Baloma 6

Zyakuba abuumi muli Kilisito

¹ Lino twaambe buti? Sena inga tulati katubisya buyo kutegwa luse lwa Leza luvule kapati? ² Peepe! Ino swebo notufwide mukuti tatutobeli nzila yazinyonyoono inga twazumanana buti kukkala mukucita zibi? ³ Sena tamuzi kuti swebo toonse twakaba umwi a Jesu Kilisito nitwakabbapatizigwa? Mulubbapatizo twakatambula zileleko zyalufu lwakwe. ⁴ Aboobo cili mbuli kuti twakafwa akuzikkwa anguwe kubafu anguzu zyawisi, mbubonya oobo aswebo tweende mubuumi bupya.

⁵ Naa twakaba umwi a Kilisito mulufu lwakwe, mbubonya oobo tuyooba anguwe mukubusigwa kwabafu mbuli mbwaakabuka walo. ⁶ Tulizi kuti buntunsi bwesu bwakaloba naakakankaminwa aciingano kuti bukkale bwesu bubi bunyonyoonwe aboobo tutabi limbi bazike bazinyonyoono. ⁷ Nkaambo muntu wafwa, waangunuka kunguzu zyazinyonyoono. ⁸ Naa twakafwa a Kilisito tulasyoma kuti tuyooba abuumi antoomwe anguwe. ⁹ Tulizi kuti Kilisito wakabuka kubafu alimwi tacifwi limbi pe. Lufu lucinyina nguzu kulinguwe. ¹⁰ Wakafwida zinyonyoono lomwe buyo, eelyo zinyonyoono tazicijisi nguzu kulinguwe. Buumi mbwapona ubupa kuli Leza. ¹¹ Mbubonya oobo anywebo mulifwide kuzinyonyoono, pele mulapona kuli Leza muli Kilisito Jesu Mwami wesu.

¹² Nkaambo kaako mutazumizyi zinyonyoono kuti zyeendelezye mibili yanu iifwa, alimwi mutaccilili zisusi zyayo. ¹³ Mutabelesyi cimwi cazizo zyanu kuzibi. Pele mulipe kuli Leza mbuli bantu bakazwa mulufu kuya mubuumi. Amubelesye zizo zyanu mukucitila Leza zyabululami. ¹⁴ Kuzwa ono cinyonyoono tacili aanguzu kulindinywe, nkaambo ceendelezya buumi bwanu tuuli Mulawo pe, pele nduse lwa Leza lutaambiki.

Tuli babelesi ba Kilisito

¹⁵ Ino twaambe buti? Sena tucite zinyonyoono, nkaambo tatuceendelezegwi a Mulawo pele aluse lwa Leza? Embo pe! ¹⁶ Kuti walyaaba mbuli muzike kuli umwi, uleelede kumuswiilila. Naa muli bazike bazinyonyoono muyoofwa, pele naa mwabelekela Leza muyooba balulami. ¹⁷ Ncobeni mwakali bazike bazinyonyoono, pele tulalumba Leza nkaambo mazuba aano mulaswiilila amoyo oonse njiisyo zyakasimpe nzimwakaiisigwa. ¹⁸ Lino mwavunwa kuzwa muzinyonyoono mwaba batwanga babululami. ¹⁹ Ndamupa cikozyanyo eeci kuti ambweni mbomuli ndinywe nimwatamvwa. Kaindi mwakalilipede lwanu mukucita zisofweede azibi zimwi zili boobo. Mbubonya oobo amulipe lino kuti mubelekele Leza akucita ziluleme zitondezya busalali bwanu.

²⁰ Nimwakacili bazike bazinyonyoono, tiimwakali kucita ziluleme. ²¹ Ino lino mbulumbu nzi mbomwakajana nimwakali kucita zintu eezyo zimufwisya nsoni mazuba aano? Nkaambo mamanino aazeezi ndufu. ²² Pele lino mbumwakavunwa kuzwa kuzinyonyoono, mubelekela Leza. Bulumbu bwanu mbusalali, eelyo mamanino mbuumi butamani. ²³ Bulumbu bwazinyonyoono ndufu, pele Leza ncapa buyo mbuumi butamani muli Kilisito Jesu Mwami wesu.