Baloma 12

Zyabuumi bupya bwa Bukilisito

¹ Lino nobakwesu, nkaambo Leza watufwida luzyalo lupati boobu, ndamukumbila kuti mulipe amibili yanu yoonse kuti mube cipaizyo cuumi, cisalala, cibotelezya Leza. Eeyi njenzila iini-ini yakukomba Leza. ² Mutayanzani abukkale bwabantunsi, pele Leza asandule buumi bwanu mukumupa myoyo mipya. Ndendilyo nimutizibe luyando lwa Leza, nkabela mulaziba zibotu, zilondokede, azimubotelezya Leza.

³ Kwiindila munguzu zyandipa Leza muluse lwakwe, ndamwaambila kuti mutalitukumuni. Kwaambisya amulitesye mumizeezo yanu, kweendelana akukomena kwalusyomo oolo Leza ndwapa omwe-omwe wanu. ⁴ Mumubili omwe muli zizo zinji, nkabela zizo eezyo zilijisi milimo yaandeene-andeene. ⁵ Mbubonya oobo aswebo tobasyomi, nikuba kuti tuli banji, tuli mubili omwe muli Kilisito. Aboobo tuliswaangene umwi aumwi mbuli zizo zyamubili omwe. ⁶ Tuleelede kubelesya zipego zyaandee-andeene nzyapa Leza muluse lwakwe. Naa cipego cesu ncabukambausi, atucibelesye kweendelana alusyomo lwesu. ⁷ Naa ncabubelesi, atubeleke. Naa ncabwiiyi, atwiisye. ⁸ Naa ncakuyumya-yumya bamwi, atubayumye-yumye ncobeni. Ooyo uupa, ape amoyo omwe. Ooyo musololi, asololele cabusungu. Awalo ooyo uufwida bamwi luzyalo, acite oobo calumwemwe.

⁹ Luyando lwanu lutabi lwakuupaupa aameso. Amusesemwe bubi, mukakatile zibotu. ¹⁰ Amuyandane kapati mbuli babunyina. Musungwaale mukulemekana. ¹¹ Mukubelekela Mwami, amusungwaale, mutabi batolo pe. ¹² Amukondwe mubulangizi bwanu. Amukkazike moyo muciindi camapenzi akukomba lyoonse. ¹³ Amupe zyakugwasya Bakilisitonyoko babulide, alimwi amutambule beenzu amaanza obilo.

¹⁴ Amukombe Leza kuti aleleke aabo bamupenzya. Iiyi, amucite oobo, mutasinganyi. ¹⁵ Amukondwe abaabo bakondedwe, mulile abaabo balila. ¹⁶ Amumvwane lyoonse. Mutalisumpuli, pele muyandane abantu buyo. Mutayeeyi kuti muli basongo.

¹⁷ Muntu wamucita cibi, mutabweedezyi. Amucite zibotu kuti bantu boonse bazibone. ¹⁸ Naa kakukonzeka amukkale muluumuno abantu boonse. ¹⁹ Nobayandwa, mutabweedezyi muntu cibi, mumuleke buyo, nkaambo Leza uyoomusubula mubukali bwakwe. Kayi Malembe alati, “Amubaleke, ndime eensubula, njoobasubula, mbwaamba Mwami Leza.” ²⁰ Mbokuli boobo, amucite mbubonya mbuli Malembe mbwaaamba, “Naa kuti sinkondonyoko wafwa nzala, mupe cakulya. Naa wafwa nyota, mupe maanzi akunywa. Nkaambo wacita boobo, walo ulalemwa kumakosi.” ²¹ Mutazundwi abubi pe, pele amuzunde bubi akucita zibotu.