Baloma 10

¹ Nobakwesu, cintu nceyandisya amoyo wangu woonse alimwi ncekumbila Leza ncakuti bamusyobo wangu bafutuke. ² Ndizuminine kuti mbasungu kuli zya Leza, pele busungu bwabo tabulondokede. ³ Nkaambo tabazi nzila njaambila bantu kuti mbalulami, balasola kulijanina nzila yakulilulamika kuli Leza, tabalibombyi kunzila ya Leza pe. ⁴ Lino Kilisito ngamagolelo aa Mulawo kuti boonse basyoma baambwe kuti mbalulami.

Leza mbwayanda kufutula bantu boonse

⁵ Kwaamba zyabululami bujanwa mukubamba Mulawo, Mozesi wakalemba kuti, “Ooyo uucita zyaamba Mulawo uyooba aabuumi.” ⁶ Lino kwaamba zyabululami bujanwa mukusyoma Leza, wakalemba kuti, “Mutalibuzyi kuti, ‘Nguni uukonzya kuya kujulu?’” (Nkokuti, kuya kujulu kuyooleta Kilisito.) ⁷ “Alimwi mutalibuzyi kuti, ‘Nguni uukonzya kuya kucikkalilo cabafu?’” (Nkokuti, kuya kucikkalilo cabafu kuyooleta Kilisito.) ⁸ Ino waamba buti? Ulati, “Majwi aa Leza taali kule andinywe. Ali mumilomo amyoyo yanu.” (Nkokuti makani aaamba zyalusyomo ndotukambauka.) ⁹ Kuti kamwaamba amilomo yanu kuti Jesu ngo Mwami, alimwi kuti kamusyoma amyoyo yoonse kuti Leza wakamubusya kuzwa kubafu, muyoofutulwa. ¹⁰ Nkaambo muntu ulasyoma amoyo wakwe, eelyo Leza ulamwaamba kuti mululami, nkabela muntu ooyo ulazumina akwaamba zyalusyomo lwakwe, eelyo ulafutulwa. ¹¹ Malembe aamba kuti, “Taakwe naba omwe uusyoma mulinguwe uyoousigwa nsoni.” ¹² Nkaambo taakwe kwaandaana akati ka Bajuda abamasi. Boonse Mwami wabo ngumwi buyo, ulaleleka aabo boonse bamukumbila. ¹³ Mbubwaamba Malembe kuti, “Kufumbwa muntu uukumbila Mwami Leza kuti amugwasye, uyoofutulwa.”

¹⁴ Ino inga bamukumbila buti ngobatanasyoma? Alimwi balamusyoma buti kabatanamvwa zyakwe? Alimwi bazimvwe buti kakutakwe sikubakambaukila? ¹⁵ Alimwi inga bakambauka buti batatumwa? Mbubonya mbuli mbokulembedwe kuti, “Ncibotu kapati nibaboola aabo bakambauka Makani Mabotu.” ¹⁶ Pele takuli kuti boonse bakaazumina Makani aayo pe. Mbubuli bwakaamba musinsimi Izaya kuti, “O Mwami Leza, nguni uusyoma nzyotukambauka?” ¹⁷ Lino lusyomo lulaba mumuntu namvwa Mulumbe, awalo Mulumbe ulaletwa mukukambauka zya Kilisito.

¹⁸ Pele ndabuzya kuti, sena Baisilayeli tabanamvwa Mulumbe ooyu? Peepe, kwalo bakamvwa. Mbubwaamba Malembe kuti, “Majwi aabo akamvwigwa munyika yoonse. Makani aabo akasika kumagolelo aanyika.” ¹⁹ Pele lino alimwi ndabuzya kuti, sena Baisilayeli tiibakaziba Mulumbe ooyu? Mozesi nguuingula nati, Leza ulati,

“Ime nzoomucitya munyono kulibaabo

bamukowa uunyina ankuuya.

Njoomunyemya akaambo kabantu

mbomuti mbafuba-fuba.”

²⁰ Awalo, Izaya ulaambisisya ulati, Leza ulati,

“Ime ndakajanwa abantu

batakali kundiyandaula.

Ndakalibonya kuli baabo batakali

kubuzya-buzya zyandime.”

²¹ Pele zya Baisilayeli Leza waamba kuti, “Buzuba boonse ndatandabika maanza aangu kuti ntambule bantu basicinguni bazangi.”