Bapaizi 11
Banyama beelede kulya
1 Njeeyi milawo Mwami Leza njaakapa kuli Mozesi a Aloni 2 kwaamba zya Baisilayeli. Wakati, “Mulakonzya kulya munyama uuli munyika 3 ooyo uujisi nsumba zyaandeene uuselula. 4-6 Pele tamweelede kulya nkamela, cibila, asulwe. Aaba tabasalali nikuba kuti balaselula, nkaambo tabajisi nsumba zyaandeene pe. 7 Tamweelede kulya ngulube, taziseluli. 8 Alimwi mutabalyi banyama aaba nikuba kuguma mitunta yabo, mbanyama batasalali. 9 Alimwi mulakonzya kulya zyamumaanzi zijisi maamba atuyambyo. 10 Pele zintu zyoonse zyamumaanzi zitajisi maamba atuyambyo mutalyi pe. 11 Eezi zilatondwa, taziligwi pe, amitunta yazyo tiijatwi. 12 Tamweelede kulya cintu coonse cikkala mumaanzi citakwe tuyambyo amaamba, nkaambo cilatondwa. 13 Bayuni basofweede mbomuteelede kulya mbaaba: sikwaze, sikube, cuungwe, 14 bimbe, luunga abalubanze bamisyobo-misyobo, 15 nuuba musyobo uuli buti wacikwaangala, 16 impye, sikusiku, nkolekole, basikakooze bamisyobo-misyobo, 17 tumba, cibengelele, siyaswimuumba, 18 kakukubwi, sifundwe, simusika, 19 tongola, masyulamiyobe aamisyobo-misyobo, ŋangayabayuni, akampaafwa, boonse aaba balatondwa.
20 “Atuuka toonse tuuluka mumakata-makata tatusalali. 21 Mweelede buyo kulya tujisi myeendo yone, tusotooka. 22 Mulakonzya kulya cikwikwi, nswabanda, camusokonya nsonzi amisyobo yazyo. 23 Pele tuuluka toonse tujisi maulu tulatondwa.
24-28 “Lino kufumbwa uuyooguma mitunta yabanyama aaba uyoosofwaala mane kusikila kuciindi camangolezya. Alimwi kufumbwa uyoobweza mitunta yabo uleelede kusanzya zisani zyakwe, pele nikubaboobo tatisalale kusikila ciindi camangolezya. Banyama boonse bajisi nsumba, ccita kabajisi nsumba zyaandeene akuselula, abanyama bajisi myeendo yone beenzya zifumba, balatondwa mbubonya buyo. 29 Banyama baniini batondwa mbaaba: silufukwe, mbeba, banabulwe bamisyobo-misyobo, 30 syaazibumbu, mbulumusanza, ntombela, kkulumusi, alimwi analuntaambwe, 31 kufumbwa uuguma niiba mitunta yazyo takooyoosalala kusikila kumangolezya. 32 Kuti naa mitunta yazyo yawida acintu cimwi, acalo tacisalali pe. Eeci cilajatikizya nkuni, cisani, cikutu, saka, taakwe makani naa cibelesegwa mulimo nzi. Ceelede kunyikwa mumaanzi, pele tacinoosalali kusikila kumangolezya. 33 Kuti naa zyawida acibiya, azili mumo zyoonse inga tazicisalali pe, aboobo cibiya eeco cileelede kupwaigwa. 34 Maanzi mucibiya eeco kuti atilwa muli cakulya, inga cakulya eeco casofwaala, alimwi cakunywa cili mucibiya eeco tacisalali pe. 35 Acimbi cawidwa mutunta ooyo inga tacisalali. Cikaye naa oveni ceelede kupwaigwa. 36 Pele kasensa naa citelekezezyo cinoosalala, kufumbwa buna zintu zyaguma mitunta eeyo inga tazisalali. 37 Pele kuti naa cimwi cawida ambuto yakusyanga, mbuto eeyo inoosalala. 38 Pele kuti naa mbuto inyikidwe mumaanzi yawidwa mutunta tiicisalali pe.
39 “Kuti naa munyama uuligwa walifwida, kufumbwa wamuguma inga wasofwaala kusikila kumangolezya. 40 Nkabela kuti naa kuli umwi walya umwi wabanyama aabo, uleelede kusanzya zisani zyakwe, pele nikuba boobo tanoosalali kusikila kumangolezya. Alimwi naa umwi wabweza mutunta, uleelede kusanzya zisani zyakwe, pele unoocisofweede kusikila kumangolezya.
41 “Tamweelede kulya zilenge zyeenda ansi, 42 taakwe makani naa zilakalaba, zileenda amaulu one, naa kwiindilila waawo. 43 Mutazilyi mulasofwaala. 44 Ndime Mwami Leza wanu, muleelede kusalala, nkaambo ndasalala. 45 Ndime Mwami Leza wakamugwisya mu Ijipiti kuti ndibe Leza wanu, Muleelede kusalala, nkaambo mebo ndasalala.
46 “Lino eeyi njemilawo yabanyama, bayuni, azyoonse zyamumaanzi, azikalaba. 47 Mucenjele kapati kuti mwaandaanye akati kazisalala azitasalali, akati kabanyama baligwa abataligwi.”