Bakolose 1
1 Ndime Paulu mutumwa wa Kilisito Jesu mukuyanda kwa Leza, tuli a Timoti mukwesu.
2 Ndamulembela nywebo nobasalali baku Kolose bakwesu basyomeka muli Kilisito. Leza Taata amubede aaluse akumupa luumuno.
3 Lyoonse tulamulumba Leza Wisi wa Mwami wesu Jesu Kilisito notumukombela. 4 Nkaambo tulimvwide zyalusyomo lwanu ndomujisi muli Kilisito Jesu, azyaluyando lwanu kubasalali boonse. 5 Mulacita oobo akaambo kalulangilo ndomujisi mulizeezyo Leza nzyamubambilide kujulu. Eezi mwakazimvwa ciindi majwi aalusinizyo, nkokuti Makani Mabotu naakamusikila kusaanguna. 6 Akamusikila mbubonya mbuli mbwaakasika munyika yoonse, akuzyala micelo mubantu, akukula. Kuzwa ciindi eeco mwazibisya cabwini zyaluse lwa Leza. 7 Mwakaiya eezi kuzwa kuli Epafulasi mubelesima uuyandika, walo uuli mutwanga uusyomeka wa Kilisito mubusena bwesu. 8 Ngonguwe wakatuzibya zyaluyando lwakamupa Muuya Uusalala.
9 Nkankakaako, kuzwa nitwakamvwa, tatuleki kumukombela pe. Tulamukumbilila kuti muzibye busongo bupa Muuya akuti muzibisisye nzyayanda. 10 Ndendilyo nomuyooenda mbuli buyanda Mwami, akumubotezya lyoonse. Mukucita milimo mibotu iiindene-indene, buumi bwanu buyootondezya micelo mibotu alimwi akukula mukuziba Leza wabwini. 11 Tulalomba kuti Leza amuyumye-yumye anguzu zyakwe mpati zilemekeka kuti muzuunyane muli zyoonse cakukkazika moyo akutangala. 12 Kamulumbaizya Taata, walo wakatucita kuti tube bantu beelede mubwami bwakwe bwamumuni. 13 Wakatugwisya kuzwa munguzu zyamudima akutunjizya mubwami bwa Mwanaakwe uuyandika. 14 Mulinguwe twakanununwa nkokuti twakalekelelwa zinyonyoono zyesu.
Zyabube amilimo ya Kilisito
15 Leza uutaboneki wakabonwa muli Kilisito. Ngo Mwanaa Leza, wiindilila zilenge zyoonse. 16 Mulinguwe Leza wakalenga zyoonse zyakujulu azyaansi, ziboneka azitaboneki, beendelezi, bapati, abasinguzu bamwi bamuuya. Leza wakalenga zyoonse mulinguwe alimwi wakazilengela nguwe. 17 Kilisito nguuindilila zintu zyoonse, alimwi mulinguwe zintu zyoonse zilijatene. 18 Ngomutwe wamubili, nkokuti mbungano. Ngomutaanzi, wakasaanguna kubuka kuzwa kubafu kuti muli zyoonse azwidilile. 19 Cakabotela Leza kuti buleza bwakwe boonse bukkale mulinguwe. 20 Muli Kilisito Leza wakayanzanya zintu zyoonse kulinguwe mwini, zyaansi alimwi azyakujulu. Wakaleta luumuno mulufu lwa Mwanaakwe aciingano.
21 Kwaamba ndinywe kaindi mwakali kulaale a Leza, alimwi tiimwakali kumuyanda mumyoyo yanu, nkaambo kamilimo yanu mibi. 22 Pele lino Leza wamuyanzanya mulufu lwa Mwanaakwe wakali amubili mbuli yesu. Wakacita oobo kuti amwiimike kumbele lyakwe mbuli basalala, banyina kampenda, balondokede. 23 Lino amukkazike myoyo, mutazungaani mulusyomo lwanu, mutasowi lulangilo lumupa Makani Mabotu ngomwakamvwa. Leza wakandipa, mebo nde Paulu, mulimo wakukambauka Makani Mabotu aaya aakambaukilwa bantu boonse munyika.
Paulu mbwaakabelekela mbungano
24 Lino ndakondwa kuti ndamupengela nkaambo mukupenga ooku ndilamanizya mumubili wangu mapenzi aasyaala aali mbuli aa Kilisito ngaakapengela mubili wakwe, nkokuti mbungano. 25 Eelyo mebo ndimubelesi wambungano eeyi, nkaambo Leza wakandipa mulimo wakucita akati kanu. Mulimo ooyo ngwakuti ndikambauke majwi aakwe oonse. 26 Majwi aayo mmaseseke aakasisidwe ciindi coonse kumazyalani oonse, lino Leza waayubununa kubantu bakwe. 27 Leza wakayanda kuti bamasi oonse bazibe maseseke mabotu kwiindilila aabuvubi bwabulemu bwakwe. Maseseke aayo ngu Kilisito uuli muli ndinywe, alimwi nguumupa lulangilo lwakutambula bulemu. 28 Kilisito ngonguwe ngotukambauka. Tulacenjezya bantu boonse, kubaiisya abusongo boonse mbotupedwe kuti basime muli Kilisito. 29 Amuzeezo ooyu ndabeleka kapati munguzu zya Kilisito zibeleka mulindime canguzu.