Bapaizi 20
Mbobayoosubulwa bataswiilili
1 Lino Mwami Leza wakaambila Mozesi kuti 2 aambile Baisilayeli kuti, “Kuti naa umwi wanu naa wamasi uukkala akati kanu wapaizya mwanaakwe kuli Moleki, uleelede kuumwa mabwe abantu boonse, afwe. 3 Nkaambo kakuti wapaizya umwi wabana bakwe kuli Moleki, wasofwaazya tente lyangu akuubaula zina lyangu lisalala. Mebo ndiyoomufutatila akumukaka kuti tacili muntu wangu pe. 4 Pele kuti naa bantu bamumunzi bamulekelela akutamujaya naapaizya mwanaakwe kuli Moleki, 5 mebo ndemwini inga ndamupa mulandu abamukwasyi wakwe boonse alimwi abaabo bamuccilila mukukomba Moleki. Tabakabi limbi bantu bangu pe.
6 “Alimwi kuti umwi waya kubanjilidwe abaŋanga awalo takabi muntu wangu nkaambo walisofwaazya. 7 Amulipe kuli Leza mmusalale nkaambo mebo ndime Mwami Leza wanu. 8 Amutobele malailile aangu akwaabamba, nkaambo ndime Leza uumusalazya.
9 “Kufumbwa muntu uusinganya wisi naa banyina, ooyo uyoojaigwa alimwi walijazya mwini.
10 “Kuti naa muntu wacita bumambe aabo boonse bobilo, mwaalumi amukaintu baleelede kujaigwa. 11 Mwaalumi uunjila muŋanda yawisi wausisya wisi nsoni. Nkaako boonse bobilo mwaalumi amukaintu bakajaigwe, alimwi balijazya beni. 12 Alimwi muntu uusika mukamwana amubili, boonse bobilo baleelede kujaigwa. Balisofwaazya beni, alimwi balijazya beni. 13 Kuti naa baalumi bacita citaambiki amwaaluminyina mbuli kuti mmukaintu, aabo bacita cisesemya. Nkaako bajaigwe, alimwi balijazya beni. 14 Kuti naa mwaalumi wakwata mukaintu alimwi abanyinazyala, boonse aabo botatwe baleelede kutentwa akufwa, nkaambo bacita citacitwi. Cintu cili boobu taceelede kuba akati kanu pe. 15 Kuti naa muntu woona amunyama, muntu amunyama ooyo bajaigwe. 16 Kuti naa mukaintu waswaangana amunyama, bajaigwe alimwi balijazya beni.
17 “Kuti naa mwaalumi wakwata mucizi wakwe, naba muzaanyina, basampaulwe akutandwa. Ooyo wasofwaazya mucizi wakwe, nkaako ulaamulandu. 18 Alimwi kuti naa mwaalumi waswaangana amukaintu kacili kuciindi cakwe, boonse bobilo batandwe, nkaambo balisofwaazya.
19 “Kuti naa muntu wabasika amubili banyina bamwi, wasofwaazya simukowanyina, alimwi bali aamulandu. 20 Kuti naa mwaalumi wabasika amubili bamukawisi umwi, wausisya wisi nsoni. Bali amulandu nkabela tabakazyali limbi pe. 21 Kuti naa mwaalumi wakakwata mukamunyina aabo balisofwaazya. Wausisya nsoni munyina nkabela tabakazyali pe.
22 “Amutobele milawo yangu amalailile aangu akwaabamba kutegwa nyika eeyo ya Kenani nkwemutola itakamukaki. 23 Mutakatoli ziyanza zyabakunze, aabo mbeyootanda mukuti mukalikkalilile munyika eeyo. Balo balandisesemya aziyanza zyabo zibi nzebacita. 24 Pele ndamusyomezya kuti, ‘Muyootola nyika yabo. Njooipa kulindinywe kuti ikabe yanu, nyika iikunka mukupa abuci. Ndime Mwami Leza wanu nindakamusala kuzwa kumisyobo imwi. 25 Mukaandaanye banyama naa bayuni batasalali mumulawo. Mutakalyi banyama naa bayuni batasalali, nkaambo ndakaambilizya kuti tabasalali. Naa mwabalya mulasofwaala. 26 Muleelede kusalala nkaambo mebo nde Mwami Leza ndasalala. Ndakamusala kuzwa kumisyobo imwi kuti mube bantu bangu beni-beni.’
27 “Kufumbwa mwaalumi naba mukaintu uunjidwe naa uusonda uyooumwa mabwe akufwa, alimwi walijazya mwini.”