Baloma 1
1 Ime ndime Paulu, mutwanga wa Jesu Kilisito, mutumwa mwiite, wakasalilwa kuti akaambilizye Makani Mabotu aa Leza. 2 Makani Leza ngaakasyomezya kwiindila mubasinsimi bakwe mbuli mbokulembedwe mu Malembe Aasalala. 3 Makani Mabotu ngaaamba zya Mwanaakwe, walunyungu lwa Devedi mubuntu bwakwe. 4 Pele Muuya Uusalala wakatondezya canguzu kuti ngonguwe Mwanaa Leza kwiindila mukumubusya kubafu. Ooyu ngu Jesu Kilisito Mwami wesu. 5 Mulinguwe Leza wakandipa cipego cakuba mutumwa wa Kilisito uuletela misyobo yoonse Makani Mabotu kuti bamusyome walo akumuswiilila. 6 Anywebo muli bamwi babaabo baitidwe a Leza kuti mube ba Jesu Kilisito. 7 Nyoonse nobayandwa ba Leza nomuli mu Loma ndamujuzya. Mwakaitwa kuti mube bantu bakwe. Leza Taata a Jesu Kilisito Mwami wesu amubede aaluse akumupa luumuno.
Paulu ulumba Leza nkaambo ka Baloma
8 Kusaanguna ndalumba Leza wangu muli Jesu Kilisito nkaambo kandinywe, akaambo kakuti munyika yoonse bantu baamba zyalusyomo lwanu. 9 Leza ngwemanina milimo amoyo wangu oonse mukukambauka Makani Mabotu aa Mwanaakwe, ngokamboni wangu kuti lyoonse ndamwiibaluka cakutaleka mukukomba kwangu koonse. 10 Ndalomba kuti naa Leza kayanda ambweni inga ndakonzya kusika kulindinywe. 11 Ndayandisisya kapati kumubona kutegwa nkamwaabile cimwi cipego camuuya kuti nkamuyumye-yumye. 12 Kapati ngambe kuti tukayumizyanye mulusyomo mebo ndikayumye ndinywe anywebo mukayumye ndime.
13 Nkaako nobakwesu, njanda kuti muzibe kuti kanji-kanji ndakali kuyeeya kuti mboole kulindinywe, pele kusikila ono ndakacilwa. Njanda kuti nkabeleke akati kanu kuti micelo imwi ikaboneke, mbubonya mbuli mbokubede akati kabamasi bamwi. 14 Ndijisi mulimo wakukambaukila bantu boonse, baiide mbuli Bagiliki nibaba bataiide, nibaba basongo, nibaba bafuba-fuba. 15 Nkaambo kaako ndayandisya kumukambaukila Makani Mabotu anywebo nomuli mu Loma.
Inguzu zya Makani Mabotu
16 Mebo nsyuusi nsoni a Makani Mabotu aa Kilisito, nkaambo ninguzu zya Leza zyakufutula baabo basyoma boonse, kusaanguna Bajuda, eelyo kuzwa waawo abamasi abalo. 17 Nkaambo Makani aaya ngaatuyubunwida Leza mbwatondezya bululami. Nzila eeyi njalusyomo kuzwa kumatalikilo kusikila kumamanino. Mbuli mbokulembedwe kuti, “Ooyo uululeme kwiindila mukusyoma uyooba aabuumi.”
Bantu boonse mbaasizibi
18 Lino bukali bwa Leza buzwa kujulu buzide ali basizibi boonse batalemeki Leza. Azibi zyabo balesya beenzinyina kuti batazibi bwini. 19 Nkaambo eezyo muntu nzyakonzya kuziba zya Leza balizizi kabotu-kabotu. Leza lwakwe mwini nguwakabayubunwida eezi. 20 Nkaambo kuzwa kumalengelo bantu balizi bube butaboneki bwa Leza, nkokuti nguzu zyakwe zitamani abuleza bwakwe. Bantu balaziba eezi nibabona eezyo Leza nzyaakalenga. Aboobo tabajisi cilitamizyo pe. 21 Ncobeni bakalimuzi Leza, nikuba boobo tiibakamulemeka akumulumbaizya, pele bakali kuyeeya buyo zyabuyo, nkabela mudima wakazula mumyoyo yabantu bafuba-fuba aabo. 22 Bakali kuti, “Tuli basongo,” anukuti mbafuba-fuba. 23 Bakaleka kulemeka Leza uutafwi, bakomba baleza bapange baboneka mbuli bantu bafwa, ambweni mbuli bayuni naa banyama naa zikalaba.
24 Ncencico eeco Leza ncaakabalekela kuti bacite zisusi zyamyoyo yabo akucitana zisaaza akusofwaazya mibili yabo. 25 Bakasiya zyabwini zya Leza akutobela zyabuyo. Balalemeka akubelekela zilenge mubusena bwakulemeka akubelekela Mulengi walo ngotweelede kulemeka lyoonse. Akube boobo.
26 Nkankakaako Leza ncaakabalekela kuti baccilile zisusi zyuusya nsoni. Abalo bakaintu babo bakasiya mulimo wabukaintu baccilila mulimo uusofwaazya. 27 Mbubonya oobo abaalumi babo bakaleka bukkale bwamuŋanda batalika kucita zitaambiki abaaluminyina. Bakacitana zijazya nsoni, eelyo mukucita boobo bakaliitila cisubulo eeco ceelede milimo yabo iisesemya.
28 Nkaambo bakakaka kutobela Leza, wakabasiya mumizeezo yabo mibi kuti bacite zintu zisofweede. 29 Myoyo yabo izwide bubi, mbuli bulyato, munyono, bbivwe, bujayi, bulwani, lweeno, alusulo. Balavwiya, 30 akubejelezya, akusula Leza. Mbaasikasampu-sampu, basikulisumpula, basikulilumbaizya, basikulenga bubi, batalemeki bazyali. 31 Batakwe manjezeezya, batasyomi, batakwe luzyalo, bateeteleli. 32 Balizi mulawo wa Leza uuti bantu bacita zili boobu baleelede kufwa. Nikuba boobo tabaciti buyo eezyo, pele balalumbaizya abamwi bazicita.