Bapaizi 5

Zipaizyo zyakukombelezezya zinyonyoono

¹ “Kuti naa muntu waitwa kunkuta akulumbizigwa kuti ape bumboni bwazeezyo nzyaakabona naa kuziba, pele wakaka, muntu ooyo wabisya.

² “Alimwi kuti naa cakutaziba umwi wajata cintu citasalali, mbuli mutunta wamunyama naa wacivubwa naa wacikalaba, wasofwaala akuba aamulandu.

³ “Kuti naa umwi wajata camuntu cisofweede katazi wabisya, eelyo waziba, ulaba aamulandu.

⁴ “Kuti naa muntu wakonkezya cakufwambaana katazi wabisya, eelyo waziba, ulaba aamulandu.

⁵ “Muntu wabisya boobu uleelede kulyaamba cinyonyoono cakwe. ⁶ Uleelede kweeta cipaizyo cakabelele naa kapoho cibe cakukombelezezya mulandu ku Mwami Leza. Mupaizi uyoocita cipaizyo cakusalazya muntu ooyo. ⁷ Kuti naa kali mucete, uutajisi kabelele, uleelede kuleta nziba zyobilo, naa nkwilimba zyobilo, imwi njacipaizyo cazinyonyoono zyakwe, imwi njacipaizyo cakutenta. ⁸ Akazilete kumupaizi uutikape cipaizyo cakukombelezezya cinyonyoono. Akatyole nsingo, pele atagwisyi mutwe pe. ⁹ Bulowa bwayo abusansaile acipaililo, nkabela bwasyaala atile kutako lyacipaililo. Eeci ncipaizyo cakukombelezezya cinyonyoono. ¹⁰ Wamana apaizye amuyuni wabili mbuli cipaizyo cakutenta mbubonya mbuli bwaamba mulawo. Munzila eeyi mupaizi ulapa cipaizyo cakusalazya muntu ooyo, nkabela ulalekelelwa ncobeni.

¹¹ “Pele kuti naa muntu mmucete cakuti takonzyi kujana nziba zyobilo noziba nkwilimba zyobilo, uleelede kweeta nsangwa yabusu bunante kuti cibe cipaizyo cakukombelezezya cinyonyoono cakwe. Teelede kubikka mafuta notuba tununkilizyo abusu oobo, nkaambo tacili cipaizyo camaila pe, pele ncipaizyo cakukombelezezya cinyonyoono. ¹² Uleelede kubuleta kumupaizi, walo nguuyoobuula buzuzya janza, cibe ciibalusyo akubutenta acipaililo. Eeci ncipaizyo cakukombelezezya cinyonyoono. ¹³ Munzila eeyi mupaizi uyoopa cipaizyo cakusalazya muntu ooyo, nkabela uyoolekelelwa ncobeni. Busu busyaala mbwamupaizi, mbubonya mbuli lipaizigwa maila.”

Zipaizyo zyazikwelete

¹⁴ Lino Mwami Leza wakaambila Mozesi kuti, ¹⁵ “Kuti naa umwi muntu wabisya cakutaziba mukuti taapa zisalala ku Mwami Leza, uleelede kuleta cipaizyo camugutu naa mpongo iitakwe kampenda. Nkabela muulo wayo weendelane awakuŋanda ya Leza. Ncipaizyo cakukombelezezya mulandu. ¹⁶ Alimwi uleelede kubbadela zisalala eezyo akubikkilizya cipaanzi casanu. Ape eezi kumupaizi, walo nguutipaizye munyama kuti cibe cipaizyo cakukombelezezya cinyonyoono camuntu ooyo, nkabela uyoolekelelwa ncobeni.

¹⁷ “Kufumbwa muntu wasotoka mulawo wa Mwami leza cakutaziba, uli aamulandu alimwi uleelede kusubulwa. ¹⁸ Alete kumupaizi mugutu uutakwe kampenda, nkabela muulo wawo weendelane awakuŋanda ya Leza. Lino mupaizi akacite cipaizyo cakukombelezezya cinyonyoono camuntu ooyo, ncaakacita katazi, nkabela uyoolekelelwa ncobeni. ¹⁹ Eeci ncecakubbadela kubisya nkwaakabisizya Mwami Leza.”