Buumba 2
Mwami Leza mbwaakasubula Jelusalemu
1 Ino Mwami wamuvumba buti mooye wa Ziyoni akkumbi lyabukali bwakwe!
Wawaala bulemu bwa Isilayeli ansi kuzwa kujulu,
taakwe naayeeya cuuno cakwe cabwami mubuzuba bwabukali bwakwe.
2 Cakuteengelela Mwami wanyonyoona makkalo aa Jakobo,
mukunyema kwakwe wapwayaula muyumu amunzi wacisi ca Juda.
Wanyonyoona bwami bwawo abaleli bawo cakutabalemeka pe.
3 Mubukali bwakwe bupati, wanyonyoona nguzu zya Isilayeli.
Waleka kuukwabilila ciindi sinkondo wawo naasika.
Wayaka mumunzi wa Jakobo mbuli mulilo uuvwilima ooyo uusyukuta zintu zyoonse zili afwiifwi anguwo.
4 Mbubonya mbuli sinkondo walandabula buta bwakwe,
janza lyakwe lyalulyo lililibambilide kale.
Mbubonya mbuli uulwana wajaya boonse aabo babotu,
watila bukali bwakwe mbuli mulilo atente lyamooye wa Ziyoni.
5 Mwami waba mbuli sinkondoma, wanyonyoona Isilayeli.
Woola maanda aabwami aali mucisi eeci,
akunyonyoona mayubilo mayumu aaco. Waindilizya kweema akulila kwabantu bamu Juda.
6 Wamwaya cilawo cakwe caba mbuli muunda, wanyonyoona busena mbwakombelwa.
Mwami Leza wacita kuti mooye wa Ziyoni ulube mapobwe aabikkidwe,
amasabata aawo, mubukali bwakwe bupati wanyemena boonse mwami amupaizi.
7 Mwami wakaka cipaililo cakwe, akusiya busena bwakwe busalala.
Waaba bwaanda bwamaanda aabwami kuli basinkondonyina,
ono balayoba muŋanda ya Mwami Leza mbuli kuti mbuzuba bwapobwe lilibedelede.
8 Mwami Leza wakakanza kuti amwaye bwaanda buzingulukide mooye wa Ziyoni.
Wakalandabula ntambo yakupimya, nkaako taakaleka kuti aunyonyoone.
9 Milyango yamunzi ooyu yakabbila munyika, wakatyoloola zipingizyo zyawo akuzinyonyoona.
Mwami wawo abaleli bawo boonse bakaba baange, bakkede akati kamisyobo iimbi,
kucinyina mulawo, basinsimi bawo tabaciboni zilengaano zizwa ku Mwami Leza pe.
10 Bapati bamooye wa Ziyoni bakkede ansi baluumwide, balibikka vu kumitwe
akusama masaka. Boonse bamu Jelusalemu bakotamika mitwe yabo ansi.
11 Meso aangu akatala kulila, ndapenga kapati mumoyo wangu,
moyo wangu uluuside kapati akaambo kakuti bantu bokwesu banyonyoonwa,
nkaambo kakuti bana abavwanda balanetauka mumigwagwa yamunzi.
12 Balati kuli bamanyina, “Ino cakulya awaini zili kuli?”
Ciindi nobawizuka mbuli bantu bacisidwe mumigwagwa yamunzi, ciindi nobapefula mumaanza aabamanyina.
13 Ino ndikwaambile nzi? Ino ndikweelanye aanzi yebo omunzi wa Jelusalemu?
Ino ndikukozyanye aanzi kutegwa ndikuumbuluzye omunzi wa Ziyoni?
Cilonda cako ncipati mbuli lwizi lulamfu. Ino nguni uukonzya kukuponya?
14 Zilengaano zyabasinsimi bako zyakali zyakubeja nzyabuyo,
tiibakayubununa zinyonyoono zyako kuti utatolwi mubwaange.
Makani ngibakali kukwaambila akali aakubeja nkaako akakusowa.
15 Boonse bainda munzila yako balalikambila mukugambwa,
balakusabula akupukusa mitwe yabo akaambo kamunzi wa Jelusalemu.
Balati, “Mwati ooyu ngomunzi wakali kwiitwa kuti munzi mubotu weebelwa,
bantu bamunyika yoonse ngubakali kutangalila?”
16 Basinkondonyoko boonse balakuwelela,
balakusabula akukulumina ntwino, balati,
“Twauzunda. Oobu mbobuzuba mbutwakali kulindila, twali kulindila kuti tububone.”
17 Mwami Leza wacita mbuli mbwaakakanza, wazuzikizya majwi aakwe,
aayo ngaakalailila kale-kale. Wakusowa cakutakweetelela,
wacita kuti sinkondonyoko akuseke, wacita kuti uukulwana akuzunde.
18 Myoyo yabantu ililaukila Mwami. Obwaanda bwamunzi wa Ziyoni,
misozi yabantu bako yeende mbuli mulonga sikati amasiku, utalyookezyi utaleki kulila.
19 Nyamuka ubukile masiku,
ciindi balindizi bamasiku nobatalika kubeleka,
pa moyo wako cakumaninina ku Mwami Leza.
Tambika maanza aako kulinguwe mukukomba akaambo kabuumi bwabana bako,
aabo bawizauka akaambo kanzala kumagolelo aamigwagwa yoonse.
20 Langa, O Mwami Leza koyeeya. Sena ulibabwene aaba mbocita boobu?
Sena ncibotu kuti bamakaintu balye lunyungu lwabo, bana aabo mbibali kubamba?
Sena bapaizi abasinsimi beelede kupaizigwa mubusena bwako busalala?
21 Bakubusi abacembeede boonse balilede mulusuko lwamumigwagwa, bakubusi abasimbi bamana kujaigwa munkondo.
Wabajaya mubuzuba bwabukali bwako, wabajaya cakutabeetelela.
22 Mbubonya mbuli mbotamba mubuzuba bwapobwe, mbubonya oobo watamba
ziyoosya kuti zindiyoosye koonse-koonse.
Leza taakwe muntu uukonzya kutija nikuba kusyaala kali muumi pe, aabo mbindakali kubamba akulela, sinkondoma wabanyonyoona boonse.