Ciibalusyo 17

¹ “Mutapaizyi ŋombe niiba mbelele ku Mwami Leza wanu iijisi kampenda, nkaambo eeci Mwami Leza wanu ulicisulaikide.

² “Atwaambe kuti mwamvwa mamvwambukila aakuti kuli mwaalumi naa mukaintu umwi waminzi eeyo Mwami Leza wanu njayoomupa wakabisizya Mwami Leza akutyola cizuminano ³ kwiindila mukukomba baleza bambi akubabelekela, nikuba kukomba zuba, mwezi naa nyenyezi, kuteendelana amilawo ya Mwami Leza. ⁴ Kuti naa mwamvwa mamvwambukila aali boobu, muleelede kuvuntauzya kabotu-kabotu. Kuti naa ajanika kuti ngakasimpe, akuti bubi buli boobu bwakacitika ncobeni mu Isilayeli, ⁵ muleelede kutola mwaalumi naa mukaintu ooyo kumanjililo amunzi, kwamana mumuume mabwe afwe. ⁶ Muntu uupedwe mulandu walufu ukonzya buyo kujaigwa kuti kakuli bakamboni bobilo naa botatwe, pele kuti kakuli kamboni omwe buyo, teelede kujaigwa pe. ⁷ Bakamboni aabo mbobeelede kusaanguna kumuuma, bamana ndendilyo bantu boonse nobakonzya kuuma. Mbombuboobu mbomuyoogwisya bubi akati kanu.

⁸ “Kuti naa kwaba milandu miyumu njomutakonzyi kubeteka, mbuli yakujaya muntu, yakulwanina lubono naa kuuma muntu, mukiitole kubusena bwakukombela oobo Mwami Leza wanu mbwayoosala. ⁹ Mubaambile, Balevi, bapaizi amubetesi unoobeteka ciindi eeco, aabo mbayookosola bweelede mulandu ooyo. ¹⁰ Mweelede kuyoocita mbubonya mbuli mbobatikaambe aabo bali kubusena bwakukombela oobo Mwami Leza wanu mbwayoosala. Amukacenjele kuti mukacite zintu zyoonse nzibamwaambila. ¹¹ Amukacite mbubonya bwaamba mulawo wabo ooyo ngobamupa, amalailile aayo ngobamulailila. Mutakasiyi nzibamwaambila, mukaziccilile. ¹² Kufumbwa muntu ooyo uutaswiilili caamba mubetesi naa mupaizi uukutaukila Mwami Leza wanu, weelede kujaigwa. Mbombuboobu mbomuyoogwisya bubi mu Isilayeli. ¹³ Boonse baakumvwa bayooyoowa, nkabela taakwe naba omwe uyoosola kucicita alimwi.

Zya Mwami

¹⁴ “Mwaakumana kutola nyika eeyo Mwami Leza wanu njamupa akukkala mulinjiyo, kwamana mukayeeye kuba aamwami mbubuli misyobo iizingulukide, ¹⁵ mukabikke yooyo mwami wanu ngwayoosala. Weelede kuba umwi wanu. Tamweelede kubikka muzwamasi uutali Muisilayelinyoko pe. ¹⁶ Mwami teelede kuba aamabbiza manji aampi yakwe, nikuba kutuma bantu bakwe ku Ijipiti kuti bakaule aambi, nkaambo Mwami Leza wakaamba kuti bantu bakwe tabeelede kupilukila ooko pe. ¹⁷ Teelede kukwata bakaintu banji, nkaambo eeci inga cacita kuti asiye Mwami Leza. Teelede kulilundikila nsiliva angolida pe. ¹⁸ Anjizigwa mubwami, uleelede kuyoolilembela mwini bbuku lyamilawo kuzwa kubbuku lyamilawo lili aabapaizi, Balevi. ¹⁹ Weelede kuti kajisi bbuku eeli kalibala lyoonse kutegwa azibe kulemeka Mwami Leza wakwe alimwi akubamba milawo amalailile aaya. ²⁰ Eeci ciyoomucitya kuti walo uli kabotu kwiinda Baisilayeli akuti atasiyi milawo eeyi. Mbombuboobu walo abalunyungu lwakwe nibayoolela kwaciindi cilamfu mu Isilayeli.