Bapaizi 13
Milawo yabulwazi bwacinsenda
1 Lino Mwami Leza wakaambila Mozesi a Aloni 2 wakati, “Kuti naa muntu kajisi kalonda amubili naa cuute naa tubala tukonzya kuba cinsenda, uleelede kuletwa kuli Aloni naa mwanaakwe mupaizi. 3 Mupaizi uyoolanga-langa mubili atulonda, alimwi kuti boya buli acilonda bwatuba akuti naa cilonda kacibbide nkokuti ncinsenda. Eelyo mupaizi aakumana kulanga-langa muntu ooyo, uyooambilizya kuti tasalali. 4 Pele kuti naa cilonda catuba pele kacitabbilide aboya kabutatubi, mupaizi uleelede kumuzandula kuzwa mubantu kwamazuba aali ciloba. 5 Mupaizi uleelede kuyoomulanga-langa alimwi mubuzuba bwaciloba. Kuti naa wajana kuti cilonda cicilimbubonya, alimwi ulamulangilila kwamazuba aali ciloba muntu ooyo kacikkede nkukonya ooko. 6 Mupaizi uleelede kumulanga-langa alimwi kwaakumana mazuba aali ciloba. Kuti naa cilonda kaciya bupona, ulaambilizya kuti ulasalala, cali cilonda buyo. Muntu ooyo uyoosanzya zisani zyakwe eelyo uyoosalala. 7 Pele kuti naa cilonda cayandilila kuzwa ciindi mupaizi naakacilangide akwaambilizya kuti ulasalala, uleelede alimwi kuletwa kumupaizi. 8 Mulimo wakwe wamupaizi ngwakuti amulange-lange. Kuti wajana kuti bulwazi bwakomena, ulaambilizya kuti tasalali, ulaacinsenda.
9 “Lino kufumbwa muntu uuciswa cinsenda uyooletwa kumupaizi, walo 10 uyoomulanga-langa. Kuti kakuli cibala cizimbide cituba cijisi boya butuba 11 inga bulaba bulwazi bwacinsenda. Nkaako mupaizi ulamwaambilizya kuti tasalali, pele atamuzanduli nkaambo wabonwa kuti tasalali. 12 Lino kuti bulwazi bwayandilila mubili woonse kumutwe kusikila kumaulu, 13 mupaizi uleelede kumulanga-langa, kuti wajanwa kuti mubili woonse wayambukilwa, mupaizi ulaambilizya kuti ulasalala kweendelana amulawo. Kuti mubili woonse kuutuba, ulati ulasalala. 14 Pele kuti zilonda kazimonkokede, mupaizi ulaamba kuti tasalali. 15 Nkaambo cilonda cimonkokede citondezya kuti ncinsenda, nkaako mupaizi uleelede kumulangisisya, akwaambilizya kuti tasalali. 16 Pele kuti cilonda cayumya pele lubata kalucituba, muntu ooyo uleelede kuya kumupaizi, 17 walo uyoomulanga-langa alimwi. Kuti naa wamujana kuti zilonda zyayumya, mupaizi ulaambilizya kuti ulasalala.
18 “Lino kuti amubili kakuli cuute cakapona, 19 kwamana cabuka akutuba naa kusalaluka, uleelede kuya kumupaizi. 20 Mupaizi uyoomulanga-langa. Kuti camonkoka akubbila, alimwi kuti boya buli mpawo kabutuba, mupaizi uyooambilizya kuti tasalali. Ncinsenda. 21 Kuti mupaizi wacilanga-langa wajana kunyina boya butuba alimwi tacicizimbide, mupaizi inga wamuzandula kwamazuba aali ciloba. 22 Kuti kaciya buyandilila, mupaizi ulaambilizya kuti tasalali, 23 kuti naa cilonda kacili mbubonya, kacili cibata cacuute, mupaizi ulaambilizya kuti ulasalala.
24 “Kuti naa muntu wapya, kwamana acilonda kwaba kabata katuba, naa kasalaluka, 25 mupaizi uyoomulanga-langa. Kuti wajana kuti boya bulatuba aamonkokede, nkokuti ncinsenda. Nkaako, mupaizi uyooambilizya kuti tasalali, ulaacinsenda. 26 Pele kuti naa boya tiibwasanduka kutuba alimwi tiicamonkoka, mupaizi uleelede kumuzandula kwamazuba aali ciloba. 27 Mupaizi uyoomulanga-langa alimwi mubuzuba bwaciloba. Kuti naa cimonko ciyabuyandilila inga ncinsenda, mupaizi uyooambilizya kuti tasalali. 28 Pele kuti cimonko taciyandilili naa kutubuluka, kazimbide buyo, mupaizi uyooamba kuti ulasalala nkaambo ncilonda buyo.
29 “Kuti mwaalumi naa mukaintu waba aacilonda amutwe naa akalezu, 30 mupaizi uyoocilanga-langa. Kuti wajana kuti camonkoka alimwi boya mbwantuntulwa akuuba, nkokuti ncinsenda, eelyo uyooambilizya kuti tasalali, ulaacinsenda. 31 Kuti naa mupaizi wamulanga-langa, wajana tacibbide alimwi kakunyina boya bubotu, uyoomuzandula kwamazuba aali ciloba. 32 Mupaizi uyoocilanga-langa cilonda alimwi mubuzuba bwaciloba. Kuti taciyandilili, alimwi kacitajisi boya bwantuntulwa, kacitabbide, 33 muntu ooyo akanyoole boya kuzinguluka cilonda. Mupaizi akamuzandule kwamazuba aali ciloba. 34 Alimwi mubuzuba bwaciloba mupaizi uyoomulanga-langa. Kuti naa taciyandilili, alimwi tacibbide, uyoomwaambilizya kuti ulasalala. Muntu ooyo akasanzye zisani zyakwe, kwamana uyoosalala. 35 Pele kuti naa cilonda cayandilila amana kusalazigwa, 36 mupaizi ulamulanga-langa alimwi. Kuti naa cilonda cayandilila, mupaizi teelede kulanga mubala waboya, muntu ooyo tasalali ncobeni. 37 Pele kuti naa mupaizi waziba kuti cilonda tiicayandilila, aboya bubotu kabukula alincico, nkokuti cilonda cilapona, eelyo mupaizi ulamwaambilizya kuti ulasalala.
38 “Alimwi kuti mwaalumi naa mukaintu waba atubala tutuba amubili, 39 mupaizi uleelede kulanga-langa muntu ooyo. Kuti naa mabala kaatatubisyi, ambweni nkutubuluka buyo kwacikanda, muntu ooyo ulasalala.
40-41 “Kuti naa muntu wakuluka masusu kumakosi, nkumo naa katwikkilo, tacaambi kuti tasalali. 42 Pele kuti alubala kwaboneka cilonda, cisalaluka naa citubuluka ncinsenda. 43 Mupaizi uleelede kumulanga-langa, kuti wajana cilonda cisalaluka naa citubuluka, 44 mupaizi ulaambilizya kuti tasalali, nkaambo wajaninwa cinsenda, 45 muntu ulaacinsenda uleelede kusama madelu-delu, teelede kukamuna, alivumbe kumulomo kati, ‘Nsisalali, nsisalali.’ 46 Unookkede lyoonse mbubonya oobo kwaciindi najisi bulwazi oobo, nkabela uleelede kukkala alikke kunze lyazivuka.
Milawo yangubi
47 “Ciindi cisani nicijisi ngubi, niciba caboya, niciba cabutonje, 48 citungidwe, niciba cilukidwe, niciba candeketela, niciba cacikutu, 49 kuti kiili yanyanzabili naa kusalaluka tacisalali. Cileelede kutondezegwa kumupaizi. 50 Lino mupaizi ulacilanga-langa akucizandula kwamazuba aali ciloba. 51 Alimwi ulacilanga mubuzuba bwaciloba. Kuti cajanika kuti yayandilila, cintu eeci tacisalali. 52 Nkabela mupaizi ulacitenta cisani eeco nkaambo yalikuyandilila.
53 “Kuti mupaizi wajana kuti tiiyayandilila, 54 ulalailila kuti cisani cisanzigwe akuzandulwa kwamazuba aali ciloba. 55 Pele kuti naa mupaizi wacilanga-langa, amana wajana kuti ngubi tiiyazwa nikuba kuti tiiyayandilila tacisalali. Uleelede kucitenta. 56 Kuti naa wajana kuti ngubi yatubuluka-tubuluka, mupaizi uleelede kwiitenda kuzwa kucisani naa cikutu. 57 Alimwi kuti ngubi kiicilibonya akuyandilila, ulaaco uleelede kucitenta. 58 Kuti naa wacisanzya, kabala kazwa, uyoocisanzya alimwi, eelyo ciyoozuminwa kuti casalala.
59 “Ooyu ngomulawo wangubi yacisani naa ncaboya, niciba candeketela, niciba cisani cili buti, niciba cacikutu, mukuti cizibwe naa cilasalala naa pe.”