Ciibalusyo 34

Lufu lwa Mozesi

¹ Lino Mozesi wakatanta acilungu ca Nebo kuzwa mumabanda aa Mowabu waakusika amutwe wacilundu ca Pisiga kulangana amunzi wa Jeliko. Ooko Mwami Leza wakamutondezya nyika yoonse mboibede. Kutalikila ku Giliyadi kusikila ku Dani, ² cisi coonse ca Nafutali, Efulemu a Manase, cisi ca Juda coonse mane kuyoosika kulwizi lwakumbo, ³ kuzwa kucisi cakumusanza acisi coonse kuzwida kukkuti lya Jeliko, munzi watukunka, mane kuyoosika ku Zowa. ⁴ Mpoonya Mwami Leza wakaambila Mozesi kuti, “Eeyi njenyika njindakakonkezya kuli Abulahamu, Izaka a Jakobo nindakati, Ndiyooipa lunyungu lwanu. Ndakutondezya buyo kuti wiibone, pele tokoonjila mulinjiyo pe.”

⁵ Mbombuboobu Mozesi mubelesi wa Mwami Leza mbwaakafwa ooko munyika ya Mowabu, mbubonya mbuli Mwami Leza mbwaakaamba. ⁶ Nkabela Mwami Leza lwakwe wakamuzikka munyika ya Mowabu, mukkuti kulangana a Betipeyo. Pele kusikila sunu taakwe muntu naba omwe uuzi cuumbwe ca Mozesi mpocibede. ⁷ Mozesi naakafwa, wakali aamyaka iili mwaanda amakumi obilo. Nikuba boobo meso aakwe taakoomfokede, alimwi wakacili muyumu. ⁸ Baisilayeli bakamulila kwamazuba aali makumi otatwe mumabanda aa Mowabu.

⁹ Lino Josyuwa mwanaa Nuni wakazula busongo nkaambo Mozesi katanafwa wakamubikka maanza. Nkaako Baisilayeli bakamuswiilila akucita zyoonse eezyo Mwami Leza nzyaakalailila Mozesi.

¹⁰ Kuzwa ciindi eeco, takunabede musinsimi mu Isilayeli uuli mbuli Mozesi, wakakanana a Mwami Leza. ¹¹ Taakwe musinsimi naba omwe wakacita zitondezyo azigambya zili mbuli Mwami Leza nzyaakamutuma kuti akacite mu Ijipiti kuli Falo, akuli balupati-pati bakwe, akunyika yakwe yoonse mboibede. ¹² Taakwe naba omwe wakacita zitondezyo zyanguzu niziba zimwi zigambya zili mbuli zyakacita Mozesi Baisilayeli kabalibwenene.