka kuti muntu kacipona nikuba kuti Leza waambaula awe. 25 Ino ono tufwida nzi? Uulya mulilo uuyoosya inga ulaba nuutunyonyoona. Tulafwa kuti naa twamvwa Mwami Leza, Leza wesu kacaamba kulindiswe alimwi. 26 Sena kuli muntu wakapona naakamana kumvwa Leza muumi kuzwa mumulilo? 27 Koya yebo Mozesi, ukamvwe zyoonse Mwami Leza wesu nzyaamba, wamana uzootwaambile. Tuzooswiilila swebo, akuzibamba.’
28 “Amvwe boobo Mwami Leza wakati kulindimwe, ‘Ndacimvwa ncobaamba bantu aaba, baamba kabotu. 29 Nicali cibotu kuti lyoonse nibali kulimvwa boobu, kabandiyoowa akuswiilila milawo yangu yoonse eelyo zintu zyoonse nizyali kubeendela kabotu balo alimwi abalunyungu lwabo mane kukabe kutamani. 30 Ukabaambile kuti babweede kuzivuka zyabo. 31 Pele yebo Mozesi, kokkala andime muno kuti ndikupe milawo, amalailile aangu azyoonse nzyooyoobaiisya. Ubaiisye kuti bakiibambe munyika eeyo njeyoobapa.’
32 “Mube amasimpe kuti mukazicite zintu zyoonse nzyaamulailila Mwami Leza, Leza wanu. Mutazwi munzila eeyi pe. 33 Amweende munzila eeyo Mwami Leza, Leza wanu njaamulailila kuti zintu zikamweendele kabotu. Ndendilyo nimuyooongola munyika eeyo njimuyoopegwa.”