Bapaizi 3

Zipaizyo zyalumvwano

¹ “Lino kuti muntu wapa cipaizyo calumvwano ku Mwami Leza, cipaizyo cakwe cibe campwizi naa poho, cibe citakwe kampenda. ² Muntu ooyo abikke janza lyakwe amutwe waŋombe eeyo, wamana aijaile amulyango watente lyakuswaanganina. Eelyo bana ba Aloni bapaizi bakasansaile bulowa kumabazu oonse one aacipaililo. ³ Baleelede kupa ku Mwami Leza zipaizyo zyakutenta eezi, mafuta oonse aavumbilide zyamukati, ⁴ ansa amafuta aazyo amafuta oonse aali amuni. ⁵ Eelyo bana ba Aloni bapaizi bakazitente zyoonse acipaililo antoomwe azipaizyo zimwi zyakutenta. Zibe zipaizyo zyabwema bubotelezya ku Mwami Leza.

⁶ “Alimwi kuti naa mbelele niiba mpongo yabelesegwa kucipaizyo calumvwano, ilakonzya kuba sijembwe naa mpwizi, pele ileelede kuba iitakwe kampenda. ⁷ Kuti muntu wapa mbelele, mbuli cipaizyo ailete kumbele lya Mwami Leza, ⁸ akabikke janza lyakwe amutwe wayo, wamana aijaile kumbele lyatente lyakuswaanganina. Lino bana ba Aloni bapaizi bakasansaile bulowa kumabazu oonse one aacipaililo. ⁹ Baleelede kupa ku Mwami Leza zipaizyo zyakutenta eezi, mafuta, amafuta aamucila watendwa kuzwa kubukome, alimwi amafuta oonse aali muli zyamukati, ¹⁰ insa amafuta aazyo, amafuta oonse aali amuni. ¹¹ Eelyo mupaizi uyoozitenta acipaililo kuti cibe cipaizyo cacakulya ku Mwami Leza.

¹² “Kuti naa muntu wapa mpongo, ¹³ akabikke janza lyakwe amutwe wayo akwiijaila kumbele lyatente lyakuswaanganina, wamana bapaizi bakasansaile bulowa bwayo kumabazu oonse one aacipaililo. ¹⁴ Baleelede kupa ku Mwami Leza zipaizyo zyakutenta eezi, mafuta oonse aazyamukati, ¹⁵ ansa amafuta aazyo, amafuta oonse aali amuni. ¹⁶ Mupaizi akazitente zyoonse acipaililo kuti cibe cipaizyo cacakulya cibotelezya. Iiyi mafuta oonse ngaa Leza. ¹⁷ Taakwe Muisilayeli weelede kulya mafuta nibuba bulowa, ooyu ngomulawo weelede kubambwa lyoonse kwamazyalani oonse kufumbwa nkobayookkala.”