Ciibalusyo 24
Zyakuleka bakaintu
1 “Kuti mwaalumi wakwata, nkabela bweende-bweende tacimuyandi mukaintu ooyo nkaambo wamujanina cibyaabi kumane wamulembela lugwalo lwakumuleka wamupa ulakonzya kumutanda muŋanda wakwe. 2 Lino atwaambe kuti mukaintu ooyo waakukwatwa kuli uumbi, 3 nkabela awalo ooyo wabili wamusula, kumane wamulembela lugwalo lwakumuleka, wamupa awalo ulakonzya kumutanda. Naa mulumi wabili ooyo wafwa buya, 4 uulya wakamukwete kusaanguna takonzyi kumubweedezya alimwi nkaambo ulisofweede. Mwami Leza taciyandi cintu cili boobu. Mutakaciti cibi cili boobu munyika eeyo Mwami Leza wanu njayoomupa kuti ibe lukono lwanu.
Zyamilawo imwi
5 “Kuti mwaalumi wakwata onoono, teelede kuya kunkondo nikuba kubeleka mulimo uuli woonse. Mweelede kumuleka mwaka woonse kuti abotelezye mukaintu wakwe.
6 “Kuti wakweletesya umwi cintu niciba buti, toelede kutola ziyo niiba nkando kuti cibe cijatilizyo, nkaambo kucita oobo, inga kwaba kumunyanga cimugwasya mubuumi bwakwe.
7 “Kufumbwa ooyo waangila Muisilayelinyina kuti amucite muzike nikuba kumuuzya uleelede kujaigwa. Mbombuboobu mbomuyoogwisya bubi akati kanu.
8 “Kumakani aacinsenda, muleelede kucita zyoonse mbubonya mbuli bapaizi, Balevi nzyobamulailila. 9 Amuyeeye eeco Mwami Leza wanu ncaakacita kuli Miliyamu kamuli munzila ciindi ciya nimwakazwa ku Ijipiti.
10 “Kuti naa wakweletesya mwenzinyoko cintu niciba buti, toelede kunjila muŋanda yakwe akugwisya cijatilizyo eeco ncaakasyomezya kukupa. 11 Yebo wiime buyo anze, kutegwa walo mwini akuletele cijatilizyo cakwe eeco. 12 Kuti kali mucete, amana wakuletela toelede kuti jansi eelyo likalale kulinduwe. 13 Kwaba kumangolezya weelede kulipilusya kutegwa akalivumbe. Eelyo ulakulumba akaambo kaceeci, awalo Mwami Leza wako uyoobotelwa anduwe.
14 “Utaaboneni amubelesi wako mukuti mmucete, nikuba kuti abe Muisilayelinyoko, naa muzwamasi uukkala muli umwi waminzi yanu. 15 Weelede kumubbadela zuba kalitanabbila, nkaambo mmucete, aboobo mpampawo mpasyomede. Ambweni inga ulaba nalilila Mwami Leza akaambo kako, nkabela yebo ulaba aamulandu.
16 “Bazyali tabeelede kujaigwa akaambo kamulandu wacita bana, abalo bana tabeelede kujaigwa akaambo kamulandu wabazyali. Muntu umwi aumwi uleelede kufwida cibi cakwe mwini.
17 “Mutazundikizyi bazwamasi nibaba bamusyaala. Alimwi taakwe weelede kutola cisani camukamufu kuba cijatilizyo. 18 Amuyeeye kuti anywebo mwakali bazike mu Ijipiti, nkabela Mwami Leza wanu nguwakamuvuna. Ncenciceeco ncendimulailila kucita boobu.
19 “Lino mwaakutebula zilyo zyanu, kuti umwi waluba kubweza cilwi cimwi, taelede kupiluka kuyoocibweza. Weelede kucisiila bazwamasi, bamusyaala, abamukabafu. Mwaakucita oobu, Mwami Leza wanu uyoomuleleka mumilimo yanu yoonse. 20 Alimwi mwaakucela maoliva, tamweelede kupilukila alimwi. Aayo aasyeede abe aabazwamasi, bamusyaala abamukabafu. 21 Mwaakutebula nsaansa, tamweelede kupilukila alimwi. Eezyo zyasyaala zibe zyabazwamasi, bamusyaala abamukabafu. 22 Amuyeeye kuti anywebo mwakali bazike mu Ijipiti. Ncenciceeco ncemulailila kucita boobu.