Ciibalusyo 32
1 “Swiilila ojulu ndaambe, Teelela onyika ndilungulule.
2 Kwiisya kwangu kube mbuli mvula majwi aangu abe mbuli mume ansi,
mbuli lunywaanywa amweemvwe, mbuli yamoombelela atusyango.
3 Njootembaula zina lya Mwami Leza.
Amutembaule bupati bwa Leza wesu!
4 Mwaala, milimo yakwe mibotu nzila zyakwe zililuzi.
Ngu Leza uusyomeka uutabisyi, uululeme, uuluzi.
5 Mwakamubisizya, nkaako tamuceelede kwiitwa kuti muli bana bakwe,
muli zyalani lyacinguni linyongene.
6 Sena mbomumulumba Mwami Leza oobu,
nywebo nobantu bafuba-fuba batakwe maanu?
Sena tali ngouso wakamulenga akumucita kuti mube musyobo mupati?
7 Amwiibaluke mazuba aacilundu,
amuyeeye myaka yamazyalani aakamana.
Amubuzye bamauso balamwaambila zyakacitika,
amubuzye bamadaala, balamulungulwida.
8 Sijulu lyamajulu naakapa misyobo yoonse lukono lwayo,
naakaandaanya bantu boonse,
wababikkila munyinza mbubonya mbuli wabana ba Isilayeli.
9 Nkaambo lukono lwa Mwami Leza mbantu bakwe,
lunyungu lwa Jakobo ncaabilo cakwe.
10 Wakabajana munkanda mucimpayuma, lukula luyoosya.
Wakabafukata akubalela wakababamba mbuli mboni yaliso.
11 Mbuli sikwaze mbwaiisya bana bakwe mbwabayumuna amababa aakwe, kuti batawi.
12 Mbombuboobu Mwami Leza alikke mbwaakabasolweda.
Taakwe Leza uumbi wakabagwasya pe.
13 Nguwakacita kuti balele nyika yazilundu yoonse,
wabapa zilyo zyamusokwe.
Kuzwa mumpangala wakapa buci,
misamu yaoliva yakakomena mulubwe-lubwe.
14 Kuzwa muŋombe zyabo wakabapa mabisi,
kubutanga bwabo wakabapa mukupa.
Bakalijisi mbelele, mpongo,
aŋombe mbotu zili mbuli zyaku Basyani,
bakalijisi maila mabotu awaini wiindilila kubota.
15 Pele Bajesyuluni bantu ba Mwami Leza nibakavuba,
bakamuzangila. Nkubakali kukkuta, bakasiya Leza wakabalenga,
bakaka mwaala walufutuko lwabo.
16 Mwami Leza wakabanyemena akaambo kakukomba baleza bambi,
wakabakalalila akaambo kamituni yabo.
17 Bakapaizya kumyuuya mibi,
iitali baleza, baleza bakazizilwe,
baleza babuyo aaba basikale banu mbibatakali kulemeka.
18 Mwakasiya Leza uuli mbuli mwaala.
Nguwakamuzyala akumulela.
19 Mwami Leza naakabona ceeci wakabakaka,
nkaambo bana bakwe balombe abasimbi bakamunyemya.
20 Wakati, ‘Ndilabafutatila, tubone naa bayoogolela yi,
nkaambo mbazyalani lyacinguni, mbana batasyomeki.
21 Bandinyemya mukukomba aabo batali baleza,
bakandikalazya amituni yabo.
Ambebo njoobanyonosya mukubamba musyobo uutayi kwamoonga,
njoobanyemya abantu batakwe luzibo.
22 Bukali bwangu buyoovutuka mbuli mulilo
buyootenta mane kusikila kucikkalilo cabafu.
Buyootenta nyika amicelo yayo akuumpa ntalisyo zyazilundu.
23 Njoolundika mapenzi ali mbabo,
njoobanyonyoona amivwi yangu.
24 Bayoonyonyoonwa anzala.
Njootuma mapenzi acuumo,
njootuma banyama babutambo bayoobajaya,
anzoka nkali ziyoobaluma.
25 Bana babo bayoonyonyoonwa munkondo.
Bayookkala kabayoowede mumaanda aabo.
Bakubusi abasimbi bayooloba,
bavwanda abamadaala abalo mbubonya.
26 Ndakakanzide kuti nkabanyonyoone,
batakayeeyegwi limbi.
27 Pele tiindakayanda kuti basinkondonyina bakalisumpule
akwaamba kuti bakazunda bantu bangu,
kakuli ndime ndemwini ndakabanyonyoona.’
28 Baisilayeli mmusyobo uutakwe maanu,
tabajisi busongo pe.
29 Nibali aamaanu nibaziba ncibakazundilwa,
nibakaziba cakacitika kulimbabo!
30 Ino muntu omwe inga wabatandaanya buti bali cuulu?
Naa bobilo bakabatandaanya buti bantu bali zyuulu zili kkumi?
Mukuti mwaala wabo wakabaaba,
mukuti Mwami Leza wabalekelezya.
31 Nikuba boobo basinkondoma balazumina
kuti mwala wabo tuuli mbuli wesu.
32 Basinkondonyina mbabi mbuli baku Sodomu a Gomola,
bali mbuli nsaansa zilaancefu zilula.
33 Waini wazyo mbuyoka, mbubi mbuli nkombola.
34 Mwami Leza ulayeeya basinkondonyina ncibakacita,
uyanda buyo ciindi ceelede cakubasubula.
35 Ndime eebweedezya bubi,
njoobasubula, muciindi ceelede,
bayoowa mubuzuba bwamapenzi oobo bulaafwiifwi,
lino-lino balanyonyoonwa.
36 Mwami Leza uyoovuna bantu bakwe,
akubabeda aankumbu babelesi bakwe,
aakubona kuti nguzu zyabo zyamana,
alimwi taakwe naba omwe wasyaala.
37 Mwami Leza uyoobuzya kuti,
‘Bali kuli baleza banu, aabo mbumwakasyoma?’
38 Baleza aabo bakalya mafuta aazipaizyo zyanu,
akunywa waini wazituuzyo zyanu.
Ababoole bamugwasye! Abamukwabilile!
39 Amubone lino mebo ndime Uuliwo lyoonse.
Taakwe baleza bambi kunze lyangu.
Mebo ndajaya, kwamana ndapa abuumi.
Mpundayasa ndaponya.
Taakwe uukonzya kukasya ncindayanda.
40 Ndakonkezya kuti mbuuli mbwendi muumi lyoonse,
41 ndikukwenga panga lyangu libeka-beka akubeteka basinkondoma.
Njobabweedezya bubi bwabo akubacita bweelede.
42 Mivwi yangu iyooloka-loka bulowa,
panga lyangu liyoobacisa.
Taakwe uyoopusuka, muzike naba musololi.
43 Nywebo nobamasi amutembaule bantu ba Mwami Leza,
nkaambo uyoosubula bajaya babelesi bakwe.
Uyoobweedezya bubi kuli basinkondonyina,
akweengelela bantu bakwe.”
44 Lino Mozesi wakaboola a Josyuwa mwanaa Nuni
akwaamba majwi alwiimbo oolu bantu boonse kabamvwide.
Mozesi mbwaakalailila lwamamanino
45 Lino Mozesi naakamana kwaambila Baisilayeli majwi oonse aaya, 46 wakabaambila kuti, “Majwi aaya oonse ngindamwaambila sunu akkalilile mulindinywe, kuti anywebo mukakonzye kulailila bana banu kuti bakaswiilile mulawo ooyu cabunkutwe. 47 Aaya taali majwi aabuyo, mbobuumi bwanu. Muyooongola munyika eeyo njomuyootola mwazubuka mulonga wa Jolodani akaambo kakutobela majwi aaya.”
48 Lino mubuzuba oobo mbubonya, Mwami Leza wakaambila Mozesi kuti, 49 “Koya muzilundu zya Abalimu, munyika ya Mowabu kulangana amunzi wa Jeliko, ukatante acilundu ca Nebo ukalange nyika ya Kenani eeyo njendiyoopa Baisilayeli. 50 Kwamana uyoofwa acilundu eeco mbubonya mbuli mupati wako Aloni mbwaakafwida acilundu ca Hoo, 51 nkaambo nywebo nyoonse nyobilo tiimwakasyomeka kulindime kumbele lya Baisilayeli boonse. Nimwakasika kumaanzi aaku Meliba kufwiifwi aku Kadesyi munkanda ya Zini, tiimwakandilemeka kumbele lya Baisilayeli pe. 52 Nkaako uliilanga buyo nyika kulaale, pele tokooyoosika kunyika eeyo njendimupa Baisilayeli.”