Bapaizi 10
Cinyonyoono ca Nadabu a Abihu
1 Lino bana ba Aloni ba Nadabu a Abihu, umwi aumwi wakabweza cikaye cakwe, babikka makala aamulilo mulinzizyo, alimwi bakabikka atununkilizyo, akuzitentela Mwami Leza. Pele cipaizyo eeci Mwami Leza taakacilailila pe. 2 Mpoonya aawo Mwami Leza wakatuma mulilo, ooyo wakabatenta, bafwa nkukonya ooko kumbele lya Mwami Leza. 3 Lino Mozesi wakaambila Aloni kuti, “Eeci ncicakali kwaamba Mwami Leza naakati, ‘Boonse bayanda kundimanina mulimo baleelede kuyoowa bulemu bwangu busalala. Ime lwangu ndeelede kulemekwa abantu.’” Pele Aloni taakwe ancaakaingula pe.
4 Mpawo Mozesi wakaita Misyaeli a Elizafani, bana ba Uziyeli, wisi musyoonto Aloni, wakabaambila kuti, “Kamuza kuno muzootole mitumba yabasazinyoko, mubagwisye mubusena busalalisya bwatente lya Leza, mwiibikke anze lyazivuka.” 5 Nibakamvwa boobo, bakasika babaputaila bababweza akubagwisizya anze lyazivuka, mbuli Mozesi mbwaakalailila.
6 Alimwi Mozesi wakaambila Aloni abana bakwe, Eliyazaa a Itamaa kuti, “Mutazapauli zisani zyanu nikuba kuleka kulikamuna kutondezya kuti mujisi dilwe. Kuti naa mucite oobo mulafwa, alimwi Mwami Leza ulanyemena bantu boonse. Pele basazinyoko abantu boonse Baisilayeli balakonzya kulila akaambo kabaabo Mwami Leza mbaanyonyoona amulilo. 7 Mutazwi amulyango watente lyakuswaanganina, kuti muzwe mulafwa ncobeni, nkaambo mwakananikwa amafuta aa Mwami Leza.” Nkaako bakacita mbubonya mbuli Mozesi mbwaakabalailila.
Milawo ya bapaizi
8 Mwami Leza wakaambila Aloni kuti, 9 “Yebo abana bako tamweelede kunjila mutente lyakuswaanganina kamunywide waini noziba zikola zimwi. Kuti mukacite oobo, muyoofwa. Ooyu ngomulawo ngomweelede kubamba mumazyalani aanu oonse. 10 Muleelede kwaandaanya akati kazintu zisalala azyabuntunsi, alimwi azisofweede azyeelede kupaizya. 11 Muleelede kwiisya Baisilayeli milawo yoonse njendakamupa kwiindila muli Mozesi.”
12 Alimwi Mozesi wakaambila Aloni abana bakwe bobilo basyeede, Eliyazaa a Itamaa, kuti, “Amubweze maila aasyaala mupe cipaizyo cakutenta ku Mwami Leza, amupange cinkwa citakwe mimena, mwamana mukacilide kumbali aacipaililo, nkaambo cipaizyo eeci cilasalala kapati. 13 Mucilide kubusena busalala, ncipaanzi cako abana bako cizwa kucipaizyo cacakulya cipedwe ku Mwami Leza. Mbombuboobu Mwami Leza mbwaakalailila. 14 Pele yebo amukwasyi wako woonse inga mwalya kaango akuulu acibelo zipego zyazumbaanywa ku Mwami Leza. Mulakonzya kuzilida buyo mubusena busalala. Zipaizyo eezi zyapegwa nduwe abana bako mbuli cipaanzi cacipaizyo calumvwano cipa Baisilayeli. 15 Bayookuletela cibelo akaango mbuli cipego cazumbaanywa ciindi baakupa mafuta mbuli cipaizyo cacakulya ku Mwami Leza. Eezi zipaanzi nzizyako abana bako lyoonse, mbuli Mwami Leza mbwaakalailila.”
16 Lino Mozesi naakabuzya zyampongo yacipaizyo cakugwisya zinyonyoono, wakaambilwa kuti yatentwa kale. Mpawo wakanyemena Eliyazaa a Itamaa kapati, eelyo wakaambisya kuti, 17 “Nkaambo nzi nimwatalida cipaizyo eeci mubusena busalala? Ncilyo cisalala Mwami Leza ncamupa kuti mulye, mukuti milandu yabantu ilekelelwe. 18 Mbuli mbumwatila bulowa bwayo mubusena busalala, mweelede kulya cipaizyo mumonya oomo, mbuli mbondakamulailila.”
19 Lino Aloni wakaingula wakati, “Ulizi kale zyandicitikila. Bantu bapa cipaizyo cakugwisya zinyonyoono acipaizyo cakutenta ku Mwami Leza sunu. Sena Mwami Leza naabotelwa nindalya nyama yacipaililo eeci sunu?” 20 Mozesi naakamvwa boobu wakalamwa.