Bapaizi 7
Zipaizyo zyamilandu
1 “Lino ooyu ngomulawo wacipaizyo camulandu. Eeci ncipaizyo cisalala kapati. 2 Munyama wacipaizyo eeci ajailwe kulubazu lwakunyika lwacipaililo, ooko kujailwa banyama bakutenta. Kwamana bulowa bwamunyama oobo busansailwe kumabazu one aacipaililo. 3 Nkabela mafuta oonse aamunyama agwisigwe, apaizigwe acipaililo, mafuta aakumucila, aazyamukati, 4 ansa zyobilo amafuta aazyo, amafuta oonse aali amuni. 5 Nkabela mupaizi akatente mafuta oonse acipaililo kuti cibe cipaizyo cacakulya ku Mwami Leza. Eeco ncipaizyo camulandu. 6 Kufumbwa mwaalumi waciinga cabupaizi ulakonzya kulya cilyo eeci. Pele cileelede kulidwa mubusena busalala, nkaambo cilasalala kapati.
7 “Kuli buyo mulawo womwe uujatikizya zipaizyo zyobilo, cipaizyo cakukombelezezya cinyonyoono acipaizyo cakugwisya zinyonyoono, nyama iba yamupaizi uupaizya. 8 Cikutu camunyama uupaizigwa ncamupaizi uucita milimo yabupaizi. 9 Maila aakangwa muoveni naa kujikwa mumpani naa acikangilo, nzyamupaizi uupaizya. 10 Pele maila oonse aavweledwe mafuta naa pe, ngabana aa Aloni bapaizi. Baabane mulicabo.
Cipaizyo calumvwano
11 “Lino ooyu ngomulawo wacipaizyo calumvwano cipegwa ku Mwami Leza. 12 Kuti muntu wapa cipaizyo eeci mukulumba Leza, uleelede kutola munyama acinkwa citakwe mimena, naa cinkwa cilemu-lemu civweledwe mafuta, naa tunkwa tupapalete. 13 Antoomwe acipaizyo calumvwano eeco alete tunkwa tubikkidwe mimena. 14 Muli zyoonse eezi atole cipaanzi comwe-comwe cacinkwa kuti acipe ku Mwami Leza. Eezi nzyamupaizi uusansaila bulowa bwacipaizyo calumvwano. 15 Ayalo nyama yacipaizyo calumvwano iligwe buzuba mbubonya oobo bwakupaizya. Taakwe nyama yeelede kusyaala mane buce pe.
16 “Pele kuti kacili cipaizyo cacikonke naa cakuliyandila, kufumbwa casyaala cilakonzya kuligwa bwaca. 17 Lino kuti kucisyeede nyama kusikila buzuba bwatatu, itentwe. 18 Kuti naa mwiilya mubuzuba bwatatu, inga Leza tatambuli cipaizyo camuntu ooyo, eelyo cipaizyo eeco tacimugwasyi pe. Tacisalali, kufumbwa uucilya uli aamulandu. 19 Ayalo nyama kuti yaguma cintu cisofweede tiielede kuligwa pe, itentwe buyo.
“Lino bantu basalala mubukombi balikke mbabakonzya kulya nyama yacipaizyo calumvwano. 20 Pele kuti uutasalali wiilya, uyoogwisigwa mubantu ba Leza. 21 Alimwi naa muntu walya nyama yacipaizyo eeci ciindi kali waguma kale cintu cimwi cisofwaazya, naba muntu naba munyama, naa kufumbwa cisofweede, uyoogwisigwa mubantu ba Leza.”
Mutalyi mafuta abulowa
22 Lino Mwami Leza wakaambila Mozesi kuti, 23 “Ambila Baisilayeli kuti, mutakalyi mafuta aaŋombe, naaba aambelele, naaba aampongo. 24 Aalo mafuta aamunyama walifwida naa walumwa munyamanyina, taaelede kuligwa pe, pele mulakonzya kwaabelesya munzila zimwi. 25 Kufumbwa muntu uyoolya mafuta aamunyama wapaizigwa ku Mwami Leza, uyoogwisigwa mubantu ba Leza. 26 Taakwe makani naa nkukuli ooko nkwakkala Muisilayeli, taelede kulya bulowa bwabayuni nibuba bwabanyama. 27 Kufumbwa uusotoka mulawo ooyu, uyoogwisigwa mubantu ba Leza.”
28 Lino Mwami Leza wakaambila Mozesi kuti, 29 “Ambila Baisilayeli kuti naa muntu wapa cipaizyo calumvwano, uleelede kuleta cipaanzi cimwi kuti cibe cipego ceelede ku Mwami Leza. 30 Acilete mumaanza aakwe mbuli cipaizyo cacakulya. Uyooleta mafuta aamunyama akaango akuzizumbaanya kumbele lya Mwami Leza. 31 Ciindi eeco mupaizi akatente mafuta acipaililo, pele kaango nkika Aloni abana bakwe. 32 Alimwi cibelo calulyo cikapegwe 33 kuli uupaizya bulowa amafuta acipaizyo calumvwano. 34 Kaango aako acibelo nzipego zyangu kuzwa ku Baisilayeli. Ndazipa kuli Aloni abana bakwe, kuti zibe zyabo lyoonse. 35 Eeci ncecipaanzi cacipaizyo ca Mwami Leza kuli Aloni abana bakwe ciindi nibakananikwa kuba bapaizi. 36 Mubuzuba oobo Leza wakalailila Baisilayeli kuti bape cipaanzi eeci cacipaizyo. Ooyu ngomulawo Baisilayeli ngobeelede kutobela kwamazyalani oonse aaciza.”
37 Eeyi njemilawo yazipaizyo zitentwa, zipaizyo zyamaila zyakugwisya zinyonyoono, zyamilandu, zyakunanikwa, alimwi azyalumvwano. 38 Milawo eeyi njenjiyo Mwami Leza njaakapa Mozesi acilundu ca Sinai munkanda buzuba mbwaakaambila Baisilayeli kuti balete zipego zyabo.