Ciibalusyo 26

Zipo zyabutebuzi

¹ “Lino mwaakunjila munyika eeyo Mwami Leza wanu njayoomupa akukkala, ² muleelede kuyoopa ku Mwami Leza wanu zitaanzi kubizwa munyika eeyo njayoomupa. Mukazibikke mucinzuma akuzitola kubusena bwakukombela oobo Mwami Leza wanu mbwayoosala. ³ Mukainke kumupaizi uunoobeleka ciindi eeco mukati, ‘Mwami Leza wangu wakandileta ncobeni munyika njaakakonkezya basikale besu kuti uyootupa.’

⁴ “Mpoonya mupaizi uyootambula cizuminano eeco akucibikka ansi kumbele lyacipaililo ca Mwami Leza wanu. ⁵ Ndendilyo noyooamba majwi kumbele lya Mwami Leza wanu kuti, ‘Sikale wangu wakali Mualamu wiingaila. Wakainka ku Ijipiti abantu bace buyo, wakaakukkala ooko akuba musyobo wanguzu wabantu banji-banji. ⁶ Ooko Baijipiti bakatulela calunya, bakatupenzya akutupa milimo miyumu. ⁷ Mpawo twakalilila Mwami Leza, Leza wabasikale besu, nkabela wakamvwa kulila kwesu, akubona mapenzi, aakubeleka akudyamininwa kwesu. ⁸ Mbombuboobu Mwami Leza mbwaakatugwisya mu Ijipiti anguzu zyakwe mpati. Wakacita maleele azigambya ziyoosya. ⁹ Wakatuleta kunyika iino iikunka mukupa abuci. ¹⁰ Lino O Mwami Leza ndaleta zyakutebula kwangu zitaanzi nzyookandipa.’

“Kamubikkide kale cinzuma eeco kumbele lyacipaililo ca Mwami Leza wanu, mukombe. ¹¹ Yebo abamukwasyi wako mutangale akaambo kazintu zibotu zyoonse Mwami Leza wanu nzyaamucitila. Balevi abazwamasi mbomukkala limwi batangale andinywe.

¹² “Mumwaka watatu mukape kwakkumi kwazisyango zyanu ku Balevi, bazwamasi, bamusyaala abamukabafu, kutegwa kabayoojisi zyakulya muminzi yanu yoonse. ¹³ Ndendilyo nimuyooti ku Mwami Leza wanu, ‘Ndagwisya cipaanzi cisalala muŋanda yangu, ndacipa Balevi, bazwamasi, bamusyaala abamukabafu, mbubonya mbuli mbookalailila. Tiindatyola nikuba kuluba milawo yako pe. ¹⁴ Tiindakalya cipaanzi cimwi cisalala ciindi ncindakali aadilwe, nikuba kucigwisya ciindi nketasalali mu Mulawo, nikuba kucituula kubafu pe. Ndakakuswiilila O Mwami Leza wangu, akucita zyoonse nzyookandilailila. ¹⁵ Lino langa ansi kuzwa kucikkalilo cako kujulu, uleleke bantu bako Baisilayeli anyika eeyo njookasyomezya kutupa ciindi nookakonkezya kuli basikale besu nyika iikunka mukupa abuci.’

Bantu ba Mwami leza

¹⁶ “Mwami Leza wanu umulailila kuti mutobele milawo amalailile aakwe oonse. Amukaabambe amyoyo yanu yoonse amyuuya yanu yoonse. ¹⁷ Sunu mwazumina nobeni kuti Mwami Leza ngu Leza wanu akuti muyooenda munzila zyakwe akubamba milawo amalailile aakwe oonse. ¹⁸ Awalo Mwami Leza wanu sunu wazumina kuti muli bantu bakwe, mbubonya mbuli mbwaakamusyomezya. Nkaako ono umulailila kuti mubambe milawo yakwe yoonse. ¹⁹ Wasyomezya kuti uyoomusumpula kwiinda misyobo yoonse njaakalenga. Nkaako nywebo muyoomutembaula akumulumbaizya. Muyooba bantu bakwe bamugaminine, mbubonya mbuli mbwaakasyomezya.”