Bapaizi 27
Malailile aaamba zyakupa ku Mwami Leza
1 Lino Mwami Leza wakaambila Mozesi kuti 2 aambile Baisilayeli kuti, “Ciindi muntu napegwa ku Mwami Leza mukuzuzikizya cisyomezyo cilibedelede, muntu ooyu ulakonzya kwaangununwa mukupa myeelwe eeyi, yeendelene ayakuŋanda ya Leza.
3 “Mwaalumi wamyaka iili makumi obilo kusikila kumyaka iili makumi aali cisambomwe muulo wakwe ube mali ansiliva aali makumi osanwe. 4 Mukaintu ube makumi otatwe ansiliva. 5 Mulombe wamyaka yosanwe kusikila kumakumi obilo ube makumi obilo ansiliva. Musimbi ube kkumi lyansiliva. 6 Mubutusi mulombe uutasiki kumyaka yosanwe ube musanu wansiliva. Mubutusi musimbi ube nsiliva zyotatwe.
7 “Mwaalumi uuindilila kumakumi aali cisambomwe ube kkumi lyomwe lyansiliva. Mukaintu uuindilila kumakumi aali cisambomwe ube kkumi lyomwe lyansiliva.
8 “Kuti naa muntu umwi mmucete cakuti takonzyi kupa mweelwe ooyo uyooletwa kumupaizi. Lino mupaizi nguuyoobikka muulo musyoonto ngwakonzya muntu ooyo.
9 “Lino kuti naa wakasyomezya munyama uukonzya kupaizigwa, nkokuti munyama ooyo ulasalala. 10 Muntu ooyo wakasyomezya teelede kupa uumbi mubusena bwayooyo. Naa wacita oobo banyama boonse aabo balaba ba Mwami Leza. 11 Pele kuti naa wakasyomezya munyama uutakonzyi kupaizigwa munyama ooyo apegwe kumupaizi. 12 Lino mupaizi nguuyoobikka muulo weelede munyama ooyo mbuli mbwali mubotu naa mubi. Muulo ooyo uyookkalilila. 13 Kuti naa muntu ooyo wakasyomezya kayanda kumuula munyama wakwe, weelede kuula akuyungizya cipaanzi casanu amuulo wabikkwa.
14 “Lino kuti muntu umwi wayanda kupa ŋanda yakwe ku Mwami Leza, mupaizi uleelede kubikka muulo mbubonya mbuli bubotu naa bubi bwabuyake bwayo, eelyo muulo ooyo uyookkalilila. 15 Kuti ooyo wiipa kayanda kwiiula, weelede kuula akuyungizya cipaanzi casanu amuulo wabikkwa. Eelyo niinga yaba yakwe.
16 “Lino naa muntu umwi wapa ku Mwami Leza cipaanzi cimwi canyika yakwe, muulo uyoobikkwa kweendelana ambuto iinga yasyangwa, nkokuti nsiliva zili kkumi kucisuwo comwe. 17 Kuti nyika eeyi yapegwa ciindi nuwamana-mana mwaka walutangalo, muulo uuzwide uleelede kupegwa. 18 Pele kuti yapegwa kakwiindide ciindi, mupaizi nguuelede kubikka muulo weelede kweendelana amyaka iisyeede kusika kumwaka uumbi walutangalo, aboobo muulo ulaceesegwa. 19 Kuti naa muntu kali wakaupede ku Mwami Leza kwamana uyanda kuti auule alimwi, weelede kuula muulo wawo akuyungizya cipaanzi casanu amuulo wabikkwa. Ndendilyo nuunga waba wakwe. 20 Pele kuti wauzya muunda ooyo kumuntu uumbi, walo mwini katauuli kuzwa ku Mwami Leza, nkokuti takonzyi kuuula limbi lwakwe mwini. 21 Lino wasika mwaka walutangalo, muunda ooyo uyooba lubono lwa Mwami Leza akupegwa kubapaizi.
22 “Kuti naa muntu wapa ku Mwami Leza muunda ngwaakaula, uutali ngwakonzya kukona, 23 mupaizi uyoobikka muulo wawo kweendelana amweelwe wamyaka iisyeede kusika kumwaka walutangalo. Muntu ooyo uleelede kubbadela buzuba mbubonya oobo. Aayo mali nga Mwami Leza. 24 Lino mumwaka walutangalo, muunda ooyo uleelede kubweedezegwa kuli mukamwini wini nikuba kubana bakwe.
25 “Myuulo yoonse ileelede kubikkwa kweendelana ayakuŋanda ya Leza, nkokuti tuli makumi obilo tukkwanya di lyomwe.
26 “Taakwe muntu weelede kupa ku Mwami Leza munyama wakusomona, nkaambo kakuti ulizizilwe kale kuti nguwa Leza. Naba mwanaa ŋombe, naa wambelele, zyoonse eezi nzya Mwami Leza, 27 pele mwanaa munyama uutapaizigwi ulakonzya kumuula amuulo wabikkwa akuyungizya cipaanzi casanu. Naa tauli munyama ooyo aulisigwe kumuntu uumbi amuulo wabikkwa ooyo.
28 “Taakwe muntu weelede kuuzya naa kuula capegwa ku Mwami Leza, naba muntu, naba munyama, niiba nyika. Eezi nzya Mwami Leza lyoonse. 29 Taakwe naba muntu wakapedwe ku Mwami Leza uukonzya kuulululwa, buyo-buyo ajaigwe.
30 “Cakkumi cizwa mumuunda mbuli maila niiba micelo, zilasalala, nzya Mwami Leza. 31 Kuti naa kuli muntu uyanda kuula kwakkumi kwakwe, uleelede kuyungizya cipaanzi casanu kumuulo waco. 32 Omwe mwabanyama bali kkumi ngwa Mwami Leza. Banyama nibabalwa wakkumi uuli woonse ngwa Mwami Leza. 33 Mukamwini teelede kusala banyama bakotede kuti ape ku Mwami Leza naa kubasinta abanyama bamwi babi. Kuti naa wasintanya banyama, banyama boonse aaba mba Mwami Leza, nkaako tabeelede kuulululwa pe.”
34 Eeyi njemilawo Mwami Leza njaakapa Mozesi acilundu ca Sinai kuti ape Baisilayeli.