Bapaizi 26
Zileleko zyakuswiilila
1 Lino Mwami Leza wakaamba kuti, “Mutapangi zikozyanyo niziba zibumbwa, niiba misumpuululu yamabwe naaba mabwe aabezedwe munyika kuti muzikombe. Ndime Mwami Leza wanu. 2 Amubambe Masabata akulemeka busena mbwekombelwa. Ndime Mwami Leza.
3 “Kuti naa mwatobela malailile akubamba milawo 4 ndiyoomutumina mvula muciindi cayo, kutegwa nyika ikamupe maila manji amisamu ikazyale micelo kabotu. 5 Maila aanu ayoojata kapati, cakuti mucinooyootebula kusikila muciindi cakucela nsaansa, alimwi mucinooyoocela kusikila kuciindi cakusyanga maila. Muyoojana zyoonse zyakulya nzyomuyanda alimwi muyookkala caluumuno munyika yanu.
6 “Ndiyoomupa luumuno munyika yanu, munooyoolyoonena kakutakwe akuyoowa cintu niciba buti. Banyama boonse babutambo ndiyoobagwisya munyika, alimwi taakwe nikuyooba nkondo pe. 7 Lyoonse munoobazunda basinkondonyoko. 8 Kamuli basanu buyo muyookonzya kuzunda bali mwaanda, nkabela kamuli mwaanda muyookonzya kuzunda bali zyuulu zili kkumi. Basinkondonyoko muyoobakoma ncobeni. 9 Ndiyoomuleleka akumupa bana banji, alimwi ndiyoobamba cizuminano ncitwakapangana andinywe. 10 Mucinooyoolya zyamwakali mumatala ciindi cakulongela caakusika. 11 Njooba aandinywe, alimwi taakwe nenjoomucimwa pe. 12 Njooenda andinywe, ndiyooba Leza wanu anywebo muyooba bantu bangu. 13 Ndime Mwami Leza wanu wakamugwisya mu Ijipiti kutegwa mutakabi bazike limbi. Ndakatyola joko lyabuzike bwanu kuti mukakonzye kulyeendelela.”
Cisubulo cabataswiilili
14 Mwami Leza wakaindilizya akuti, “Kuti naa tamuswiilili akutabamba milawo eeyi, 15 kuti mwakaka malailile aangu naa milawo yangu akutacita nzyeamba akutyola cizuminano cangu, 16 ndiyoomusubula. Ndiyoomuletela mapenzi, malwazi aayambukila akupya mubili ziyoomoofwaazya akumujaya. Muyoosyanga mbuto pele taakwe cibotu ncomuyoobona pe, nkaambo basinkondonyoko bayoomuzunda, nkabela bayoolya coonse eeco ncomwakalima. 17 Ndiyoomufutatila kutegwa mukazundwe, nkabela aabo bamusulide bayoomweendelezya. Muyootija nimutatandwi.
18 “Zyamana zyoonse eezi naa tamukandiswiilili ndiyoomusubulisya mane nkayungizye ziindi zili ciloba akaambo kazinyonyoono zyanu. 19 Ndiyoomanya kulisumpula kwanu. Takukooyooba mvula pe, nkabela nyika yanu iyooyuma ntaa mbuli lubulo. 20 Nikuba kuti mukabeleke buti, tamukajani cintu cibotu pe. Kayi nyika tiikapi maila, amisamu tiikazyali pe.
21 “Kuti naa kamucizumanana kundikaka, njooyungizya cisubulo canu ziindi zili ciloba mbubweelede zinyonyoono zyanu. 22 Njoomutumina banyama babutambo, balo batikajaye bana banu aŋombe zyanu, muyoosyaala buyo bace cakuti migwagwa yanu iyoobundaala.
23 “Alimwi kuti naa cisubulo eeci caakumana, kamutanoondiswiilili pele kamucindisampaula, 24 ambebo njooindilizya kuyungizya cisubulo canu ziindi zili ciloba zibi kwiinda, mbubweelede zinyonyoono zyanu. 25 Ndiyoomuletela nkondo akaambo kakutyola cizuminano cangu. Kuti mukasoleke kulibunga-bunga muminzi yanu akuyuba njootumina cuumo, cakuti muyoolipa kuli basinkondonyoko. 26 Njoosinkila zilyo zyanu cakuti bakaintu bali kkumi bayoojikila mukaoveni komwe zilyo zyoonse nzyobajisi. Bayoopampula, mwaakumana kulya zyoonse mucinooyoofwide nzala.
27 “Pele kuti naa cisubulo eeci caakumana, kamutaswiilili pele kamucinoondikakide, 28 nkaako mubukali bwangu njoomukakila limwi, mebo lwangu ndinooindilizya kuyungizya cisubulo canu ziindi zili ciloba zibi kwiindilila mbubweelede zinyonyoono zyanu. 29 Nzala iyoobbebba kusikila mukalye bana banu balombe abasimbi. 30 Njoonyonyoona masena aamalende aali muzilundu, azipaililo zyoonse mpomutentela tununkilizyo. Njoolundika mitumba yanu amituni yanu. Mukusesemwa kwangu, 31 minzi yanu mipati njooicita matongo, akupwayaula masena aakukombela. Nsikooyoobotelwa mubweema bwazipaizyo zyanu. 32 Njoonyonyoona nyika yanu cakumaninina cakuti basinkondonyoko aabo bayookkala mulinjiyo bayoogambwa kapati. 33 Njoomumwaila mumanyika aambi. Mebo lwangu njoomutandaanya apanga. Nyika yanu iyoobija aminzi yanu iyooba matongo. 34 Nkaako myuunda yanu iyooona nimucili mumanyika aabasinkondonyoko, nkokuti iyoolyookezya ncobeni. 35 Mazuba oonse aayo iyoolyookezya, kulyookezya nkwiyatakajisi ciindi nimwakakkede mulinjiyo.
36 “Lino aabo bali mubuzike njoobazyangamya cakuti tu lyaakuvuuma aluuwo bayootija. Bayootija mbuuli batija nkondo, akuliwida nikunyina uubatanda. 37 Bayoolimbana mukutija nikunyina uubatanda. Aboobo tamukooyookonzya kulwana basinkondonyoko. 38 Muyoofwida mubuzike akuzikkwa mumonya oomo. 39 Pele aabo bayoosyaala bayookotela ooko akaambo kazinyonyoono zyabo beni azyabasikale babo.
40 “Pele kuti bana banu bakalyaambe zinyonyoono zyabo akuzumina azyabasikale babo bakandizangila, 41 cakacita kuti mbakake akubamwaila mumanyika aabasinkondonyina, lino myoyo yabo yacinguni yaakubomba mukuti batakasubulwi akaambo kazinyonyoono zyabo, 42 njooyeeya cizuminano cangu ncitwakasyomezyanya a Jakobo, Izaka a Abulahamu akuyeeya mbwindakasyomezya kuti njoobapa nyika. 43 Pele kusaanguna bantu bagwisigwe munyika kutegwa ilyookezye ibote. Bayoosubulwa akaambo kakusesemwa milawo amalailile aangu. 44 Pele nikuba boobo nibacinoocili munyika yabasinkondonyina, nsikooyoobalekelela nikuba kubanyonyoonena limwi. Nkaambo eeci inga camanya cizuminano cangu ambabo. Ndime Mwami Leza wabo. 45 Njooyeeya cizuminano ncindakapanga abasikale babo aabo mbindakagwisya mu Ijipiti caantangalala kuti mbe Leza wabo. Ndime Mwami Leza.”
46 Lino aaya ngamalailile, milawo amilazyo Mwami Leza njaakapa Mozesi acilundu ca Sinai kuti ape Baisilayeli.