Bapaizi 12
Kusalazigwa kwabatumbu
1 Lino Mwami Leza wakaambila Mozesi kuti, 2 “Ambila Baisilayeli kuti ciindi mukaintu natumbuka mwana mulombe tanoosalali kwamazuba aali ciloba, mbubonya mbuli mbwatasalali nali kuciindi cakwe. 3 Nkabela mubuzuba bwalusele mwana uleelede kupalulwa. 4 Alimwi mukaintu ulalindila kwamazuba aali makumi otatwe amazuba otatwe kuti akasalazigwe kubutumbu bwakwe. Teelede kujata cintu cimwi cisalala naa kunjila mutente lyakuswaanganina. 5 Kuti naa watumbuka mwana musimbi, takoonoosalala kwamazuba aali kkumi aane mbubonya mbuli mbwatasalali nali kuciindi cakwe. Kwamana uleelede kulindila kwamazuba aali makumi aali cisambomwe kuti akasalazigwe kubutumbu bwakwe.
6 “Ciindi cakusalazigwa camana buyo, camwana mulombe naa musimbi, uyooleta kabelele kumupaizi kamwaka omwe kumulyango watente lyakuswaanganina, kabelele aaka kabe kacipaizyo cakutenta. Alimwi aletelezye ankwilimba niiba nziba yacipaizyo cakugwisya cinyonyoono. 7 Nkabela mupaizi uyoopa zipaizyo eezyo ku Mwami Leza akucita zeezyo zyeelede kuti asalazigwe. Nkaako uyoosalazigwa ncobeni. Ooyu ngomulawo wamukaintu watumbuka mwana mulombe naa musimbi.
8 “Kuti naa mukaintu kali mucete cakuti takonzyi kuleta mbelele, ulaleta nziba zyobilo niziba nkwilimba zyobilo, imwi njacipaizyo cakutenta, imwi njacipaizyo cakugwisya cinyonyoono. Lino mupaizi akacite zeezyo zyeelede kuti asalazigwe. Nkaako uyoosalala ncobeni.”