Bapaizi 25
Mwaka waciloba
1 Kucilundu ca Sinai Mwami Leza wakaambila Mozesi kuti aambile Baisilayeli 2 malailile aaya aakuti, “Mwaakunjila munyika Mwami Leza njayoomupa, mutali kuyooilimi nyika mwaka waciloba uuli woonse. 3 Kwamyaka iili cisambomwe kamuyoolima akukwezaula misaansa akutebula. 4 Pele mwaka waciloba mmwaka wakulyookezya, ayalo nyika yanu itakalimwi pe, mwaka uupedwe ku Mwami Leza. Mutakasyangi myuunda yanu nikuba kukwezaula nsaansa zyanu. 5 Mutakatebuli maila aayoolimenena nikuba kucela nsaansa nzimwatakakwezawida pe. Nyika ileelede kulyookezya mwaka ooyo. 6 Lino mumwaka nguwenya ooyo muyoolya zyamakoko, nywebo abazike banu, ababelesi banu, abamasi mbomukkala aabo munyika yanu, 7 abanyama mbomuvubide, abanyama bamusokwe. Kufumbwa makoko oonse mulakonzya kulya mumwaka ooyo.
Mwaka wamakumi osanwe
8 “Lino kwainda myaka iili makumi one afuka, 9 mubuzuba bwakkumi bwamwezi waciloba, buzuba bwacipaizyo cakukombelezezya zinyonyoono, ukatume muntu kuti akalizye mweembo munyika yoonse. 10 Amulemeke mwaka wamakumi osanwe, mukwaambilizya lwaangunuko kubantu boonse bakkala munyika. Mumwaka ooyo lubono loonse lwakauzidwe luboozegwe alimwi kuli mukamwini naa baciinga cakwe. Kufumbwa wakauzidwe mubuzike uyoopilukila kumukwasyi wakwe. 11 Mwaka wamakumi osanwe uyooba walutangalo. Mutakasyangi nikuba kutebula makoko. 12 Uyooba mwaka walutangalo uusalala kulindinywe. Mulakonzya kucela akulya makoko buyo.
13 “Mumwaka ooyo lubono loonse lwakauzidwe luyooboozegwa kuli mukamwini. 14 Nkokuti naa wauzya naa kuula cipaanzi canyika ku Muisilayelinyoko mutacengani pe. 15 Muulo uleelede kubambwa mukweendelana amyaka yasyaala yabutebuzi kuutanasika mwaka walutangalo. 16 Kuti naa myaka kiicili minji, muulo uleelede kukomena, pele kuti naa kakusyeede mice buyo awalo muulo uleelede kuceya, nkaambo kakuti bwauzigwa mbutebuzi bwamyaka mice buyo. 17 Mutacengani pe, pele amulemeke Leza wanu. Ndime Mwami Leza wanu.
18 “Muleelede kutobela malailile akubamba milawo yangu, kutegwa mukkale muluumuno munyika. 19 Eelyo nyika niyoozyala micelo minji, alimwi nimuyoojana zyoonse nzemuyanda kulya akukkala muluumuno.
20 “Pele umwi ulakonzya kukubuzya kuti, Ncinzi ncituyoolya mumwaka waciloba, kayi tatukalimi alimwi tatukatebuli? 21 Njooleleka nyika mumwaka wacisambomwe kuti ikazyalisye zyakulya zimana myaka yotatwe. 22 Nkaako ciindi mwanoosyanga mumwaka walusele, munooyoocijisi zilyo eezyo zizwa kumwaka wacisambomwe. Nkokuti munoojisi zilyo kusikila ciindi cakutebula.
Kujokezya lubono
23 “Nyika yanu tiielede kuuzigilwa limwi, nkaambo tiili yanu pe, njiyangu, nywebo muli babelesi buyo. 24 Naa nyika yauzigwa, wayuuzya ulakonzya kuyuula alimwi. 25 Kuti Muisilayelinyoko kali mucete cakuti wauzya cibeela canyika yakwe, simukowa wakwe uleelede kucinununa kuti cibe cabo alimwi. 26 Kuti naa muntu katajisi uukonzya kumununwida, wamana wavuba cakuti ulakonzya kucinununa mwini, 27 weelede kuziba mweelwe waco kuzwa naakacuuzya, auboozye kuliyooyo nkwaakacuulisizye. Nakonzya kupilukila kulincico. 28 Pele kuti katakonzyi kumuboozezya, ncaakauzya cinooli cayooyo wakaula kusikila mwaka walutangalo. Mumwaka walutangalo ndendilyo nayookonzya kuba mukamwini wini.
29 “Kuti naa muntu waulisya ŋanda iili mukati kalukwakwa, ulakonzya kwiiululula kwainda mwaka kuzwa naakaiuzya. 30 Pele kuti wakacilwa, tiicili yakwe. Caamba kuti ŋanda eeyo njiyayooyo wakayuula alunyungu lwakwe. Nuusika mwaka walutangalo, tiiboozegwi limbi. 31 Pele maanda aatali mukati kalukwakwa ali mbuli myuunda. Alakonzya kuulululwa, akuboozegwa mumwaka walutangalo. 32 Balo Balevi balakonzya kunununa kufumbwa ciindi ncibayanda maanda aali muminzi yabo. 33 Kuti naa ŋanda imwi iili muminzi eeyo yauzigwa a Mulevi, yamana tiiyanununwa iyooboozegwa mumwaka walutangalo. Nkaambo maanda ndubono lwa Balevi mu Baisilayeli. 34 Macelelo aazingulukide minzi ya Balevi taaelede kuuzigwa, nkaambo ndolubono lwabo akutamani.
Kukolotesya bacete
35 “Kuti naa Muisilayelinyoko ngomuzwalimwi kali mucete, cakuti takonzyi kuligwasya, uleelede kumugwasya mbuuli mubelesi wako, kutegwa kacikkede ayebo lyoonse. 36 Utamubbadelesyi cinyona mucila, pele yoowa Leza wako kutegwa simunzinyoko akkale afwiifwi ayebo. 37 Utamukolotesyi kuti ujane mpindu iiindilila, alimwi utamuuzizyi zilyo kuti ujane mpindu. 38 Ndime Mwami Leza wanu, wakamugwisya mu Ijipiti kuti ndimupe nyika ya Kenani, akuti ndibe Leza wanu.
Kwaangununa bazike
39 “Kuti naa Muisilayelinyoko kali mucete cakuti wazoolisisya, yebo utamuciti mbuli muzike pe. 40 Mulele mbuli mubelesi wako buyo, akubelekele kusikila mwaka walutangalo. 41 Muciindi eeco walo abana bakwe bayookusiya akubweeda kumukwasyi wakwe akulubono lwabasikale bakwe. 42 Baisilayeli mbazike ba Mwami Leza nkaambo nguwakabagwisya mu Ijipiti. Tabeelede kuuzigwa mubuzike pe. 43 Toelede kubalela calunya, weelede buyo kuyoowa Leza wako. 44 Kuti naa muyanda bazike baalumi naa bakaintu, muyoobaula kumisyobo iimuzingulukide. 45 Ulakonzya alimwi kuula bana babamasi aabo mbomukkala aabo. Bana aabo bazyalilwa munyika yanu inga lwaba lubono lwanu. 46 Balakonzya kuyookonwa abana bako, bakababelekele abalo muciindi coonse ncebacipona. Pele Baisilayeli tabeelede kubalela calunya.
47 “Kuti naa wamasi wavuba, kwamana Muisilayeli wacetaala cakuti walisisya kuli wamasi ooyo naa kuli umwi wamukwasyi wakwe. 48 Nikuba kuti walisisya ulakonzya kunununwa alimwi. Umwi wabanabokwabo 49 naba simizyaakwe, naba mweenzinyina, naba umwi wamukowa wakwe ulakonzya kumunununa, naba lwakwe mwini kuti wajana mali ulakonzya kulinununa. 50 Pele cibe cakuzuminana ayooyo nkwaakalisisya, uleelede kubala myaka njaakalisisya kusikila kumwaka walutangalo, eelyo muulo wakumunununa ube mbuli kuvola kwamubelesi. 51 Naa kakucili myaka minji, weelede kubbadela mali manji aacinunuzyo. 52 Naa kakusyeede myaka mice buyo kusikila kumwaka walutangalo weelede kubbadela bweelede. 53 Weelede kulangwa mbuli mubelesi, simalelo wakwe atamubedi silunya. 54 Kuti naa taakwe naanununwa munzila eezi zyaambwa, ooyo muntu abana bakwe baleelede kujokela ciindi camwaka walutangalo. 55 Nkaambo Baisilayeli mbazike bangu mbindakagwisya mu Ijipiti. Ndime Mwami Leza wanu.”