Buumba 3
Zyacisubulo, kweempa alulangilo
1 Ndimuntu wakabona mapenzi akaambo kacisubulo cabukali bwakwe.
2 Wakanditanda akucita kuti ndeendele mumudima muciindi cakuti ndeendele mumumuni.
3 Kasimpe wanduuma ajanza lyakwe buzuba boonse.
4 Wacita kuti lukanda amubili wangu ucembaale, watyoloola mafuwa aangu.
5 Wandisinkilizya akundizinguluka mukulutila cakuyumya moyo.
6 Wandicita kuti ndikkale mumudima mbuli baabo bakafwa kale-kale.
7 Wandizingulusya bwaanda kuti intakonzyi kutija, wandilemezya anketani.
8 Ciindi nendiita nokuba kulilila lugwasyo, tatambuli kukomba kwangu.
9 Wasinka nzila yangu amandomba aamabwe, wapilinganya nzila zyangu.
10 Mbuli munyama wabutambo uuyubilide, mbuli syuumbwa uuyubide,
11 wakandikwelaanya kuzwa munzila akundikwamauna akundisiya mbuboobu kaatakwe alugwasyo.
12 Wakagwisya buta bwakwe akundicita mbaakani yamivwi yakwe.
13 Wakayasa moyo wangu amivwi iizwa mumukutu wakwe.
14 Ndakaba cisesyo cabantu bokwesu boonse,
balandisampaula munyimbo buzuba boonse.
15 Wandizuzya mani aalula, wandikozya ndulwe.
16 Watyoloola meno aangu amabwe, wandilyatauka mulusuko.
17 Wakasya kuti ndibe aluumuno, ndakaluba ciindi, kuti kuzwidilila ninzi.
18 Nkaako ndati, “Bulemu bwangu bwainka azyoonse eezyo nzindali kulangila kuzwa ku Mwami Leza.”
19 Ndayeeya mapenzi aangu akwiingaila kwangu, amapenzi aalula lu.
20 Ndaziyeeya kabotu-kabotu, moyo wangu ulatyompwa kapati.
21 Pele kuli cimwi nceyeeya, ncenciceeco ncetibe aalulangilo.
22 Akaambo kakuti luyando lwa Mwami Leza ndupati kapati,
talukooloba, nkaambo nkumbu zyakwe tazimani.
23 Cifumo-fumo cili coonse balabukuluka, kusyomeka kwako nkupati.
24 Ndakalyaambauzya akuti, “Mwami Leza ncecaabilo cangu, nkaako ndinoosyoma nguwe.”
25 Mwami Leza mmubotu kuli baabo bajisi lulangilo mulinguwe, kuli yooyo uumuyandaula.
26 Ncibotu kuti muntu kaumwide kalindilila lufutuko Mwami Leza ndwapa.
27 Ncibotu kuti muntu ayumune joko lyamapenzi kacili mukubusi.
28 Akkale alikke kaumwide, nkaambo Mwami Leza nguumupede joko eelyo.
29 Akotamike mutwe wakwe cakulibombya ambweni natibe aalulangilo.
30 Aumune buyo ciindi basinkondonyina bamuuma akumusampaula.
31 Nkaambo Mwami takabasoweli limwi bantu bakwe pe.
32 Nikuba kuti ulaleta mapenzi, uyoomubeda aankumbu, luyando lwakwe lutamani ndupati.
33 Nkaambo taleti acaali mapenzi, nikuba kubausya nsoni.
34 Nikuba kulyatauka bantu baange boonse munyika.
35 Naanka kukasya muntu zimweelede kumbele lya Sijulu Wamajulu,
36 ambweni kuvundikizya muntu mulubeta lwakwe,
sena Mwami eezi zyoonse takonzyi kuzibona?
37 Nguni muntu uukonzya kwaamba makani kwamana acitika ncobeni kuti naa taalaililwa a Mwami?
38 Sena tali Sijulu Wamajulu uucita kuti mapenzi naa zintu zibotu ziboole?
39 Ino nkaambo nzi muntu naba ni nceelede kutongooka naa wasubulwa akaambo kazinyonyoono zyakwe?
40 Atulingulwe nzila zyesu tuzibonesye, atupilukile ku Mwami Leza.
41 Atubikke myoyo yesu akusumpula maanza eesu kuli Leza wakujulu tuti,
42 “Twakabisya akukuzangila, akaka tulekelele.
43 “Wakakalala kapati akututandaanya akutujaya cakutatweetelela.
44 Wakalivumbya makumbi kutegwa kukomba kuli koonse kakutasiki kulinduwe.
45 Watucita kuti tube mbuli bukololo amafwisyilili akati kabamasi.
46 “Basinkondoma boonse batusampaula.
47 Twasikilwa ziyoosya, zilindi, kupwaigwa alunyonyooko.
48 Misozi minji ileenda mumasaya aangu, nkaambo bakwesu banyonyoonwa.
49 “Meso aangu anooenda misozi cakutaleka taakoolyokezya,
50 mane kusikila Mwami Leza atulange kuzwa kujulu atubone.
51 Zyoonse nzebwene zindiletela buusu mumoyo akaambo kabasimbi bali mumunzi wesu.
52 “Basinkondoma bakandivwima mbuli muyuni nokunyina akaambo.
53 Bakandifusa bulanga mumulindi akundiwaala mabwe,
54 maanzi akandivumba cakuti ndakali kuyeeya kuti ndafwa.
55 “Ndakaita zina lyako O Mwami Leza, kuzwa kunsi aacilindi.
56 Wakamvwa kulomba kwangu. Utasinki matwi aako
kuti utamvwi kulilauka kwangu kwakuyanda kwaangununwa.
57 Nindakakwiita wakaboola afwiifwi wakati, ‘Utayoowi pe.’
58 “O Mwami, wakandikosweda mulandu wangu, wakanununa buumi bwangu.
59 Ulibwene bubi oobo mbwendicitwa O Mwami Leza. Kondicitila bweelede!
60 Ulibwene mbobapingide kupilusya bubi, amakanze ngebajisi.
61 “O Mwami Leza wakamvwa kusampaula kwabo amakanze ngebandikanzide,
62 azeezyo basinkondoma nzyobalivwiya akukanana zyakundicita buzuba boonse.
63 Balange! Nibakkede nikuba kwiima balasampaula munyimbo zyabo.
64 “Babweedezezye eezyo zibeelede, O Mwami Leza eezyo nzibakacita amaanza aabo.
65 Yumya myoyo yabo, cisinganyo cako cibe aali mbabo!
66 Batandaanye mubukali bwako ubanyonyoone, munyika iino.”