Buumba 1
Mause aa Jelusalemu
1 Ino waba buti tongo munzi wakazwide bantu!
Waba buti mbuli mukamufu ooyo wakali mupati akati kamisyobo!
Ooyo wakali mbuli mwami mukaintu akati kazisi, lino waba muzike.
2 Ulabukila kapati masiku, misozi ileenda mumasaya aakwe.
Akati kabayandwa bakwe, kunyina uuliwo kuti amuumbulizye.
Beenzinyina boonse bamwaaba, ono baba basinkondonyina.
3 Lino nikwamana mapenzi amilimo iiminya,
bamu Juda batolwa mubwaange. Balikkede akati kamisyobo imwi,
tabalyookezyi pe. Boonse babatandaanya babeenzya mukati kamapenzi.
4 Migwagwa iiya ku Ziyoni ilalila, nkaambo taakwe bantu baboola
kumapobwe aabikkidwe.
Milyango yawo yoonse isyeede buyo, bapaizi bawo balatongela,
bakaintu bamumo baluuside, nkaako uli mumacise mabyaabi.
5 Baulwana baba mbabasimalelo bawo, basinkondonyina balilikkalilide.
Mwami Leza wauletela mapenzi akaambo kazinyonyoono zyawo zinji.
Bantu bawo batolwa mubwaange, baba bazike babasinkondonyina.
6 Munzi wa Ziyoni tuucikwe bulemu. Baleli bawo bali mbuli mbaambi zyabula macelelo,
zyatija yooyo uuziweza, pele tazijisi nguzu zili gonkedwe.
7 Mumazuba aamapenzi aawo akwiingaila kwabantu bawo,
Jelusalemu waibaluka ziyobwedo zyoonse, eezyo nziwakajisi kale-kale.
Ciindi bantu bawo nibakazundwa abasinkondonyina, kwakanyina muntu wakuugwasya.
Basinkondonyina bakuulanga akuuseka akaambo kakunyonyoonwa kwawo.
8 Jelusalemu wakabisya kapati, nkaako wakasofwaala.
Boonse bakali kuulemeka, ono balausampaula,
nkaambo babona cintanda cawo, ulatongela akulisukata.
9 Busofwaazi bwawo bulinamatide kuzifunga zyawo,
tiiwakali kuyeey zyamazuba aaboola. Kooleka kwako kulagambya,
mukuti kunyina muntu uuumbulizya pe. “Kondiceba mumapenzi aangu O Mwami Leza nkaambo sinkondoma wandizunda.”
10 Sinkondonyina wakayola ziyobwedo zyawo zyoonse,
wakabona misyobo iitasyomi kainjila mumasena aawo aasalala,
aabo O Leza mbookakasya kuti kabanjila mumbungano yako iisalala.
11 Bantu bawo boonse balatongela nobaya buyandaula cakulya,
bauzya zintu zyabo kuti bajane cakulya kutegwa kabacipona.
“Langa O Mwami Leza, uyeeye, nkaambo ndasampaulwa.”
12 “Maawe, sena caamba kuti taakwe ncomubwene nywebo nyoonse nomwiinda waawa? Amulange mubone.
Sena kuli uupenga mbuli mbwendipenzegwa akaambo kaceeco ncaandiletela Mwami Leza mubuzuba bwabukali bwakwe bupati?
13 “Kuzwa kujulu wakatuma mulilo, wazoonjila mumafuwa aangu.
Wakateya maulu aangu akanyandi, akundica. Wandicita kuti ndisyaale buyo ndanetuka buzuba boonse.
14 “Zinyonyoono zyangu zyakabambwa joko, wakazivungaila amaanza aakwe.
Zyakagwabikwa munsingo yangu, nguzu zyangu Mwami wazimana.
Wandaaba kuli baabo mbetakonzyi kuyumina pe.
15 “Mwami wasampaula basilumamba boonse mbendijisi,
waita basilumamba kuti bazoondilwane, kuti bazoopwayaule bukubusi bwangu.
Mucikandilo cakwe cansaansa Mwami walyatauka mooye wacisi ca Juda.
16 “Nkenkakaako ncelilila, meso aangu eenda misozi.
Taakwe uuli aafwiifwi kuti anduumbulizye, taakwe uuboola kuti andiyumye-yumye.
Bana bangu basyaala buyo nkaambo sinkondoma wazunda.
17 “Ziyoni watandabika maanza aawo, pele taakwe muntu uuumbulizya pe.
Mwami Leza wakalailila kuti aabo Jakobo mbabambene limwi mbabayooba
mbebamulwana.
Jelusalemu waba busena busofweede akati kabo.
18 “Mwami Leza uliluleme, nikuba boobo ndakazangila malailile aakwe.
Amuswiilile nywebo nobantu boonse, amubone mapenzi aangu.
Bantu bangu bakubusi abasimbi batolwa mubwaange.
19 “Ndakaita beenzuma, pele bakandaaba. Bapaizi abapati babantu bangu
bakaloba mumunzi ciindi nibakali kuyandaula zyakulya kutegwa kabacipona.
20 “Bona O Mwami Leza mbwepengede! Ndapenga kapati,
ndinyongene mumoyo wangu, nkaambo ndizangide kapati.
Anze panga lilajaya, amwalo mukati muli buyo lufu.
21 “Bantu balimvwide kutongela kwangu, pele taakwe naba omwe
wakunduumbulizya.
Basinkondoma boonse balimvwide zya mapenzi aangu, balasekelela akaambo kaceeco ncoocita.
Leta buzuba bwako oobo mbookaambilizya kuti abalo babe mbuli ndime.
22 “Bona bubi bwabo boonse, ubacite mbuli mboondicita akaambo
kazinyonyoono zyangu.
Zitongelo zyangu nzinji, moyo wangu wanetuka.”