Ciibalusyo 4

Mozesi mbwaakakombelezya Baisilayeli kuti kabaswiilila.

¹ Lino Mozesi wakaambila bantu kuti, “Amuswiilile malailile amilawo yoonse njeyanda kumwiisya. Ndendilyo nimuyoopona akukonzya kukkala munyika njaamupa Mwami Leza, Leza wabasikale banu. ² Kuli zeezi nzentimulailile mutayungizyi nikuba kugwisya cimwi pe. Amuswiilile milawo ya Mwami Leza wanu njetimupe. ³ Nywebo nobeni mwakalibonena Mwami Leza ncaakacita ku Peyo. Mwami Leza wakanyonyoona bantu boonse bakali kukomba waku Peyo. ⁴ Aabo bakasyoma Mwami Leza mpobacili asunu akati kanu.

⁵ “Amubone mebo ndakamwiisya malailile amilawo yoonse, mbubonya mbuli Mwami Leza wangu mbwaakandilailila. Amukiibambe munyika eeyo njemuyootola. ⁶ Amukaswiilile akwiitobela cakusyomeka. Eeci ciyootondezya kuli bamasi kuti muli basongo, bateelelesya. Baakumvwa zyamilawo yoonse eeyi, bayooti, ‘Ncobeni musyobo mupati ooyu ngwabusongo aluzibo.’

⁷ “Taakwe musyobo uumbi nuuba ulaa leza uukkala munsi lyabo mbuli bucita Mwami Leza wesu. Kufumbwa twamulilila ulatumvwa. ⁸ Taakwe musyobo uumbi nuuba buti uujisi malailile amilawo iiluzi mbuli eeyi njetimwiisye sunu.

⁹ “Amucenjele alimwi mutalubi mubuumi bwanu boonse nzimwakalibonena. Pele amukaziiisye kubana banu akubazyukulu banu. ¹⁰ Mukabazibye zyabuzuba nimwakaimvwi kumbele lya Mwami Leza wanu kucilundu ca Sinai. Ooko Mwami Leza nkwaakati, ‘Kobunganya bantu. Ndiyanda kuti balimvwide mbwetaambe, kutegwa baiye kundiyoowa akuti bakaiisye bana babo kundiswiilila mbubonya.’

¹¹ “Tee mwakaza akuzooima munsi aacilundu cakavumbidwe amakumbi aasiya mbi kakuvwilima mulilo mane kujulu. ¹² Mwami Leza wakaambaula kulindinywe kuzwa mumulilo mwakamumvwa kaambaula, pele ciwa cakwe tiimwakacibona pe. ¹³ Wakamwaambila ncomweelede kucita kuti mubambe cizuminano ncaakapangana andinywe nkokuti kubamba milawo yakwe iili kkumi, eeyo njaakalemba azilembelo zyobilo zyamabwe. ¹⁴ Mwami Leza wakandaambila kuti ndimwiisye malailile amilawo yoonse njomweelede kubamba mwanooli munyika eeyo njomuyoosaala mutala lya Jolodani.

Mbwaakabacenjezya kuti batakombi mituni

¹⁵ “Mulayeeya ciindi ciya Mwami Leza naakaambaula kulindinywe kuzwida mumulilo kucilundu ca Sinai, taakwe ncimwakabona niciba buti. Nkaako amucenjele ncobeni kuti ¹⁶ mutabisyi mukulibumbila mutuni nuuba buti uuli mbuli mwaalumi naa mukaintu, ¹⁷ munyama naa muyuni, ¹⁸ cikalaba naa nswi. ¹⁹ Mutakabi nimuyookomba naa kubelekela cimwi cazintu zyakujulu mbuli, zuba, mwezi, naa nyenyezi. Eezi zintu Mwami Leza wanu nzyaakalekela bamasi boonse. ²⁰ Pele nywebo lwanu muli bantu ba Leza mbaakagwisya mu Ijipiti, iilya nyika yamapenzi. Wakamuleta kuzwa munyika eeyo kuti muzoobe bakwe bamugeme, mbombuboobu mbomubede asunu.

²¹ “Pele Mwami Leza wesu wakandinyemena kuti nsikooyoozubuka mulonga wa Jolodani akunjila munyika eeyo mbotu njayoomupa nywebo. ²² Mebo ndilafwida omuno motubede. Nsikooyoozubuka mulonga wa Jolodani pe, pele nywebo mulazubuka akuyookkala munyika eeyo mbotu. ²³ Nkaako amucenjele kuti mutalubi cizuminano eeco ncaakapangana andinywe Mwami Leza, Leza wanu. Mutapangi mutuni nuuba buti, ²⁴ nkaambo Mwami Leza wanu mmulilo uusyukutya, ngu Leza utalekeleli bakomba baleza bambi.

²⁵ “Nikuba kuti mwaakukkala kwaciindi cilamfu munyika eeyo, akuba aabazyukulu, mutakaciti cinyonyoono kwiindila mukupanga mituni niiba buti. ²⁶ Kuti mukacite oobo, julu anyika zibe bakamboni bangu sunu kuti muyooloba do! Tamukooyookkalisya munyika iili mutala lya Jolodani njemuyootola. Muyoomana cilongo muzyolelwa. ²⁷ Mwami Leza uyoomumwaya akati kabamasi. Kuyoosyaala buyo bace kuzwa kulindinywe aawo Mwami Leza aakumutanda. ²⁸ Muyookomba mituni yazisamu amabwe, iitakonzyi kubona nikuba kumvwa, nikuba kulya, naa kunumfuzya. ²⁹ Ooko muyoolangaula Mwami Leza, Leza wanu, kuti naa mwaakumulangaula amoyo amuuya wanu woonse, muyoomujana. ³⁰ Mwaakujana mapenzi akuti naa zintu eezi zikamucitikile, mukapilukile ku Mwami Leza, Leza wanu uyoomuswiilila. ³¹ Nkaambo walo Mwami Leza, Leza wanu ngusiluse. Takooyoomukaka, naa kumunyonyoona alimwi takalubi cizuminano ncaakacita walo mwini abasikale banu.

³² “Amuvuntauzye zyakaindi zyaciindi kamutanazyalwa, kuzwida ciindi aawo Leza naakalenga muntu anyika aano. Amuvuntauzye zyanyika yoonse mboibede. Sena kuli wakamvwide kale cintu cili boobu? ³³ Sena kuli musyobo umwi wakamvwa kale Leza kakanana kuzwa mumulilo bamana bapona, mbuli mbumwakamumvwa nywebo Leza wanu? ³⁴ Lili Leza naakasolede kugwisya musyobo uumbi mubulelo bwaumwi, mbuli mbwaakacita Mwami Leza, Leza wanu kulindinywe mu Ijipiti kamulibwenene naakabelesya nguzu zyakwe? Wakaletela Baijipiti cuumo ankondo, wakacita maleele, azimwi zintu ziyoosya zigambya. ³⁵ Mwami Leza wakamutondezya zintu eezi kuti mumuzibe kuti walo alikke ngo Leza, taakwe uumbi kunze lyakwe pe. ³⁶ Wakacita kuti mumvwe ijwi lyakwe kuzwa kujulu kutegwa akonzye kumwiisya. Anyika ano wakacita kuti mubone mulilo wakwe uuyoosya, nkabela wakamukananina kuzwida mulinguwo. ³⁷ Nkaambo kakuti wakali kuyanda basikale banu, wakasala ndinywe nobalunyungu lwabo, alimwi kwiindila munguzu zyakwe zipati walo lwakwe mwini wakamuleta kuzwa mu Ijipiti. ³⁸ Nkaako muzibe alimwi mutalubi kuti Mwami Leza ngo Leza wajulu anyika. ³⁹ Taakwe uumbi kunze lyakwe pe. ⁴⁰ Nkaako amuswiilile akubamba milawo yakwe eeyi njindamupa sunu. Ndendilyo zintu zyoonse niziyoomululamina nywebo abana banu. Lino muyookkalilila munyika eeyo njamupa Mwami Leza, Leza wanu, iyooba nyika yanu akutamani.”

Minzi yakutijila iili kujwe aamulonga wa Jolodani

⁴¹ Lino Mozesi wakasala minzi imwi yotatwe kulubazu lwakujwe aamulonga wa Jolodani, ⁴² ooko nkokwakali kutijila sikujaya muntunyina kutegwa akafutuke naa kuti kali wakamujaya cakutaziba. ⁴³ Musyobo wa Lubeni wakapedwe munzi wa Bezee uuli munkanda mutulundu-lundu. Musyobo wa Gadi wakapedwe munzi wa Lamoti mucisi ca Giliyadi. Nkabela musyobo wa Manase wakapedwe munzi wa Golani mucisi ca Basyani.

Mozesi mbwaakabaindulwida Mulawo wa Leza

⁴⁴ Lino Mozesi wakapa milawo ya Leza ku Baisilayeli. ⁴⁵ Wakabapa milawo eeyi amalailile aakwe anjiisyo zimwi, kabazwide kale mu Ijipiti, ⁴⁶ kabali kujwe lya Jolodani mucibanda, kulangana amunzi waku Betipeyo. Oomu mwakali mucisi camwami Sihoni wa Baamoli, ooyo wakali kukkala mu Hesyiboni, walo wakazundwa a Mozesi a Baisilayeli kabazwide mu Ijipiti. ⁴⁷ Bakasaala nyika yakwe akukkala mulinjiyo, alimwi bakasaala anyika yamwami Ogi waku Basyani. Aaba bakali mbabami bobilo ba Baamoli bakali kukkala kujwe lya Jolodani. ⁴⁸ Nyika eeyo njobakatola yakali kuzwida kumunzi wa Alowe kumbali aamulonga wa Anoni mane kuyoosika kumulundu wa Siliyoni, uuli ngo Hemoni, ⁴⁹ kubikkilizya acisi cili kujwe lya Jolodani kuyoosika kulwizi lwa Munyo kunselelo lyacilundu ca Pisiga.