Buumba 5
Kukomba kwakuyanda kweengelelwa
1 Koyeeya O Mwami Leza eezyo zyatucitikila, langa ubone mause eesu.
2 Lukono lwesu lwapegwa kubazwakule, maanda eesu apegwa bazwamasi.
3 Twaba bamusyaala batakwe bamawisi, bamamama baba mbuli bamukabafu.
4 Tweelede kuula maanzi aakunywa, tukonzya kuba ankuni buyo kuti naa twazyuula.
5 Aabo batutandaanya batweenzya twakatala, tatukozyi kulyookezya.
6 Twakalisisya kucisi ca Ijipiti aca Asiliya kuti tujane cakulya.
7 Basikale besu bakabisya nkaako bakamana, ono tulasubulwa akaambo kabo.
8 Bazike mbabatulela, alimwi taakwe muntu naba omwe uukonzya kutwaangununa kulimbabo.
9 Tusanga buumi bwesu kutegwa tujane cakulya, nkaambo batujaya bali munkanda.
10 Mibili yesu ipya mbuli oveni, nzala yatujaya.
11 Bamakaintu besu bakasofwaazigwa mu Ziyoni, abalo bana batazi baalumi bakasofwaazigwa mu Juda.
12 Baleli bakaangililwa amaanza kabaleleenga, bapati tabacilemekwi pe.
13 Bakubusi baluujisi kuziya, balombe baladadalika akaambo kazileye zyankuni.
14 Bapati tabacijanwi amilyango yamunzi, bakubusi tabaciimbi nyimbo pe.
15 Tatucitangali mumyoyo yesu pe, kuzyana kwesu waba muzembo.
16 Zyoonse nzitwakali kulisumpwida taziciwo pe.
Maawe kulindiswe, nkaambo twakabisya.
17 Akaambo kaceeci myoyo yesu yawizuka, akaambo kazeezi, meso eesu oomfoka,
18 cilundu ca Ziyoni, casyaala buyo, sunu nkokweendeendela bamwaaba.
19 Yebo O Mwami Leza ulalela kwalyoonse alyoonse,
cuuno cako cabwami cilikkede mumazyalani oonse.
20 Ino nkaambo nzi notuluba lyoonse O Leza?
Ino watulekelezezya nzi kwaciindi O Leza?
21 Utuboozye kulinduwe O Mwami Leza, kutegwa tupilukile kulinduwe,
bukulusya mazuba eesu abe mbuli aakaindi,
22 ccita koli wakatukakila limwi akutunyemenena limwi citaambiki.