Ciibalusyo 15
Mwaka waciloba
1 “Mwaka waciloba mweelede kuyoolekelela zikwelete. 2 Mboobu mbomweelede kucita. Woonse wakakweletelwa weelede kuyoolekelela Muisilayelinyina ooyo ngwaakakweletesya.
“Teelede kusesa Muisilayelinyina naba mwanookwabo, nkaambo ciindi cakulekelela zikwelete cakaambwa a Mwami Leza casika. 3 Muzwamasi ulakonzya kumusesa, pele munyoko weelede kumulekelela cikwelete cakwe.
4 “Munyika eeyo Mwami Leza wanu njayoomupa uyoomuleleka kapati cakuti takukabi mucete akati kanu pe, 5 kufumbwa kuti mwaswiilila Mwami Leza wanu amyoyo iimaninide akubamba milawo eeyo njendimupa sunu. 6 Mwami Leza wanu uyoomuleleka mbubuli mbwaakasyomezya. Muyookweletesya misyobo minji, pele nywebo taakwe nkomuyookweleta pe. Muyoolela misyobo minji, pele nywebo taakwe uyoomulela pe.
7 “Kuti naa kakuli Muisilayelinyoko wabula muli umwi waminzi yanu munyika eeyo Mwami Leza wanu njayoomupa, tamweelede kumwiima munyoko ooyo pe. 8 Amube baabi, mumupe kufumbwa ncaabula. 9 Nikuba kuti mwaka waciloba wakulekelela zikwelete ulaafwiifwi tamweelede kumukakila eeco ncayanda kukweleta akaambo kakuti, tamweelede kuba amuyeeyo mubi uuli boobo. Kuti naamwamukakila, ambweni walo ulalilila Mwami Leza, kwamana yebo ulaba aamulandu. 10 Amumupe amoyo omwe, mutanyontooki pe. Lino akaambo kaceeco Mwami Leza wanu uyoomuleleka mumilimo yanu amuli zyoonse nzyomucita. 11 Munyika yanu bacete tabakamani, nkaako ndamulailila kuti muleelede kunoopa bakwanu, bapengede lyoonse.
Milawo yabuzike
12 “Kuti Muisilayelinyoko, mwaalumi naa mukaintu, wauzigwa kulinduwe, kwamana wakubelekela kwamyaka iili cisambomwe, mumwaka waciloba umwaangunune. 13 Wamwaangununa, utamulekeli kuunka acinkwamaanza pe. 14 Uleelede kumupa mbelele, maila, awaini amoyo omwe. Mmupe mbubuli bwakakuleleka Mwami Leza. 15 Koyeeya ayebo kuti mwakali bazike mu Ijipiti, Mwami Leza wanu nguwakamuvuna. Ncenciceeco ncindakulailila boobu sunu.
16 “Pele kuti naa muzike wako wakwaambila kuti, ‘Nsiyandi kuti undaangunune,’ akaambo kakuti ulakuyanda yebo amukwasyi wako, alimwi kali kabotu, 17 ukamutole kumulyango waŋanda yako, ukamudonkole kutwi, kuzwaawo uyooba muzike wako kusikila mane akafwe. Mukaintu muzike mukamucite mbubonya awalo. 18 Utakayeeyi kuti kwaangununa muzike wako nkusweekelwa pe, kubeleka ooku nkwaakubelekela kwamyaka iili cisambomwe nkunji kapati kwiinda kwayooyo uuvola mali. Mbombuboobu Mwami Leza mbwayookuleleka mumilimo yoonse njoyoocita.
Bana bakusomona baŋombe abambelele
19 “Muzandule bana bakusomona baŋombe abambelele mubape ku Mwami Leza wanu. Mutababelesi banyama aaba, alimwi mutageli bagutu aaba pe. 20 Mwaka amwaka nywebo amikwasyi yanu mulakonzya kulya banyama aaba kumbele lya Mwami Leza wanu kubusena bwakukombela oobo mbwayoosala. 21 Kuti munyama kajisi kampenda, twaambe kali mulema naa kali moofu nikuba kapa kali buti, tamweelede kupaizya munyama ooyo ku Mwami Leza wanu pe. 22 Mukalye munyama ooyo kuŋanda yanu. Batasalali ca Mulawo abasalala boonse balakonzya kwiilya nyama, mbubuli mbomulya nyama yakonze naa yambaambi. 23 Ncomuteelede kulya mbulowa, amubutile ansi mbuli maanzi.