Ciibalusyo 20

Zyankondo

¹ “Lino naa mwainka kuyoolwana basinkondonyoko, kwamana mwabona kuti balo balijisi mabbinza, nkalaki ampi mpati kwiinda yanu, mutabayoowi pe, nkaambo Mwami Leza wanu ooyo wakamugwisya mu Ijipiti, uyooba aandinywe. ² Kamutanatalika kulwana, mupaizi weelede kwaambila basilumamba kuti, ³ ‘Komvwa yebo, Isilayeli sunu mulalwana abasinkondonyoko. Myoyo yanu itaduntaani, mutayoowi nikuba kukankama. ⁴ Nkaambo Mwami Leza wanu nguumusolweda munkondo kuti amulwanine basinkondonyoko akubazunda.’ ⁵ Bapati aaba baambile basilumamba kuti, ‘Sena kuli umwi aano wakayaka ŋanda, kwamana taakaipa kuli Leza? Ooyo abweede kumunzi ambweni inga ulabanafwa munkondo nkabela uumbi ulaba niipa nguwe kuli Leza. ⁶ Sena kuli umwi aano wakalima muunda wansaansa, kwamana tanazilya? Ooyo abweede kumunzi, ambweni inga ulabanafwa munkondo, nkabela nsaansa eezyo kukazilye uumbi. ⁷ Sena kuli umwi aano uukkalide mukaintu, kwamana tanamutola kuŋanda? Awalo abweede kumunzi, ambweni inga ulabanafwa munkondo, nkabela kukamukwate uumbi mukaintu ooyo.’

⁸ “Bapati aabo bayooyungizya akuti, ‘Sena kuli umwi uuyoowede kapati? Awalo ooyo abweede kumunzi kuti beenzinyina batatyompwi abalo pe.’ ⁹ Lino bapati bamana buyo kwaambila basilumamba, baleelede kusala musololi wankamu yomwe-yomwe.

¹⁰ “Mwaswena afwiifwi amunzi ooyo ngomuyanda koola, kusaanguna mubape ciindi cakuti balikombye. ¹¹ Kuti bazumina kujalula manjililo, bantu boonse bamumunzi ooyo balaba bazike banu, banoomubelekela lyoonse. ¹² Pele kuti tabalikombyi, alimwi babusya nkondo, amubabbatikizye. ¹³ Mwami Leza wanu waaba munzi ooyo mumaanza aanu, mujaye baalumi boonse apanga. ¹⁴ Pele bakaintu, bana, zivubwa azimwi zyoonse zili mumunzi ooyo, mulakonzya kuzisaala kuti zibe zyanu. Alimwi mulakonzya kubelesya eezyo Mwami Leza nzyaamupa nimwasaala basinkondonyoko. ¹⁵ Mbombuboobu mbomweelede kuyoocita kuminzi yoonse iili kulaale anyika yanu.

¹⁶ “Pele kuminzi yamisyobo eeyo Mwami Leza wanu njayoomupa kuti lukono lwanu, mutakasiyi cintu niciba comwe cipona pe. ¹⁷ Mbubonya mbuli Mwami Leza wanu mbwaakamulailila, amukabanyonyweede limwi, Bahiti, Baamoli, Bakenani, Bapelezi, Bahivi a Bajebusi. ¹⁸ Nkaambo inga mulaba nimuccilila ziyanza zibi nzobacita zyakukomba baleza babo, mpawo mubisizye Mwami Leza wanu.

¹⁹ “Ciindi nimuli mukuzunda mutagonki misamu yamucelo nikuba kuti nkondo itole ciindi cilamfu buti, kamulya micelo yayo. Kayi misamu taili mbabasinkondonyoko. ²⁰ Pele mulakonzya kugonka misamu eeyo iitaligwi akwiibelesya mukuyasya zitantaala mane kusikila munzi ooyo muuzunde.