Bapaizi 1

Milawo yazipaizyo zyakutenta

¹ Lino Mwami Leza wakaita Mozesi kuzwa mutente lyakuswaanganina akuti, ² “Ambila Baisilayeli kuti, ‘Kufumbwa muntu uuleta cipaizyo kuli Leza, uleelede kusala ŋombe naa mbelele kuzwa kubutanga.’

³ “Kuti muntu wapa ŋombe yakwe kuti itentwe acipaililo, uleelede kuleta poho uutakwe kampenda. Uleelede kumutola kumulyango watente lyakuswaanganina kutegwa muntu ooyo Mwami Leza amutambule. ⁴ Alimwi akabikke janza lyakwe amutwe wapoho, mbombuboobu mbwayootambulwa kuti cibe cipaizyo cigwisya milandu yazinyonyoono zyakwe. ⁵ Kwamana uleelede kujaya poho nkukonya ooko, kumbele lya Leza, eelyo bana ba Aloni bapaizi bakatambule bulowa akubutola ku Mwami Leza alimwi akubusansaila kumabazu oonse aali one aacipaililo cili kumulyango watente lyakuswaanganina. ⁶ Eelyo mukamwini akamufunde akumutendaula zituli-zituli, ⁷ balo bana ba Aloni mupaizi bayoobamba nkuni zyamulilo acipaililo akukutula mulilo ali ncico. ⁸ Ndendilyo nibayoobikka zituli eezyo, kubikkilizya amutwe antoomwe amafuta amulilo uuli acipaililo. ⁹ Walo muntu ooyo asanzye zyamukati amaulu aapoho ooyo, kwamana mupaizi uyootenta zyoonse acipaililo, zibe bweema bubotelezya ku Mwami Leza.

¹⁰ “Pele kuti naa muntu wapa imwi yambelele naa mpongo yakwe, kuti ibe cipaizyo cakutenta, weelede kuba sijembwe uutakwe kampenda. ¹¹ Alimwi weelede kumujaila kulubazu lwakunyika lwacipaililo, kumbele lya Mwami Leza eelyo bana ba Aloni bapaizi bakasansaile bulowa kumabazu oonse one aacipaililo. ¹² Lino muntu ooyo aakumana kutendaula zituli zyanyama, mupaizi uyoozibikka kubikkilizya amutwe amafuta amulilo uuli acipaililo. ¹³ Muntu ooyo akasanzye zyamukati antoomwe amaulu aamunyama ooyo, kwamana mupaizi uyootenta zyoonse acipaililo, zibe bweema bubotelezya ku Mwami Leza.

¹⁴ “Kuti naa muntu wapaizya muyuni kuti atentwe kuli Leza, ileelede kuba nziba naa nkwilimba. ¹⁵ Nkabela mupaizi akaitole kucipaililo, akosole nsingo akutenta mutwe wayo acipaililo. Lino bulowa bwayo bukazwide kumbali aacipaililo. ¹⁶ Alimwi uleelede kugwisya ciyangilo amapepe aayo, akuzisowela kujwe lyacipaililo ooko kubikkwa twe. ¹⁷ Lino akajate mababa aayo akuyaandaula katagwisyi mababa, kwamana akiitente amulilo uuli acipaililo, ibe cipaizyo cabweema bubotelezya ku Mwami Leza.”