Ciibalusyo 25

¹ “Lino atwaambe ku Baisilayeli bobilo kabazwangana, balakonzya kutolana kunkuta. Babetesi bakalange-lange kaambo aako, ooyo uuluzi baleelede kumuleka, pele ooyo uulubizizye bamupe mulandu. ² Kuti naa ooyo uulubizizye keelede kuumwa, mubetesi amubbandamike, kwamana akwabbaulwe. Mulakonzya kumuuma zyuumo mulandu wakwe. ³ Mulakonzya kumuuma zyuumo zili makumi one, pele kutali kwiindilila waawo. Naa mwaindilizya ulasampuka kapati.

⁴ “Mutamwaangi kumulomo musune uuma maila.

Ceelede kucita mwanookwabo afwa

⁵ “Kuti babunyina bobilo kabayakide antoomwe, kwamana umwi wafwa kakunyina akusiya mwana, mukamufu teelede kuyookwatwa kumbi pe. Mwanookwabo mufu ooyo nguuelede kukwata. ⁶ Mwana mulombe wakusaanguna uyooitwa kuti ngwamufu, kuti zina lyamufu litakalobi mu Isilayeli. ⁷ Pele kuti muntu ooyo katayandi kukwata mukamunyina, mukaintu ooyo uleelede kuunka kubapati kumulyango wamunzi, akati, ‘Munyina mulumaangu wakaka kubusizya mwanookwabo zina mu Isilayeli. Tayandi kundikwata.’ ⁸ Lino bapati bamunzi wakwe baleelede kumwiita, baambaule anguwe. Pele kuti kazumanana kuti tamuyandi kumukwata, ⁹ mukamufu ooyo uleelede kuunka aawo mpabede, bapati kabalangilila amusamunune ndyasyo yomwe, kwamana amuswide kumeso, aambe kuti, ‘Mbombuboobu mbweelede kucitwa muntu uukaka kubusizya mwanookwabo lunyungu.’ ¹⁰ Lino aaba mu Isilayeli banooambwa kuti ciinga cakasamununwa ndyasyo.

Zyamilawo imwi

¹¹ “Lino atwaambe, kuti baalumi bobilo kabalwana, nkabela kwaboola mukaintu kuzoovuna mulumaakwe kuzwa kuli yooyo uumuuma, akujata yooyo kubuntu bakwe, ¹² muleelede kumukosola kuboko ooko, mutamweengeli pe.

¹³ “Toelede kuba azipimyo zyobilo, zyakupimya bulemu naa kuvula. ¹⁴ Toelede kuba azipimyo zyobilo muŋanda yako, nkokuti cipati acisyoonto. Zipimyo eezyo zibe zyabwini, ¹⁵ Kutegwa mukoongole munyika eeyo Mwami Leza njayoomupa. ¹⁶ Nkaambo Mwami Leza wanu ulasulaika muntu uuli woonse uucenga.

Mbubakalaililwa kujaya Baameleki

¹⁷ “Amuyeeye Baameleki ncibakacita kulindinywe ciindi ciya nimwakazwa mu Ijipiti. ¹⁸ Bantu aaba bakamuvumpa akunyonyoona boonse bakali musule bakawizukide akukatala. Tiibakayoowa Leza pe. ¹⁹ Nkaako Mwami Leza wanu aakumupa luumuno lwakutapenzegwa abasinkondonyoko boonse aabo bamweengelede munyika eeyo njayoomupa ibe lukono lwanu, mukanyonyweede limwi Baameleki kuti bakalubwe ansi aano. Mutakalubi pe.