Baloma 7
Cikozyanyo calukwatano
1 Nobakwesu, ndikananina ndinywe nomuzi Mulawo. Mulizi kabotu-kabotu kuti Mulawo ujatikizya baabo bapona balikke. 2 Aboobo mukaintu uukwetwe ulaangidwe amulawo walukwatano ciindi mulumaakwe nacipona. Pele naa mulumaakwe wafwa, waangunuka kumulawo ooyo. 3 Ncenciceeco mukaintu uukwetwe ncategwa ngusimamambe naa weenda aumbi mulumaakwe kacipona. Naa mulumaakwe wafwa, waangunuka kumulawo walukwato, aboobo naa wakwatwa inga tategwa ngusimamambe.
4 Mbubonya oobo, nobakwesu, anywebo mwakafwa kwaamba zya Mulawo akuba zizo zyamubili wa Kilisito wakabusigwa kuzwa kubafu. Nkaambo kaako atubelekele Leza milimo mibotu. 5 Nitwakacili kupona mbuli bantunsi, zisusi zyakayumizigwa a Mulawo zyakali kukomena mulindiswe, eelyo zyakazyala lufu. 6 Pele ono twaangunuka ku Mulawo, iiyi, twakafwa kwaamba zya Mulawo wakatwaangide. Lino Muuya Uusalala ulatugwasya kubelekela Leza munzila mpya, kuleka nzila yakaindi yakwiide kubamba Mulawo uulembedwe.
Zya Mulawo acinyonyoono
7 Ino twaambe buti? Sena Mulawo ngwacinyonyoono? Peepe! Kayi Mulawo nguwakandizibya cinyonyoono. Nkaambo nindatalizi bubi bwabbivwe, Mulawo niwatakati, “Utabi sibbivwe.” 8 Nkaambo kumulawo ooyu cinyonyoono cakaabonena ciindi cakuyumya zyabbivwe mulindime. Kuti kakunyina Mulawo, kunyina cinyonyoono. 9 Ime kaindi ndakali kupona cipone-pone, pele nindakaziba cili mu Mulawo, ndendilyo zibi nizyakabbutumuka, eelyo ndakafwa. 10 Lino Mulawo ooyo ngoonya wakeelede kuletela bantu buumi, mebo wakandiletela lufu. 11 Nkaambo cinyonyoono cakaabonena mu Mulawo, eelyo kwiindila mu Mulawo cakandicenga akundijaya. 12 Mulawo wakapegwa a Leza, aboobo Mulawo uuli oonse ulasalala, uliluleme, alimwi mubotu.
13 Sena cintu cibotu eeci ncicakandiletela lufu? Peepe! Pele zinyonyoono nzizyakandijaya mukubelesya cintu eeci kuti cinyonyoono ciboneke mbocibede. Aboobo mu Mulawo, zinyonyoono zibijila limwi.
Kulwana kwamumuntu
14 Tulizi kuti Mulawo ngwazintu zyamuuya. Pele mebo ndimuntunsi, ndimuzike wazinyonyoono. 15 Nsizi ncecitila zeezyo nzyecita. Nkaambo nsiciti zeezyo nzeyanda kuti ncite pe, pele eezyo nzyesulaikide nzyecita. 16 Kuti naa nkepenzegwa azinyonyoono eezyo nzyecita, caamba kuti Mulawo uliluleme. 17 Endime eencita zibi nzyecita pe, pele zinyonyoono zili mulindime nzyezindicitya. 18 Ndilizi kuti mulindime ndemuntunsi munyina cibotu pe. Nikuba kuti ndiyanda kucita zibotu, pele nsiziciti pe. 19 Zibotu nzyeyanda kuti ncite, nsiciti. Pele zibi nzyetayandi kuti ncite, nzyecita. 20 Naa nkecita eezyo nzyetayandi kucita, nsilindime eenzicita, pele nzinyonyoono zili mulindime zindicitya.
21 Aboobo ndijana kuti cicitika ncakuti, neyanda kucita zibotu inga azyalo zibi zili aandime. 22 Ndabotelwa a Mulawo wa Leza amoyo uumaninide. 23 Pele ndilizi kuti mulindime muli moyo uumbi uulwana ayooyo uubotelwa a Mulawo wa Leza. Moyo umwi ooyo uutobela nzila yazinyonyoono, nguwandicitya kuti ndibe muzike wazinyonyoono. 24 Maawe! Nde mucaangu! Nguni uutindivune kubukkale oobu bunditola kulufu? 25 Aalumbwe Leza wandivuna muli Jesu Kilisito Mwami wesu! Cili bobuya: mebo lwangu njanda kutobela Mulawo wa Leza amoyo omwe, pele amubili wangu njanda kutobela nzila yazinyonyoono.