Ciibalusyo 19
Minzi yakulivunina
1 “Lino Mwami Leza wanu aakunyonyoona misyobo eeyi iili munyika njayoomupa, alimwi mwaakutola minzi amaanda aabo, 2 Mukasale minzi yotatwe iili akati-kati munyika eeyo Mwami Leza njayoomupa. 3 Mukabambe migwagwa iiya nkuko. Mukakosoole nyika Mwami Leza njayoomupa kuti ibe lukono lwanu muzipaanzi zyotatwe, kutegwa kufumbwa wajaya muntunyina akakonzye kutijila nkuko. 4 Lino Makani aamuntu uunga wajaya muntunyina muntenda, kali taalisinkondonyina, ulakonzya kutijila kuli umwi waminzi eeyi kuti alivune. 5 Atwaambe muntu waya mucisaka amweenzinyina kuyootema nkuni, lino naavuumuka akeembe kuti ateme musamu, kalo kakuka akuyasa mweenzinyina ooyo, kwamana wafwa. Ooyo muntu ulakonzya kutijila kuli umwi waminzi eeyo akulivuna. 6 Nikwali buyo munzi omwe wakulivunina, nikwali kunga ambweni musinzo walampa, aboobo simukowa wayooyo wajaigwa amutandila ulamweenzya akumujaya muntu ooyo nikuba kuti teelede kujaigwa, nkaambo taakamusulide pe. 7 Ncenciceeco ncemulailila kuti musale minzi yotatwe.
8 “Mwami Leza wenu aakukwakwabula minyinza yanu mbubuli mbwaakasyomezya naakakonkezya kuli basike banu, akumupa nyika yoonse njaakabasyomezya, 9 ndendilyo nimuyoosala minzi iimbi yotatwe. Uyoocita oobo kuti mwaakutobela malailile aakwe oonse ngemupa sunu aakuti muyande Mwami Leza wanu akweenda lyoonse munzila zyakwe. 10 Amukacite boobo kutegwa bantu batakwe mulandu kabatajaigwi munyika eeyo Mwami Leza wanu njayoomupa kuti ibe lukono lwanu.
11 “Lino atwaambe kuti kuli muntu uusulaikide umwi, kwamana wamuyubilila, wamuuma akumujaya, kumane watijila kuli umwi waminzi eeyi. 12 Bapati bamunzi ooyo baleelede kutuma bantu kuti bakamulete ooko nkwabede, mpawo bamupe mumaanza asimukowa wayooyo wakajaigwa kuti amujaye awalo. 13 Tamweelede kumweengelela pe. Mbombuboobu mbomuyoogwisya bubi bwakujaya batakwe mulandu mu Isilayeli, kutegwa, zintu zyoonse zikamweendele kabotu.
Mulawo waminyinza
14 “Munyika eeyo Mwami Leza wanu njayoomupa mutakatantamuni minyinza yabeenzinyoko eeyo njobakabikka basikale.
Zyabakamboni
15 “Kamboni omwe takonzyi kupesya muntu mulandu. Kuleelede kuba bakamboni bobilo naa botatwe kuti muntu ajaninwe mulandu. 16 Kuti kwaba muntu uubejelezya mweenzinyina mulandu, 17 bantu aabo bobilo bazwangana, baleelede kulibonya ku Mwami Leza kumbele lyabapaizi ababetesi babeleka ciindi eeco. 18 Babetesi aaba baleelede kwaavuntauzya kabotu-kabotu makani aayo, kuti kwajanika kuti kamboni ooyo ulabeja, utamizya buyo mweenzinyina, 19 acitwe mbubonya mbuli mbwaali kuyanda kuti mweenzinyina mumucita. Mbombuboobu mbomuyoogwisya bubi akati kanu. 20 Bantu boonse baakumvwa bayooyoowa, aboobo taakwe naba omwe uyoosola kucicita alimwi pe. 21 Mutanooengeleli uujaya muntu, kweelede kuti awalo ajaigwe, uudonkola linso awalo adonkolwe, uukula lino awalo akulwe, uukosola awalo akosolwe, uukosola kuulu awalo akosolwe.