Bapaizi 6
1 Lino Mwami Leza wakaambila Mozesi kuti, 2 “Muntu wacita cakutasyomeka akubisizya Leza mukuti wacenga mweenzinyina naakaka kupilusya ncasisyidwe naa kumubbida, naa kumuunina, 3 naa kubeja cakukonka kati taakapegwa eezyo zyakazimina, 4 naa muntu wabisya munzila eezi, uleelede kubweedezya eezyo nzyaakabba, nzyaakanyanga, zyakasweekede nzyaakajana, 5 anzyaakakonkezya cabuyo. Buzuba mbwatikajaninwe mulandu, akabweedezye zyoonse kuli mukamwini akubikkilizya cipaanzi casanu. 6 Uleelede kuleta kumupaizi cipaizyo cakukombelezezya cinyonyoono. Alete mugutu uutakwe kampenda, eelyo muulo wawo weendelane awakuŋanda ya Leza. 7 Nkabela mupaizi uyookombelezezya cinyonyoono camuntu ooyo ku Mwami Leza, eelyo uyoolekelelwa ncobeni.”
Cipaizyo citentwa coonse
8 Lino Mwami Leza wakaambila Mozesi kuti, 9 “Lailila Aloni abana bakwe zyamulawo wacipaizyo citentwa coonse. Cipaizyo eeco cibikkwe acipaililo masiku oonse mane bukace, mulilo kuuyaka ciindi coonse. 10 Mupaizi asame jansi lyandeketela akabbudula kandeketela, wamana ayole twe lili acipaililo, alilundike kumbali lyaco. 11 Wamana oobo asamunune zisani eezyo, asame zimbi, ndendilyo natitole twe kunze lyazivuka kubusena busalala. 12 Nkabela mulilo uuli acipaililo uleelede kuti kuuyaka kuutazimi pe. Cifumo-fumo lyoonse mupaizi uleelede kusikka nkuni acipaililo, akubikka zipaizyo zyakutenta alimwi akutenta mafuta acipaizyo calumvwano. 13 Mulilo uleelede kuti uyake lyoonse acipaililo, kuutazimi pe.”
Zipaizyo zyamaila
14 “Njeeyi milawo yakupaizya maila. Bana ba Aloni bayootola cipaizyo camaila ku Mwami Leza kumbele lyacipaililo. 15 Lino umwi wabo uyoobuula janza lyabusu amafuta atununkilizyo toonse akazitente acipaililo kuzibya kuti zyoonse zyakapegwa ku Mwami Leza. Zibe bweema bubotelezya ku Mwami Leza. 16 Aloni abana bakwe bayoolya bwasyaala. Bayookanga cinkwa citakwe mimena cakulya kubusena busalala, kulubuwa lwatente lyakuswaanganina. 17 Tacikoyoopangwa aamimena pe. Leza wakabapa kuti cibe cipaanzi ncobalya kuzwa kuzipaizigwa amulilo. Cilasalala kapati, mbuli cipaizyo cakukombelezezya zinyonyoono acakumanya milandu. 18 Kwamazyalani oonse aaciza baciinga ca Aloni baalumi kabalya zyazipaizyo zitentwa zipegwa ku Mwami Leza. Kufumbwa uyooziguma, uyoonyonyoonwa akaambo kabusalali bwazyo.”
19 Lino Mwami Leza wakaambila Mozesi kuti, 20 “Cipaizyo ceelede kupegwa abana ba Aloni ciindi umwi wabo nananikwa kuba mupaizi cibe boobu. Ape busu bunante buzula nsangwa, mbubonya mbubuli mweelwe uupaizigwa buzuba abuzuba. Ape cisela cifumo-fumo acimwi mangolezya. 21 Eelyo cikandwe amafuta cikangwe. Ciletwe kacisanganyizidwe kabotu kacili mutunsuma mbuli cipaizyo camaila. Cibe cabweema bubotelezya ku Mwami Leza. 22 Kwamazyalani oonse aaciza waciinga ca Aloni, mupaizi mupati nguuyoopa cipaizyo eeci ku Mwami Leza. Citentwe coonse do. 23 Taakwe cibeela cabusu bwacipaizyo eeco ceelede kuligwa, butentwe boonse.”
Zipaizyo zyakukombelezezya zinyonyoono
24 Lino Mwami Leza wakaambila Mozesi kuti, 25 “Ambila Aloni abana bakwe zyamulawo wakugwisya zinyonyoono. Munyama wakupaizizya cinyonyoono uleelede kujailwa kulubazu lwakunyika lwacipaililo, ooko kujailwa banyama bakutenta. Eeci ncipaizyo cisalala kapati. 26 Mupaizi uupaizya munyama ooyo uyoomulya mubusena busalala, mulubuwa lwatente lyakuswaanganina. 27 Kufumbwa uuyooguma cipaizyo eeco, uyoonyonyoonwa akaambo kabusalali bwaco. Kuti bulowa bwaco bwatikila acisani, cisanzigwe mubusena busalala. 28 Acibiya coonse cali kujikila nyama cipwaigwe. Kuti wajikila muli camukuba, ceelede kusanzigwa akusukululwa amaanzi. 29 Kufumbwa mwaalumi waciinga cabupaizi inga walya cipaizyo eeci, nkaambo cilasalala kapati. 30 Pele naa kuti bulowa bumwi bwaletwa mutente lyakuswaanganina akubelesegwa mubusena busalala mukukombelezezya zinyonyoono, munyama ooyo teelede kuligwa pe. Weelede kutentwa.”