Baloma 5

Leza mbwaamba bantu kuti mbalulami

¹ Lino nkaambo kakuti Leza watwaamba kuti tuli balulami akaambo kalusyomo, kuli luumuno akati ka Leza andiswe. ² Mwami wesu Jesu Kilisito nguwakatujalwida nzila yakuti kwiindila mulusyomo Leza atufwide luzyalo motubede sunu. Aboobo tulatangala kuti tuyooabilwa bulemu bwa Leza. ³ Kutali boobo buyo pe, pele tulakondwa nikuba kuti tulapenzegwa, nkaambo tulizi kuti mapenzi ngaaiisya lukakatilo. ⁴ Alwalo lukakatilo ndolupa bukkale butambulika kuli Leza, eelyo bukkale oobu mbobutupa lulangilo. ⁵ Lulangilo oolu lulatuyumya nkaambo tulizi kuti Leza ulatuyanda citaambiki kwiindila mu Muuya Uusalala ngwatupa.

⁶ Nitwakacili bateteete, muciindi ceelede, Kilisito wakatufwida swebo tobasizinyonyoono. ⁷ Tulizi kuti nciyumu kuti muntu afwide umwi nikuba kuti abe mululami buti. Ambweni kuti kali sicamba inga ulafwida siluzyalo. ⁸ Pele Leza ulatondezya luyando lwakwe lupati cakuti katucili basizinyonyoono Kilisito wakatufwida. ⁹ Lino mbuli mbotwaambwa kuti tuli balulami kwiindila mulufu lwakwe, masimpe tulizi kuti Kilisito uyootufutula kuzwa kucisubulo cabukali bwa Leza. ¹⁰ Swebo twakali basinkondonyina Leza, pele lufu lwa Mwanaakwe lwakatuyanzanya anguwe. Lino mbulwakatuyanzanya boobo twafutulwa abuumi bwakwe. ¹¹ Kutali boobo buyo pe, pele tulatangala muli Leza nkaambo ka Mwami wesu Jesu Kilisito, watuyanzanya a Leza.

Zya Adamu a Kilisito

¹² Lino bubi bwakaza munyika akaambo kamuntu omwe buyo, eelyo bubi oobo bwakaleta lufu. Mbubonya oobo alwalo lufu mbolwakasika kubantu boonse, nkaambo kakuti boonse bakabisya. ¹³ Ncobeni bubi bwakaliko munyika Leza katanapa Mulawo, pele aatakwe mulawo, zibi tazibalwi pe. ¹⁴ Nikuba boobo kuzwa ciindi ca Adamu kusikila kuli Mozesi bantu bakali kufwa, abaabo batakacita cibi cili mbuli cakacita Adamu eeco ncaakalaililidwe kutacita. Lino Adamu wakeelezegwa ayooyo Leza ngwaakati uyooboola. ¹⁵ Pele cipego ca Leza tacikozyanyi acibi ca Adamu pe. Bantu boonse balafwa akaambo kakubisya kwamuntu omwe buyo, pele luse lwa Leza alimwi acipego cakwe zilainda ncobeni nkaambo zilaletela bantu boonse zileleko. Cipego eeco Leza ncaakapa ngu Jesu Kilisito. ¹⁶ Alimwi kuli kwiindanya akati kacipego eeco ca Leza akubisya kwamuntu uulya. Akaambo kaako muntu naakabisya lomwe, Leza wakaamba kuti asubulwe. Pele cipego caluse lwa Leza ncakuti Leza aambilizye bantu kuti mbalulami nikuba kuti zinyonyoono zyabo nzinji. ¹⁷ Nkaambo kakubisya kwamuntu omwe uulya, bantu boonse balafwa, nikuba boobo cipati ncakuti boonse batambula zileleko zya Leza acipego cabululami kwiindila muli Jesu Kilisito, bayooba aabuumi.

¹⁸ Lino mbuli kubisya kwamuntu omwe mbukwakaleta milandu kubantu boonse, mbubonya oobo kululama kwamuntu omwe kuletela bantu boonse kulekelelwa abuumi. ¹⁹ Alimwi mbuli kutaswiilila kwamuntu omwe mbukwakacitya kuti bantu boonse babe basizinyonyoono mbubonya oobo kuswiilila kwamuntu omwe kwacitya kuti bantu boonse baambwe kuti mbalulami.

²⁰ Lino Mulawo wakaletwa kuti bantu bazibe kabotu kuvula kwazinyonyoono zyabo. Pele zinyonyoono mbuli mbuzyakavula, alwalo luse lwa Leza lwakaindilila kuvula. ²¹ Mbuli bubi mbubwakaba aanguzu akuleta lufu ansi aano, mbubonya buyo luse lwakazunda kwiindila mubululami, akuleta buumi butamani kubantu boonse kwiindila muli Jesu Kilisito Mwami wesu.