Baloma 8
Zyabuumi mu Muuya Uusalala
1 Lino taakwe mulandu kulibaabo basyoma muli Kilisito Jesu. 2 Nendisololelwa a Muuya Uusalala uuleta buumi muli Kilisito Jesu, ndaangununwa kukusololelwa azinyonyoono zileta lufu. 3 Eezyo Mulawo nguzyakakacilwa, nkaambo kakuti bukkale bwabantu bwakali kuulesya, Leza wakazicita, wakazicita naakatuma Mwanaakwe mumubili uuli mbuli wesu tobantunsi kuti azunde zinyonyoono. 4 Leza wakanyonyoona nguzu zyabubi mulindiswe kuti zyaamba Mulawo zilondoke mulindiswe. Nkaako tatweendi mbuli bantunsi, pele tulasololelwa a Muuya Uusalala. 5 Nkaambo bantunsi bayanda zyaansi, pele aabo basololelwa a Muuya babikka myoyo yabo ali zeezyo ziyanda Muuya. 6 Kubikka moyo azintu zyaansi ndufu, pele kubikka moyo kuli zeezyo ziyanda Muuya ciletela buumi aluumuno. 7 Babikka myoyo kuli zyaansi mbaasinkondonyina Leza. Tabateeleli Mulawo wa Leza, masimpe tabakonzyi. 8 Bantunsi tabakonzyi kubotezya Leza pe.
9 Nywebo tamuli mbuli bantunsi, mulasololelwa a Muuya, kuti naa Muuya wa Leza muuli mulindinywe ncobeni. Kufumbwa muntu uutajisi Muuya wa Kilisito, tali wakwe pe. 10 Naa Kilisito kali mulindinywe, nikuba kuti mibili yanu ilifwide nkaambo kazinyonyoono, myuuya yanu ilaabuumi, mukuti Leza wakamwaamba kuti muli balulami. 11 Naa kuti Muuya wa Leza wakabusya Jesu kuzwa kubafu uli mulindinywe, nkokuti Leza wakabusya Kilisito Jesu kuzwa kubafu uyoobusya mibili yanu iifwa kwiindila mu Muuya wakwe uuli mulindinywe.
12 Nkaambo kaako, nobakwesu, tulijisi mulimo, pele kutali wakutobezya zisusi zyesu. 13 Naa kamupona mukutobezya zisusi muyoofwa. Pele kuti kwiindila mukugwasigwa a Muuya mwasiya zisusi zyanu, muyoopona. 14 Nkaambo aabo boonse basololelwa a Muuya Uusalala mbana ba Leza. 15 Muuya ngumwakatambula tuumuciti bazike kuti kamuyoowa alimwi pe, pele umucita kuti mube bana. Alimwi nguupa kuti tukombe kuti, “Abba, Taata.” 16 Muuya mwini ulazuminana amyoyo yesu noiti tuli bana ba Leza. 17 Lino kuti katuli bana ba Leza, tuyootambula cikono, iiyi cikono cizwa kuli Leza, uyootukonya antoomwe a Kilisito. Kufumbwa kuti katupenga mbuli Kilisito, tuyootambula bulemu mbuli bwakwe.
Zyazileleko ziboola
18 Ino mapenzi ngotujisi mazuba aasunu ninzi kweelanya abulemu Leza mbwayootuyubunwida! 19 Zilenge zyoonse zilisukeme kulindila kuyubununwa kwabana ba Leza. 20 Nkaambo kaako zilenge zyoonse zyakasweeka, kutali mukuyanda kwazyo pe, pele nkaambo kayooyo wakayanda kuti cibe boobo. 21 Pele kwakali lusyomo lwakuti zilenge eezi ziyooangununwa kubuzike bwakubola akuyootambula bulemu alwaangunuko mbuli bana ba Leza. 22 Tulizi kuti kusikila sunu zilenge zyoonse zilapenga maciswe mbuli mukaintu naamyongwa. 23 Tazili zilenge buyo zilikke zipenga boobu, pele aswebo notujisi Muuya, uuli ncecipego citaanzi ca Leza, tulapenga kapati. Ciindi coonse tulindila kuti Leza atununune akututambula mbuli bana bakwe. 24 Nkaambo mululangilo oolu twakafutulwa. Pele kuti twacibona aameso eeco ncotulangila, ino tujisi lulangilo nzi? Ani nguni uulangila ceeco ncabwene aameso? 25 Kuti katulangila eezyo nzyotutanabona, tweelede kuzilindila amoyo uukkede.
26 Mbuli mbotuzi, Muuya ulatugwasya. Tuli bateteete, tatuzi mbotweelede kukomba. Ncenciceeco Muuya ncuutukombela kuli Leza, kukombelezya amajwi aataambiki. 27 Nkabela Leza uuzi zyamumyoyo yabantu ulizi kale nzyakombelezezya Muuya. Nkaambo Muuya ukombela bantu ba Leza mbuli buyanda Leza.
28 Kayi tulizi kuti Leza zintu zyoonse uzyeenzya kabotu kulibaabo bamuyanda, nkokuti kulibaabo mbaakaita mumakanze aakwe. 29 Nkaambo aabo mbaakazibila limwi wakabasala kuti bakabe mbuli Mwanaakwe mukuti akabe mutaanzi kuli babunyina banji. 30 Lino aabo Leza mbaakasala mbambabaabo mbaakaita. Eelyo aabo mbaakaita mbambabaabo mbaakaamba kuti mbalulami. Eelyo aabo mbaakaamba kuti mbalulami mbambabaabo mbaakapa bulemu.
Zyaluyando lwa Leza muli Kilisito Jesu
31 Ino twaambe buti amakani aaya? Naa Leza kali aandiswe, ino nguni uukonzya kutulwana? 32 Leza wakasanga Mwanaakwe mwini, nkabela wakamwaaba nkaambo kesu. Ino inga wakacilwa buti kutupa zintu zyoonse antoomwe anguwe? 33 Nguni uunga wabapa mulandu basale ba Leza? Leza wakabaamba kale kuti mbalulami. 34 Ani nguni uukonzya kubazula? Teensi Kilisito Jesu wakafwa, iiyi, twaambe kuti wakabusigwa. Ngonguwe muumi uuli kululyo lwa Leza akutukombelezezya. 35 Nguni uukonzya kutwaandaanya kuluyando lwa Kilisito? Sena mapenzi naaba makatazyo, ambweni mafwabi, niiba nzala, nibuba bucete, niziba ziyoosya, nikuba kujaigwa? 36 Kayi Malembe alati,
“Nkaambo kanduwe balayanda kutujaya mazuba oonse.
Batulanga mbuli mbelele zibambilidwe kujaigwa.”
37 Nitupenga boobo, masimpe tulizundide nkaambo ka Kilisito uutuyanda. 38 Nkaambo ndisinizizye kuti taakwe cintu cikonzya kutwaandaanya kuluyando lwa Leza. Niluba lufu, nibuba buumi, nibaba bangelo, nibaba basimalelo, niziba zintu zyasunu naa ziciyooboneka, niziba zyanguzu zili buti, 39 niziba zintu zyakujulu niziba zyaansi aano, niciba cilenge cili buti coonse, taakwe cintu niciba comwe cikonzya kutwaandaanya kuluyando lwa Leza ndotujisi muli Kilisito Jesu Mwami wesu.