Bapaizi 4

Zipaizyo zyakukombelezezya zinyonyoono zicitwa cakutaziba

¹ Lino Mwami Leza wakaambila Mozesi kuti, ² “Ambila Baisilayeli kuti naa muntu wacita cinyonyoono akusotoka nuuba umwi wamilawo ya Leza katazi, uleelede kucita zeezi.

³ “Kuti naa Mupaizi Mupati wacita cinyonyoono akweetela bantu mulandu, uyooleta mupoho uutakwe kampenda akumupaizya kuli Leza akaambo kacinyonyoono cakwe. ⁴ Uyooleta mupoho kumulyango watente lyakuswaanganina, akabikke janza lyakwe amutwe wapoho akuujaila mpoonya aawo kumbele lya Leza, nkaambo kacinyonyoono cakwe. ⁵ Eelyo Mupaizi Mupati ooyo uyootola bumwi bulowa bwapoho mukati katente lyakuswaanganina. ⁶ Akanjizye munwe mubulowa kwaziindi zili ciloba akabusansaile kumbele lyacisitilizyo cisalala. ⁷ Uyoozila bulowa bumwi kumeja aacipaililo catununkilizyo mutente lyakuswaanganina. Wamana akatile bulowa bwasyaala atako lyacipaililo cazipaizyo zyakutenta, cili kumulyango watente lyakuswaanganina. ⁸ Uleelede kugwisya mafuta oonse aapoho ooyu, nkokuti mafuta aazyamukati, ⁹ ansa amafuta aazyo, amafuta oonse aali amuni, ¹⁰ mbubonya mbuli bucitwa mafuta aapoho wacipaizyo calumvwano. Eelyo mupaizi lwakwe mwini nguyoogwisya mafuta aaya akuyooatenta acipaililo. ¹¹ Pele uleelede kuyootola cikutu, nyama, mutwe, amaulu azyamukati zyoonse kubikkilizya abufumba, ¹² akazibweze zyoonse kuzitola kunze lyazivuka kubusena busowelwa twe, nkabela akazitentele nkukonya ooko amulilo wankuni.

¹³ “Kuti naa bantu boonse ba Isilayeli babisya akujaninwa mulandu wakusotoka milawo ya Leza kabatazi, ¹⁴ lino cinyonyoono eeco cazibwa, eelyo buleya boonse, buyooleta kapoho kabe kacipaizyo cakugwisya zinyonyoono. Bayookatola kutente lyakuswaanganina, ¹⁵ nkabela basololi bayoobikka maanza amutwe wakapoho akukajaila mpoonya aawo kumbele lya Mwami Leza. ¹⁶ Ndendilyo mupaizi mupati nayoogwisya bulowa bumwi kuzwa kukapoho akubutola mutente lyakuswaanganina, ¹⁷ akanjizye munwe wakwe kwaziindi zili ciloba akusansaila kumbele lyacisitilizyo. ¹⁸ Eelyo akazile bulowa bumwi kumeja aacipaililo catununkilizyo mukati katente lyakuswaanganina, wamana buyoosyaala akatile kutako lyacipaililo cazipaizyo zyakutenta cili kumbele lyatente lyakuswaanganina. ¹⁹ Lino akagwisye mafuta oonse akwaatenta acipaililo. ²⁰ Uleelede kucita kukapoho aaka mbuli bucitwa ku mupoho wacipaizyo cakugwisya zinyonyoono. Mbombuboobu mupaizi mbwayoocita cipaizyo cakusalazya bantu, eelyo bayoolekelelwa. ²¹ Kwamana boobu uyootola kapoho kunze lyazivuka akukatenta, mbubonya mbuli butentwa mupoho wakugwisya zinyonyoono zyamupaizi. Eeci ncakukombelezezya cinyonyoono cabuleya.

²² “Kuti naa musololi wacita cinyonyoono akujaninwa mulandu wakusotoka umwi wamilawo ya Mwami Leza katazi, ²³ wamana kuzibisigwa cinyonyoono cakwe, uleelede kuleta sijembwe uutakwe kampenda kuti cibe cipaizyo cakwe. ²⁴ Akabikke janza amutwe wakwe akumujaila kunyika lyacipaililo cazipaizyo zitentwa. Eeci ciyooba ncecipaizyo cazinyonyoono. ²⁵ Mupaizi uyoonjizya munwe wakwe mubulowa, akubuzila kumeja aacipaililo. Kwamana buyoosyaala akatile kutako lyacipaililo. ²⁶ Eelyo akatente mafuta oonse acipaililo mbubonya mbuli bucitwa mafuta aacipaizyo calumvwano. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.

²⁷ “Kuti naa muntu buyo wacita cinyonyoono akujaninwa mulandu wakusotoka umwi wamilawo ya Mwami Leza katazi, ²⁸ wamana wazibisigwa cinyonyoono cakwe, uleelede kuleta mpongo mpwizi iitakwe kampenda yakupaizya. ²⁹ Weelede kubikka janza lyakwe amutwe wayo, akwiijaila kunyika lyacipaililo cazipaizyo zyakutenta. ³⁰ Mupaizi uyoonjizya munwe wakwe mubulowa bwamunyama akubuzila kumeja aacipaililo. Kwamana buyoosyaala akatile kutako lyacipaililo. ³¹ Eelyo akagwisye mafuta aayo oonse mbubonya mbuli bucitwa mafuta aacipaizyo calumvwano akwaatentela acipaililo, bube bweema bubotelezya ku Mwami Leza. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.

³² “Kuti naa muntu waleta mbelele kuti ibe cipaizyo cacinyonyoono, ileelede kuba mpwizi iitakwe kampenda. ³³ Akabikke janza lyakwe amutwe wayo akwiijaila kunyika lyacipaililo cazipaizyo zyakutenta. ³⁴ Mupaizi uyoonjizya munwe mubulowa akubuzila kumeja aacipaililo. Wamana bwasyaala akatile kutako lyacipaililo. ³⁵ Eelyo akagwisye mafuta aayo oonse mbubonya mbuli bucitwa aacipaizyo calumvwano, akwaatentela acipaililo antoomwe acipaizyo cazyakulya. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.”