Ciibalusyo 14
Ncobateelede kucita banoolila bafu
1 “Lino nywebo muli bana ba Mwami Leza wanu. Nkaako mwanoolila bafu tamweelede kulinengaula nikuba kunyoola cisumpa akaambo kabafu. 2 Nkaambo nywebo muli bantu basalala ku Mwami Leza wanu. Kuzwa akati kamisyobo yoonse yaansi, Mwami Leza wakamusala kuti mube bakwe-bakwe.
Banyama beelede abateelede kulya
3 “Mutalyi cintu niciba comwe citasalali mu Mulawo. 4 Banyama mbomukonzya kulya mbaaba: ŋombe, mbelele, mpongo, 5 konze, mbaambi, nanja, timba, mubabala, lweengu, analuvwi. 6 Mulakonzya kulya munyama uuli woonse uujisi nsumba zyaandeene uuselula. 7 Nikuba boobo, nkobali banyama aabo baselula abaabo bali aansumba mbomuteelede kulya mbuli nkamela, sulwe, acibila. Aaba nikuba kuti balaselula, pele tabajisi nsumba zyaandeene, aboobo tabasalali. 8 Tamweelede kulya ngulube, nikuba kuti ilijisi nsumba zyaandeene, nkaambo tiiseluli. Nkaako nywebo tamweelede kulya nikuba kuguma mitumba yazyo pe.
9 “Mulakonzya kulya zyoonse zyamumaanzi zijisi maamba atuyambyo. 10 Pele zintu zyoonse zyamumaanzi zitajisi maamba atuyambyo mutalyi. Zilatondwa taziligwi pe.
11 “Mulakonzya kulya muyuni uuli woonse uusalala mu Mulawo. 12 Pele bayuni basofweede mbomuteelede kulya mbaaba: sikwaze, sikube, cuungwe, 13 bimbe, luunga, abalubanze bamisyobo-misyobo, 14 nuuba musyobo uuli buti wacikwaangala, 15 impye, sikusiku, nkolekole, basikakoonze bamisyobo-misyobo, 16 tumba, cibengelele, siyaswimuumba, 17 kakukubwi, sifundwe, simusika, 18 tongola, masyulamiyobe aamisyobo-misyobo, ŋangayabayuni akampaafwa boonse aaba balatondwa.
19 “Tuuka toonse tuuluka mumakata-makata tatusalali, nkaako tamweelede kutulya pe. 20 Pele zimwi zyuuluka zisalala, mulakonzya kulya.
21 “Tamweelede kulya cintu califwida pe. Mulakonzya kucipa kumuzwamasi uukkala muli umwi waminzi yanu, walo inga walya, naa mwakaka boobo inga mwacuuzya buyo kumuzwamasi. Nkaambo nywebo muli bantu basalala ku Mwami Leza wanu.
“Mutajiki mwanaa mpongo mumukupa wabanyina.
Kupa kwakkumi
22 “Lino mwaka amwaka mweelede kugwisya cipaanzi cakkumi cazilyo nzyomutebula. 23 Amukalye zipaanzi zyakkumi zyanu zyamaila, zyawaini, zyamafuta, azyabana bakusomona baŋombe ambelele kumbele lya Mwami Leza wanu kubusena oobo bwakukombela mbwayoosala, kuti mwiiye kumulemeka Mwami Leza wanu lyoonse. 24 Pele kuti busena bwakukombela ooko nkomweelede kutola zipaanzi zyakkumi zyazilyo eezyo Mwami Leza nzyaakamupa kabuli kulaale, nceeci ncomweelede kuyoocita, 25 amuzyuuzye, mali aayo mwaatole kubusena bwakukombela oobo Mwami Leza mbwayoosala. 26 Amali aaya mulakonzya kuula kufumbwa ncomuyanda mbuli ŋombe, mbelele, waini azimwi zikola, naa kufumbwa ncomuyanda. Nywebo abamikwasyi yanu muyoolya zilyo eezi kumbele lya Mwami Leza wanu cakutangala.
27 “Balevi mbomukkala limwi tamweelede kubaluba, nkaambo balo tabajisi caabilo niluba lukono lubageme pe. 28 Kwainda myaka yotatwe, mweelede kuleta zipaanzi zyakkumi zyamwaka watatu akuziyobola muminzi yanu, 29 kutegwa Balevi, balo batajisi caabilo niluba lukono, antoomwe abazwamasi, abamucaala abamukabafu mbomukkala limwi bazoolye akulilekela, ndendilyo Mwami Leza wanu nazoomuleleka mumilimo yanu yoonse.