Buumba 4
Lyakamana kuzundwa kwa Jelusalemu
1 Ino yabija buti ngolida, ino yaleka buti kubeka-beka ngolida iini-ini!
Tubwe tweebesi tulisabalangene kumagolelo aamigwagwa yoonse.
2 Bakubusi bamu Ziyoni babotu mbuli ngolida
ino ono baba buti mbuli zibiya zyabulongo, eezyo zibumbwa amubumbi.
3 Nobaba bamwaaba balanyonsya bana babo, pele bantu bangu mbayumu myoyo mbuli mpye zyamunkanda.
4 Akaambo kanyota milaka yabavwanda yanamatila kuzilakula,
bana bakumbila zyakulya, pele taakwe muntu uubapa pe.
5 Aabo cimwi ciindi bakali kulya zinono ono baide kwiingaila mumigwagwa.
Aabo bakali kusama zyacisombo ono balala mumabbunta aatwe.
6 Cisubulo cabantu bangu ncipati kwiinda cabamu Sodomu,
eeco cakanyonyoonwa mukaindi kaniini buyo,
kaatakwe muntu wakayanda kugwasya.
7 Baleli bakali kubekema kwiinda caanda, bakali kutuba kwiinda mukupa,
mibili yabo yakali kweebeka kwiinda tubwe tuyandisi,
bakali kulibonya mbuli mabwe aacijulu-julu.
8 Pele lino balasiya mbi kwiinda muye, nobeenda mumigwagwa taakwe uunga wabaziba.
Lukanda lwabo lulinamatide kumafuwa, lulikakanyene mbuli kasamu.
9 Aabo bajaigwa munkondo bali kabotu kwiinda baabo bajaigwa aanzala.
Bajaigwa aanzala balakotela akunyana akaambo kakuti myuunda inyina zilyo.
10 Bakaintu basinkumbu bajika bana babo, bakaba cilyo cabo ciindi bantu bangu nibakanyonyoonwa.
11 Mwami Leza wazuzikizya kunyema kwakwe, watila bukali bwakwe bupati.
Wakutula mulilo mu Ziyoni ooyo wakatenta ntalisyo zyawo.
12 Bamami bamunyika tiibakasyoma, nobaba bantu bamunyika
kuti basinkondonyina bakabalwana bakakonzya kunjila mumilyango ya Jelusalemu.
13 Pele zyakacitika akaambo kazinyonyoono zyabasinsimi azibi zyabapaizi babo aabo bakatila bulowa bwabaluleme.
14 Ono balaampaampa mbuli bantu boofu. Balisofweede abulowa oobo
cakuti taakwe naba omwe uulisanga kuti agume noziba zisani zyabo.
15 “Kamuzwa, mulisofweede!” Mbobabaambila bantu aabo.
“Kamuzwa! Kamuzwa! Mutatugumi pe!” Nobatija akwiingaila
akati kabantu bamasi balati, “Tatuyandi kuti kabacili kuno pe.”
16 Mwami Leza lwakwe mwini nguwakabamwaisya, tacibabambi mazuba aano pe.
Bapaizi tabacilemekwi, bapati tabacilanganyizigwi pe.
17 Aswebo tobeni twakatala kulangila lugwasyo, kuzwa mumaanda eesu malamfu
aakusompelela twakali kulangila musyobo ooyo uutakonzyi kuvuna.
18 Bantu bakali tuteede, cakuti tiitwakakonzya kweenda mumigwagwa.
Mamanino eesu akali afwiifwi, mazuba eesu akatweentana, nkaambo mamanino eesu akalisikide.
19 Basikututandaanya bakali kuzuza kwiinda sikwaze nali mujulu,
bakatutandaanya muzilundu akutuyubilila munkanda.
20 Bakamujata ooyo uusyomwa mubuumi bwesu, ooyo Mwami Leza ngwaakananika,
ooyo ngotusyoma kuti ulakonzya kutukwabilila kuli basikutusaala boonse.
21 Kamusekelela mutangale nobantu bamu Edomu nywebo nomukkala munyika ya Uzi.
Pele anywebo muyoopegwa nkomeki eeyo, nyoonse muyookolwa akusamununwa, mukasyaale mbuboobu.
22 Nywebo nobamu Ziyoni, cisubulo canu cili afwiifwi kumana, takoonoocimulekede mubwaange.
Pele nywebo nobamu Edomu, uyoomusubula akaambo kazinyonyoono zyanu akuyubununa bubi bwanu.