Ciibalusyo 3
Mbwaakazunda Ogi mwami wa Basyani
1 “Lino kuzwa waawo twakanyona, twatozya mugwagwa uuya ku Basyani. Nitwakasika ooko, Ogi mwami wa Basyani, wakasika kuzootulwana ku Edileyi abasilumamba bakwe boonse. 2 Pele Mwami Leza wakati kulindime, ‘Mutabayoowi pe, ndilamupa nguzu zyakubazunda, mutole nyika yabo yoonse. Mubacite mbuli mbumwakacita Sihoni, mwami wa Baamoli bakkala ku Hesyiboni.’
3 “Mbombuboobu Mwami Leza mbwaakaaba mwami Ogi waku Basyani abantu bakwe boonse kulindiswe, eelyo twakabajaya cakubamaninizya boonse mbobabede. 4 Ciindi eeco twakaitola minzi yabo yoonse, taakwe nuuba omwe ngutwakasiya. Antoomwe kwakali minzi iili makumi aali cisambomwe, nkokuti cisi coonse ca Aagobu, cakali kulela Ogi mwami waku Basyani. 5 Yoonse eeyi yakali minzi yakakwabilidwe ankwakwa zilamfu zijisi zitendele zipingwa azibulo. Alimwi kwakali aimbi minzi minji yatakakwabilidwe njotwakamwaya. 6 Twakanyonyoona minzi eeyi yoonse, akubajaya baalumi, bakaintu abana boonse bakali mulinjiyo, mbubonya mbuli mbutwakacita kuli Sihoni mwami waku Hesyiboni. 7 Pele ŋombe nzitwakasaala muminzi eeyo twakazitola antoomwe alubono loonse.
8 “Mbombuboobu mbutwakazitola nyika zyoonse zyakali zyabami aaba bobilo ba Baamoni, bakali kukkala mutala lyamulonga wa Jolodani, kuzwida kumulonga wa Anoni akuyoosika kucilundu ca Hemoni. 9 Cilundu eeci Basidoni baciita kuti Siliyoni, pele Baamoni baciita kuti Seniya. 10 Twakacitola coonse cisi camwami Ogi waku Basyani, nkokuti minzi yoonse yatulundu-lundu, kubikkilizya anyika ya Giliyadi a Basyani, mane kujwe kuyoosika kuminzi ya Saleka a Edileyi.”
( 11 “Lino mwami Ogi nguwakasyeede ku Balefa. Bulo bwakwe bwakali bwalubulo, bulamfu bwabo bwakali tukokola tuli kkumi atutatu bwamba bwakali bwatukokola tuli cisambomwe. Asunu nkobucili mumunzi wa Labba wa Baamoni.)
Misyobo yakakkala mucisi cakujwe lya Jolodani
12 “Lino nitwakatola nyika, nkokuti nyika yoonse kuzwida kumunzi wa Alowe uuli kumbali aamulonga wa Anoni kubikkilizya acipaanzi canyika yatulundu-lundu ya Giliyadi antoomwe aminzi yayo ndakiipa kumisyobo ya Lubeni a Gadi. 13 Nkabela imwi yakasyaala kunyika eeyo antoomwe (anyika yoonse ya Basyani njaakali kulela mwami Ogi, nkokuti nyika ya Aagobu, ndakiipa kucisela camusyobo wa Manase.”
Cisi coonse ca Basyani cakali kwiitwa kuti cisi ca Balefa. 14 Jaii walunyungu lwa Manase wakatola cisi ca Aagobu, cili ngo Basyani, mane akuyoosika kumunyinza wa Gesyuu a Maaka. Minzi yamucisi eeci Jaii wakayuulika azina lyakwe, ncenciceeco asunu icitegwa Jaii.)
15 Cisi ca Giliyadi ndakacipa kuciinga ca Makii wamusyobo wa Manase. 16 Yalo misyobo ya Lubeni a Gadi ndakiipa cisi ca Giliyadi mane kuyoosika kumulonga wa Anoni. Cisela camulonga ooyo ncicakali munyinza wakumusanza. Kulubazu lwakunyika munyinza wakali mulonga wa Jabboki, ngowakali ngomunyinza wa Baamoni. 17 Kulubazu lwakumbo cisi cabo cakali kusika kumulonga wa Jolodani. Cakali kutalikila kulwizi lwa Galilii kulubazu lwakunyika mane kuyoosika kulwizi lwamunyo kulubazu lwakumusanza, munsi-munsi acilundu ca Pisiga kulubazu lwakujwe.
18 “Lino kumane ciindi eeco ndakabapa malailile aaya ndakati, ‘Mwami Leza wanu wamupa nyika eeyi yakujwe lya Jolodani kuti ibe yanu.’ Nikuba boobo baalumi boonse bakonzya kuya kunkondo basolwede Baisilayelinyina kuyoolwana mutala lyamulonga wa Jolodani kuti bakagwasye kuyootola nyika yabo abalo. 19 Pele bakaintu, bana banu, aŋombe zyanu zilasyaala muminzi eeyi njindamupa. Ndilizi kuti mulijisi ŋombe zinji. 20 Amukabagwasye Baisilayelinyoko mane kusikila abalo batole nyika eeyo njabapa Mwami Leza wanu, iili kumbo aamulonga wa Jolodani akuyoobakkazika oomo muluumuno, mbubonya mbwaakamucitila anywebo. Kwaakumana umwi aumwi wanu natikaboole kunyika njindakamupa.
21 “Nindakamana ndakaambila Josyuwa kuti, ‘Wakalibonena zintu zyoonse nzyaakacita Mwami Leza wanu kubami bobilo baya, mbubonya oobo mbwaayoocita akuli bamwi boonse bali aamanyika ngomuyoosaala. 22 Mutabayoowi pe, nkaambo Mwami Leza wanu nguutikamulwanine.’
Mozesi mbwaakakasigwa kunjila munyika ya Kenani
23 “Kumane ciindi eeco ndakakombelezya ndakati, 24 ‘O Mwami Leza, ndilizi kuti wanditondezya matalikilo buyo aazintu zipati zigambya nzyoyoocita. Taakwe leza uumbi mujulu naaba ansi uukonzya kucita zintu zipati nzyocita yebo! 25 Akaka O Mwami wangu, ndizumizya kuti ndizubuke mulonga wa Jolodani, kuti ndikaibone nyika mbotu loko yatulundu-lundu. Akaka nkabone azilundu zyaku Lebanoni.’”
26 Lino akaambo kanu, nywebo nobantu, Mwami Leza wakandinyemena, taakandimvwa pe. Wakandaambila kuti, “Mbubo, utacaambi limbi! 27 Pele koya ukatante ansonje yacilundu ca Pisiga, ukalange nyika koonse-koonse. Ukiilangisye, nkaambo yebo tokooyoozubuka pe. 28 Josyuwa mulailisye akumuyumya-yumya, nkaambo nguuyoosolweda bantu kuyootola nyika eeyo njoobona.”
29 Mbombuboobu mbutwakakkala mukkuti lilangene amunzi wa Betipeyo.