Bakolose 4
1 Nobasimalelo, amucitile bazike banu ciluleme ceelede, nkaambo mulizi kuti mulijisi Simalelo kujulu.
Malailile amwi
2 Amujatisye kukomba cakutaleka akulumba, mutatokwaali. 3 Alimwi amutukombele, kuti Leza atupe ciindi cibotu cakuti tukambauke majwi aakwe akwaambilizya maseseke aa Kilisito. Nkaambo kangawe ndaangidwe. 4 Amundikombele kuti mpandulule mbweelede.
5 Bweende bwanu akati kabakunze bube bwabusongo, alimwi amucenjele kuti mucibelesye kabotu ciindi canu. 6 Lyoonse majwi aanu abe aaluzyalo aayaka bamwi kuti muzibe mbomweelede kwiingula muntu.
Majwi aamamanino
7 Lino Tikikasi mukwesu uuyandika uzoomuzibya makani aangu oonse. Ngusimilimoma uusyomeka uubelekela Mwami. 8 Ncindamutumina ncakuti muzibe mbotubede, akuti azoomuyumye-yumye. 9 Ndamutuma a Onesimasi mweenzuma uusyomeka uuyandika uuli ngoumwi wanu. Bazoomwaambila zyoonse zili kuno.
10 Alisitakosi sintolongoma ulamujuzya alimwi a Maako mweenzinyina Banabasi. Zya Maako mwakatambula kale malailile aakuti naa wasika kulindinywe, mumutambule kabotu. 11 Ulamujuzya Josyuwa uutegwa Jasitasi. Aaba mba Bajuda balikke babelesima bandigwasya mumulimo wabwami bwa Leza, alimwi balandiyumya-yumya kapati. 12 Epafulasi umwi wanu, mubelesi wa Kilisito Jesu ulamujuzya. Lyoonse ulamuyeeya mukukomba kwakwe, kuti muzyandamane, mutabi bateteete mukucita zyoonse nzyayanda Leza. 13 Ndime kamboni uubwene kuti ulabeleka kapati akaambo kanu alimwi akaambo kabaabo bali ku Lawodisiya abaku Helapolisi. 14 Luka musilisi uuyandika a Dimasi balamujuzya.
15 Amundijuzizye bakwesu boonse bali ku Lawodisiya alimwi a Nimfa antoomwe ambungano iibungana muŋanda yakwe. 16 Lugwalo oolu lwamana kubalwa kulindinywe, lukabalwe akwalo kumbungano yaku Lawodisiya, nkabela anywebo mukalubale lugwalo ndundakatuma ku Lawodisiya. 17 Amwaambile Aakiposi kuti, “Bamba kabotu milimo yoonse yakupa Mwami kuti wiizuzikizye.”
18 Mebo nde Paulu, ndalemba lujuzyo oolu ajanza lyangu ndemwini. Kamuyeeya kuti ndaangidwe.
Leza amubede aaluse.