Ciibalusyo 28
Zileleko zyakuswiilila
1 Lino kuti naa mwaswiilila Mwami Leza wanu akutobela milawo yakwe eeyi njendimupa sunu, uyoomusumpula kwiinda misyobo yoonse yaansi. 2 Kuti mwaswiilila Mwami Leza wanu zileleko eezi zyoonse ziyooba zyanu.
3 Mwami Leza uyooleleka minzi anyika yanu.
4 Mwami Leza uyoomuleleka kwiindila mukumupa bana banji, zilyo zinji, aŋombe ambelele zinji. 5 Mwami Leza uyoomuleleka abutebuzi bunji anzyomuyoojika
6 Mwami Leza uyooleleka nzyomuyoocita.
7 Basinkondonyoko baakubusya nkondo, Mwami Leza uyoocita kuti bazundwe. Baakuboola kuzoomulwana bayooletezya bbazu lyomwe, pele baakutija bayoomwaikizyanya.
8 Mwami Leza wanu uyooleleka milimo yanu yoonse akuzuzya matala amaila. 9 Uyoocita kuti mube bantu bakwe basalala bamugaminine, mbubonya mbuli mbwaakamusyomezya naakakonkezya naa mwabamba milawo yakwe akweenda munzila zyakwe. 10 Eelyo bantu boonse baansi ano bayoobona kuti muli bakwe-bakwe, nkaako bayoomuyoowa. 11 Mwami Leza uyoomupa bana banji, zivubwa zinji, azilyo zinji munyika eeyo njaakakonkezya kuli basikale banu kuti uyoomupa. 12 Mwami Leza uyootumina mvula kuzwa kuciyobwedo cakwe kujulu muciindi ceelede, akumuleleka mumilimo yanu yoonse. Nkaako muyookonzya kukweletesya misyobo minji, pele nywebo lwanu taakwe nkomuyookweleta. 13 Mwami Leza wanu uyoomucita kuti mukabe basololi, kutali baccilili pe. Kuti mwaswiilila akutobela milawo ya Mwami Leza njendimupa sunu, lyoonse munooli bantu basumpukide tamunoosyeede. 14 Mutakaleyi kuzwa kumilawo eeyi njendimupa sunu, mukutobela baleza bambi akubabelekela.
Lusinganyo lwakutaswiilila
15 Pele naa tamuswiilili Mwami Leza wanu akubamba milawo amalailile aakwe oonse ngendimupa sunu, zintu zibi zyoonse eezi ziyoocitika kulindinywe.
16 Mwami Leza uyoosinganya minzi anyika yanu.
17 Mwami Leza uyoosinganya butebuzi bwanu anzyomuyoojika.
18 Mwami Leza uyoomusinganya kwiindila mukumupa bana bace, maila mace, ŋombe ambelele zice.
19 Mwami Leza uyoosinganya zyoonse nzyomuyoocita.
20 Mwami Leza uyootuma cuumo, lupyopyongano amapenzi bulanga, alimwi zyoonse nzyomuyoocita tazikalulami, mane kusikila nyoonse mukanyonyooke akumana do akaambo kakusiya Leza. 21 Mwami Leza uyoomujazya amalwazi mane kusikila nyoonse mukamane kufwa munyika eeyo njomuyanda kuyootola. 22 Mwami Leza uyoomuumya malwazi aayambukila, akupya mubili azimwi zili boobo. Uyootuma cilanga aluuwo lupya lunyonyoona zilyo zyanu. Eezi tazikamuleki mane kusikila mukamane kufwa. 23 Taakwe mvula iiyoowa, nkaako nyika yanu iyooyuma ntaa mbuli lubulo. 24 Mucilawo camvula kuyooba lusuko amusenga mane kusikila mukanyonyooke.
25 Mwami Leza uyoocita kuti mukazundwe abasinkondonyoko. Mwakuunka kuyoobalwana, muyoozwida kulubazu lomwe, pele mwaakutija muyoomwaikizyanya. Nkabela zisi zyoonse zyaansi ziyoogambwa akaambo kandinywe. 26 Mitumba yanu iyooba zilyo zyabayuni abanyama bamusokwe. Taakwe muntu naba omwe unoobayamina. 27 Mwami Leza uyoomupenzya azyuute mbubonya mbuli mbwaakacita ku Baijipiti. Mibili yanu iyooba aazilonda. Muyooba aabweele, bunoomubaba, pele taakwe nomuyoopona pe. 28 Mwami Leza uyoocita kuti mukasondoke, mukoofwaale, akucinkuka. 29 Acilungu-lungu muli kunga nkwaampaampa mbubucita moofu mumudima. Taakwe nimuyoozwidilila muli zyoonse nzyomuyoocita. Lyoonse munoodyamininwa akubbidwa, taakwe uyoomuvuna pe.
30 Muyooba mbuli muntu uukkalide musimbi, kwamana kwamukwata uumbi. Muyooyaka ŋanda, kwamana tamukiikkali. Muyoolima muunda wansaansa, kwamana tamukazilyi pe. 31 Ŋombe zyanu ziyoojaigwa kamulangilila, pele taakwe nyama njomuyoolya. Mbongolo zyanu ziyootolwa kamulangilila, alimwi tazikaboozegwi limbi pe. Ambelele zyanu ziyootolwa abasinkondonyoko, pele taakwe muntu naba omwe uyoozivuna pe. 32 Bana balombe abasimbi bayootolwa amusyobo uumbi. Meso aanu ayoosalala pyu kulangila bana banu buzuba abuzuba, pele taakwe cintu ncomuyookonzya kucita. 33 Bantu mbomutazi mbabayoolya micelo anzyomuyoolima munyika yanu. Mumazuba aanu oonse muyoodyamininwa akupenzegwa kapati. 34 Eeci ciyoocitya kuti mukasondoke akaambo kazintu nzyimuyoobona. 35 Mwami Leza uyoocita kuti maulu aanu akabe azilonda zitasilikiki. Ziyoomucisya mubili woonse kuzwa kuzituta kuyoosika alubwebwe.
36 Mwami Leza uyoomutola kunyika iimbi, nywebo amwami ooyo ngomuyoosala, yalo nibaba basikale banu njibatakazi. Ooko muyookomba baleza bambi, baleza bazisamu abamabwe. 37 Muyooba cisesyo akasimi kakumuwelezya akati kamisyobo yoonse ooko Mwami Leza nkwayoomutandila.
38 Muyoosyanga mbuto zinji, pele muyootebula kuce, nkaambo cikwikwi ciyoolya zisyango zyanu. 39 Muyoolima myuunda yansaansa nikuba boobo tamukooyoonywa waini, nkaambo basyaanyungwa bayoozilya. 40 Munyika yanu yoonse kunooli misamu yamaoliva, pele taakwe nomuyooenga mafuta aakubelesya, nkaambo maoliva ayoombulumukila ansi. 41 Muyoozyala bana balombe abasimbi pele bayoomusiya, nkaambo bayoobatola mubuzike. 42 Misamu azisyango zyanu zyoonse ziyooligwa cikwikwi.
43 Bazwamasi mbomukkala limwi banooya busumpuka kwiinda ndinywe, pele nywebo muyoowidilila. 44 Bayoomukweletesya, pele nywebo taakwe ncomuyoobakweletesya pe. Kumamanino bayooba basololi banu.
45 Mapenzi aaya oonse ayoomuboolela. Ayoomuboolela mane kusikila mukanyonyooke nkaambo tiimwakaswiilila Mwami Leza wanu akubamba milawo amalailile aakwe ngaakamupa. 46 Mapenzi aaya ayooba citondezyo acigambyo kulindinywe alunyungu lwanu mane kukabe kutamani. 47 Mwami Leza wakamuleleka muli zyoonse pele tiimwakamubelekela cakutangala. 48 Nkaako muyoobelekela basinkondonyoko aabo Mwami Leza mbayootuma kumulwana. Muyoofwa nzala, nyota, akweenda cintanda, muyoobula zintu zyoonse. Mwami Leza uyoomudyaminina kapati mane kusikila nyoonse akamunyonyoone. 49 Mwami Leza uyooleta musyobo wakule wakumagolelo aanyika uzoomulwane. Uyoozwa kule, mulaka wawo tamuuzi pe. Bayoomufuumukila mbuli sikwaze. 50 Musyobo ooyu mmukali, taulemeki bapati nikuba kweetelela bana. 51 Bayoolya boombe azivubwa zimwi anzyomulima munyika yanu mane kusikila mukamane kufwa. Taakwe maila, waini, mafuta, nibaba boombe naa bana bambelele nzyobayoomusiila, mane kusikila bakamumaninizye. 52 Bayoosinkilizya minzi yanu yoonse mane kusikila nkwakwa nzyomusyoma zikamane kukolomoka. Bayoosinkilizya minzi yanu yoonse munyika eeyo Mwami Leza wanu njayoomupa.
53 Lino akaambo kamapenzi aayo ngomuyoobona muciindi eeci cakusinkililwa abasinkondonyoko, muyootalika kulya bana banu, mibili yabana banu balombe abasimbi aabo Mwami Leza wanu mbaakamupa. 54 Ciindi eeco mwaalumi mutetemoyo, wamaanu, taakwe nayoofwida nkumbu munyina naa mukaintu wakwe uuyandika, nibaba bana bakwe basyeede. 55 Taakwe naba omwe ngwayoopa mibili yabana bakwe, eeyo njalya. Uyoolya alikke akaambo kamapenzi aayo ngomuyoobona muciindi eeci cakusinkililwa abasinkondonyoko muminzi yanu yoonse. 56 Mukaintu mutetemoyo wamaanu, uuvubide, uutana buzuba wasunza, uyoocita awalo mbubonya buyo, 57 uyoolya mwanaakwe muvwanda acamacembele cakusisikizya akwiima mulumi wakwe uuyandika, naba mwanaakwe mulombe naa musimbi.
58 Kuti naa tamutobeli cabunkutwe majwi aa Mulawo ooyu uulembedwe mubbuku eeli, nikuba kulemeka akuyoowa zina lya Mwami Leza wanu, 59 Mwami Leza uyootuma malwazi aatasilikiki kulindinywe alunyungu lwanu. Aaya anooli malwazi aatamani pe. 60 Uyootuma malwazi aaya kulindinywe oonse aayoosya, ngaakaumya Baijipiti, nkabela ayoozumanana. 61 Mwami Leza uyootuma aamwi malwazi amapenzi aatalembedwe mubbuku lya Mulawo eeli, mane kusikila mukanyonyooke. 62 Nywebo nikuba kuti mwakali banji mbuli nyenyezi, muyoosyaala bace buyo, nkaambo tiimwakaswiilila Mwami Leza wanu. 63 Mbubonya mbuli Mwami Leza mbucakamubotela kumusumpula akumuvuzya ciyoomubotela mbubonya aakumunyonyweeda limwi. Muyoomaninina munyika eeyo njomuyanda kuyootola.
64 Mwami Leza uyoomumwaila mumanyika aambi, kuzwa kumagolelo amwi kusikila kuli aambi. Ooko muyookomba baleza bambi baleza bazisamu abamabwe, nywebo nibaba basikale banu mbimwatakazi. 65 Mukati kamanyika aayo tamukooyoojana luumuno nibuba busena bumugaminine. Ooko Mwami Leza uyoocita kuti kamutelaika, kamuziimana akusukama. 66 Buumi bwanu lyoonse bunooli muntenda. Mulikunga bulaca lilabbila nkulibilika akaambo kabuumi bwanu. 67 Akaambo kakuyoowa eezyo nzyomuyoobona myoyo yanu inooduntaana. Muli kunga kufumbwa bwaca mulombozya kuti nilyabbila, lyabbila mulombozya kuti nibuce. 68 Mwami Leza uyoomubweedezya ku Ijipiti amato, nikuba kuti wakaamba kuti tamukabweedeli alimwi. Ooko muyoosoleka kulyuuzya kuli basinkondonyoko kuti mube bazike, pele taakwenaba omwe uyoomuula pe.