Ciibalusyo 18

Zyaabilo zyabapaizi

¹ “Lino bapaizi, Balevi nkokuti musyobo woonse, tabanoojisi caabilo naa lukono mu Isilayeli, nkaambo mbobanoolya zipaizyo zitentelwa Mwami Leza, eezi ndolukono lwabo. ² Tabanoojisi lukono akati ka Baisilayelinyina. Mwami Leza ndolukono lwabo, mbubuli mbwaakabasyomezya.

³ “Kwapaizigwa ŋombe naa mbelele, bapaizi baleelede kupegwa mweendo wacamba, myeebo azyamukati. ⁴ Muleelede kubapa zitaanzi zyamalila, waini, mafuta, aboya bwengelwa mbelele zyanu. ⁵ Nkaambo Mwami Leza wanu wakabazandula balo alunyungu lwabo akati kamisyobo yanu yoonse kuti bamubelekele akumumanina milimo yoonse.

⁶ “Kufumbwa Mulevi wayanda ulakonzya kulonga kuzwa muli umwi waminzi yanu, kuya kubusena bwakukombela oobo Mwami Leza mbwayoosala. ⁷ Ulakonzya kumanina Mwami Leza wakwe milimo mbubonya mbuli Balevinyina boonse bakutaukila Mwami Leza. ⁸ Uleelede kuti atambule zyakulya zyeelede a Balevinyina atala lyazeezyo zimutumina mukwasyi wakwe.

Mbwaakacenjezya anzila zibi zyabamasi

⁹ “Mwaakunjila munyika eeyo Mwami Leza wanu njayoomupa, mutakaccilili nzila zyamisyobo yakooko pe. ¹⁰ Kutakabi muntu naba omwe akati kanu uutikapaizye mwanaakwe mulombe naa musimbi mumulilo, naa musondi naa simakakata, naa wacitoba, naa mulozi, naa mucape, ¹¹ naa simabibo, naa uunjidwe, mukamwami naa uubuzya-buzya bafu. ¹² Kufumbwa uucita zintu zibi eezi uyoosulaikwa a Mwami Leza, nkankakaako Mwami Leza wanu ncayooitanda misyobo eeyo. ¹³ Mweelede kuba bantu batakwe kampenda ku Mwami Leza wanu.

Zyamusinsimi uuyooboola

¹⁴ “Bantu aabo mbomuyoonyanga nyika balaccilila akuswiilila zyaamba baŋanda abasondi. Pele nywebo Mwami Leza wanu tamuzumizyi kucita oobo pe. ¹⁵ Mwami Leza wanu uyoomutumina musinsimi kuzwa akati kanu uuli mbuli ndime. Mweelede kuyoomuswiilila.

¹⁶ “Buzuba buya mbumwakabungene kucilundu ca Sinai, mwakakumbila kuti mutamvwi ijwi lya Mwami Leza nikuba kubona bulemu bwakwe buyoosya, nkaambo mwakayoowa kuti inga mwaba nomufwa. ¹⁷ Nkaako Mwami Leza wakandaambila kuti, ‘Ncobaamba cili kabotu. ¹⁸ Ndiyoobapa musinsimi uuli mbuli nduwe kuzwa akati kabo, ndiyoomwiisya majwi aangu, nkabela uyoobaambila zyoonse nzetikamulailile. ¹⁹ Kuti umwi atakaswiilili majwi ngaamba musinsimi ooyo muzina lyangu, mebo lwangu muntu ooyo njoomupa mulandu. ²⁰ Pele musinsimi umwi waamba muzina lyangu ngwindatalailila naa umwi waamba muzina lyaleza uumbi, uleelede kujaigwa.’

²¹ “Ambweni inga umwi ulati, ‘Ino inga twaziba buti kuti majwi aa musinsimi ooyu naa umwi azwa ku Mwami Leza naa pe?’ ²² Kuti eeco caambwa aamusinsimi tacicitiki nikuba kuboneka, makani aayo taazwi ku Mwami Leza pe. Musinsimi ooyo ulyaambilila lwakwe, nkaako mutamuswiilili pe.