Ciibalusyo 11

Zyabupati bwa Mwami Leza

¹ “Amuyande Mwami Leza wanu akubamba milawo amalailile aakwe oonse. ² Sunu amuzibe kuti nywebo lwanu ndinywe mwakabona zintu eezyo Mwami Leza wanu nzyaakacita kutali bana banu. Mwakabona nguzu zyakwe, bupati bwakwe, amaleele. ³ Mwakalibonena mbuli Mwami Leza mbwaakacita kuli Falo akunyika yakwe. ⁴ Mwakalibonena mbuli Mwami Leza mbwaakanyonyoona mpi ya Baijipiti, antoomwe amabbiza ankamela zyabo. Wakabanyikizya mulwizi lusalala nibakali kutandila ndinywe. ⁵ Tabali bana banu bakabona Mwami Leza ncaakamucitila munkanda kamutanasika kuno. ⁶ Muliciyeeyele ncaakacita kuli Datani a Abilamu bana ba Eliyabu wamusyobo wa Lubeni. Nyoonse kamulangilila nyika yakaanduka akati kabo akubamena buumbulu antoomwe amikwasyi yabo, matente aabo, kubikkilizya babelesi azivubwa zyoonse nzibakajisi. ⁷ Kasimpe nywebo mwakabona zintu zyoonse eezi Mwami Leza nzyaakacita.

Zyakuswiilila Mwami Leza

⁸ “Lino amubambe milawo yoonse njindamulailila sunu. Ndendilyo nimuyookonzya kuzubuka mulonga wa Jolodani akutola nyika eeyo. ⁹ Eelyo muyooongola munyika mbotu eeyo Mwami Leza njaakasyomezya kuli basikale banu alunyungu lwabo. Eeyi ninyika iikunka buci amukupa. ¹⁰ Nyika njomutola tiili mbuli nyika ya Ijipiti ooko nkomwakali kukkala pe. Kuya mwalikunga mwamana kusyanga nkutilila. ¹¹ Pele nyika njomutola njazilundu amakkuti, alimwi njamvula. ¹² Ninyika Mwami Leza njabamba kabotu, uliibamba mwaka woonse. ¹³ Nkaako Mwami Leza wanu amumubelekele amyoyo yanu yoonse alimwi amyuuya yanu yoonse. ¹⁴ Naa mwacita oobo, uyoomupa mvula yakumwaka ciindi ceelede, kutegwa mukabe aacewo camaila, nsaansa amafuta aaoliva. ¹⁵ Kunooli bwizu bwazivubwa zyanu. Anywebo muyoolya zilyo cakulilekela. ¹⁶ Amucenjele kuti mutoongwi akukomba baleza bambi nikuba kubabelekela. ¹⁷ Kuti naa mwacita oobo, Mwami Leza uyoomunyemena, eelyo uyoolesya mvula, ncecaamba kuti tamukabi azilyo pe. Eeci ciyoocita kuti mukalobe kufwambaana munyika eeyo Mwami Leza njayoomupa.

¹⁸ “Amulondole majwi aangu aaya mumyoyo yanu amumiyeeyo yanu, kamwaaanga kumaboko aanu kuti cibe ciibalusyo akwaasama ankumo. ¹⁹ Amukaaiisye bana banu cabunkutwe. Kamwaaibaluka kufumbwa nkomubede, nimuli mumaanda, nimuli mulweendo, nimulyookezya nikuba kubeleka. ²⁰ Mukaalembe azikotamino zyamaanda aanu aazitendele zyabwaanda. ²¹ Ndendilyo nywebo abana banu nimuyooongola munyika eeyo Mwami Leza wanu njaakakonkezya kuyoopa kuli basikale banu. Muyookkala kwalyoonse alyoonse.

²² “Nkaako kuti naa mwabamba milawo yoonse eeyi njindamupa akuyanda Mwami Leza akweenda munzila zyakwe cakukakatila, ²³ Mwami Leza uyootanda misyobo eeyo yoonse kumbele lyanu. Muyootola nyika yamisyobo mipati iili aanguzu kwiinda ndinywe. ²⁴ Kufumbwa aawo mpomuyoolyata ayooba aanu. Kuzwa kumulonga wa Yufuletisi kusikila kulwizi lwakumbo. ²⁵ Taakwe muntu naba omwe uyoomuyumina pe. Mbubonya mbuli Mwami Leza wanu mbwaakamusyomezya, uyoocita kuti kufumbwa mpomuyooinda bakayoowe akukankama.

²⁶ “Amubone sunu ndamupa zintu zyobilo kuti musale cileleko naa lusinganyo. ²⁷ Mulalelekwa naa mwabamba milawo ya Mwami Leza wanu eeyi njemupa sunu, ²⁸ pele mulasinganyizigwa naa mwakaka milawo ya Mwami Leza wanu, akusiya nzindamulailila mukuti mutobele baleza bambi mbomutazi. ²⁹ Lino Mwami Leza wanu aakumunjizya munyika eeyo njemuyootola, mukaambilizye zileleko acilundu ca Gelizimu, acilundu ca Ebali mukaambilizye lusinganyo. ³⁰ Zilundu zyobilo eezi zili mutala lya Jolodani kumbo kubbilila zuba, kumbali aamisamu mipati ya Mole, mucisi ca Bakenani bakkala mu Alaba kubambana a Giligali. ³¹ Mulaafwi kuzubuka Jolodani kuti munjile akutola nyika eeyo Mwami Leza njamupa. Mwaakumana boobo, ³² mukacenjele kuti mukabambe milawo amalailile aakwe oonse ngendimulailila sunu.