Ciibalusyo 12
Busena bomwe bwakukombela
1 “Lino njeeyi milawo amalailile ngomweelede kuyootobela cabunkutwe kwaciindi coonse ncomunookkede munyika eeyo Mwami Leza wabasikale banu njamupa. 2 Munyika eeyo njomuyootola muleelede kuyoomwaya masena oonse aamuzilundu amutulundu-lundu akugonka misamu yoonse iivwevwede ooko misyobo eeyi njomuyootanda nkwiikombela baleza bayo. 3 Mukamwaye zipaililo zyabo, mukapwaye misumpuululu yamabwe akutenta zikozyanyo zya Asyela, mukagonkoole amituni yabo imwi, kutegwa baleza babo kabataciyookombwi limbi mumasena aayo.
4 “Mutakakombi Mwami Leza wanu munzila njobakomba baleza babo pe. 5 Kuzwa muzisi zyamisyobo yanu yoonse Mwami Leza wanu uyoosala busena bomwe bwakukombela. Oobo busena bulikke nkomunoomukombela. 6 Ooko muleelede kuleta zipaizyo zyakutenta azipaizyo zimwi, alimwi azyakupa kwakkumi, zipo zyacikonke azituuzyo zyakuliyandila, bana bakusomona baŋombe ambelele. 7 OOko nywebo amikwasyi yanu muyoolya kumbele lya Mwami Leza wanu akusekelela nkaambo Mwami Leza wamuleleka.
8 “Caakusika ciindi eeco, tamweelede kunoocita mbuli mbotucita kuno. Okuno umwi aumwi ulakomba mbuli mbwayanda mwini, 9 nkaambo tamunanjila munyika eeyo Mwami Leza wanu njamupa kuti ibe lukono lwanu. 10 Leza uyoomukwabilila kuli basinkondonyoko aboobo muyookkala cakuliiba. 11 Lino kufumbwa busena Mwami Leza wanu mbwayoosala kuti mukakombele mpawo, nkonkuko ooko nkomweelede kuleta zyoonse eezi nzindamulailila. Mulete zipaizyo zyakutenta azipaizyo zimwi zyakupa kwakkumi, zituuzyo zyakuliyandila, azipego zibotu kwiindilila eezyo nzyomwakakonkezya kupa ku Mwami Leza. 12 OOko muleelede kusekelela kumbele lya Mwami Leza, nywebo abana banu balombe abasimbi, babelesi banu baalumi abakaintu antoomwe a Balevi mbomukkala limwi, kayi mulizi kuti balo tabajisi caabilo niluba lukono lubageme. 13 Amucenjele tamweelede kupaizya zipaizyo zyakutenta kufumbwa buyo buna busena pe. 14 Mpomweelede buyo kupaizya zipaizyo zyanu mpawaawo Mwami Leza mpayoosala alubazu lumwi luli akati kamisyobo yanu. Muleelede kuyoocita zintu zyoonse nzindamulailila.
15 “Lino mulakonzya kujaya banyama banu kufumbwa aawo mpomubede. Mulakonzya kulya nyama eeyo cakulilekela, caamba kuti bantu batasalali ca Mulawo abasalala inga balya, kunyina makani naa njiya konze naa njambaambi. 16 Ncomuteelede kulya mbulowa, amubutilile ansi mbuli maanzi. 17 Nzyomuteelede kulida muminzi yanu nzeezi: Cipaanzi cakkumi camaila, cawaini naa camafuta aaoliva, nibaba bana bakusomona baŋombe naa mbelele zyanu, niziba eezyo nzimwakasyomezya kupa ku Mwami Leza naa zipego zyakuliyandila azimwi buyo. 18 Eezi zyoonse muleelede kuzilida kumbele lya Mwami Leza wanu kubusena oobo walo mbwayoosala. Nywebo abana banu balombe abasimbi, babelesi banu baalumi abakaintu, antoomwe a Balevi mbomukkala limwi, muleelede kusekelela kumbele lya Mwami Leza wanu akaambo kazyoonse eezyo nzyayoomupa. 19 Amukacenjele kuti mutakalubi Balevi ciindi coonse nomunooli munyika yanu.
20 “Lino Mwami Leza wanu waakukwakwabula cisi canu mbubuli mbwaakasyomezya, mwaakuba aankosya, mukalye nyama mbuli mbomukonzya. 21 Kuti busena bwakukombela oobo Mwami Leza wanu mbwayoosala kabuli kulaale, mulakonzya kujaya ŋombe naa mbelele zyanu eezyo Mwami Leza nzyaakamupa mbubuli mbundamulailila. Mulye nyama eeyi muminzi yanu mbuli mbomukonzya. 22 Mulakonzya kulya nyama eeyi mbubonya mbuli mbomulya yakonze naa yambaambi. Batasalali ca Mulawo abasalala boonse balakonzya kulya. 23 Pele ncomuteelede kulya mbulowa, nkaambo bulowa mbobuumi. Tamweelede kulya buumi antoomwe anyama. 24 Tamweelede kulya bulowa, amubutile ansi mbuli maanzi. 25 Kuti naa mwacita nzindamulailila Mwami Leza, ulabotelwa andinywe, nkabela zintu zyoonse ziyoomweendela kabotu nywebo alunyungu lwanu.
26 “Lino amukatole zintu zyanu zisalala azimwi eezyo nzimwakakonkezya kupa ku Mwami Leza, mukazitole kubusena oobo Mwami Leza mbwayoosala. 27 Mukape zipaizyo zyanu zyakutenta nyama abulowa, acipaililo ca Mwami Leza wanu. Bulowa bwacipaizyo canu bukatilwe munsi lyacipaililo ca Mwami Leza wanu, pele nyama mwiilye. 28 Amucenjele kuti mubambe malailile aaya oonse ngindamupa. Naa mwacita oobo, Mwami Leza wanu ulabotelwa andinywe, nkabela zintu zyoonse ziyoomweendela kabotu nywebo abalunyungu lwanu.
29 “Lino Mwami Leza uyoolobya misyobo njimuyootolela nyika. Pele mwaakumana kubanyonyoona akukkala munyika eeyo, 30 amukacenjele kuti mutakabuzyi-buzyi zyabaleza babo kuti, ‘Ino misyobo eeyi ibelekela buti baleza bayo? Atucite mbubonya aswebo.’ 31 Tamweelede kukomba Mwami Leza wanu kweendelana ambobakomba balo, nkaambo nobakomba baleza babo, balacita zintu zibi ziindene-indene eezyo Mwami Leza nzyasulide. Kapati balatenta bana babo balombe abasimbi kupa zipaizyo kuli baleza babo. 32 Zintu zyoonse nzindamulailila kamuzicita, taakwe cintu ncomweelede kuyungizya naa kugwisya pe.