Bahibulu 7
Mupaizi Melikezedeki
1 Melikezedeki wakali mwami waku Salemu alimwi wakali mupaizi wa Leza Sijulu lyamajulu. Ciindi Abulahamu naakali kupiluka kuzwa kulumamba ndwaakaakuzunda bamami, Melikezedeki wakaswaangana anguwe akumuleleka. 2 Abulahamu wakapa Melikezedeki kwakkumi kwazintu nzyaakasaala zyoonse. Bupanduluzi bwazina lya Melikezedeki nkuti “Mwami wa Bululami.” Pele alimwi wakali Mwami wa Salemu, nkokwaamba kuti “Mwami wa Luumuno.” 3 Zyawisi abanyina nibaba bazyali babo taakwe uuzizi. Wakali mbuli uunyina matalikilo naaba mamanino aabuumi bwakwe. Uli mbuli Mwanaa Leza, mmupaizi lyoonse akutamani.
4 Lino mwabona kuti muntu ooyu Mmupati ncobeni! Abulahamu sikale wesu wakamupa kwakkumi kwazyoonse nzyaakasaala mulumamba. 5 Awalo Mulawo ulati Balevi bali mbapaizi kabapegwa kwakkumi kuzwa ku Baisilayeli. Bakali kutambula kuzwa kuli basicisinyina, nikuba kuti abalo mbalunyungu lwa Abulahamu. 6 Lino Melikezedeki taakwe naakali wamukowa wa Balevi pe, pele kuzwa kuli Abulahamu wakatambula kwakkumi eelyo wakaleleka Abulahamu ooyo wakatambula cisyomezyo ca Leza. 7 Aboobo kakunyina akudonaika, tulizi kuti ooyo uuleleka mmupati kwiinda ooyo uulelekwa. 8 Kwaamba zyabapaizi bakali kutambula kwakkumi baya, mbantu bafwa. Pele kwaamba zya Melikezedeki, Malembe amwaamba kuti muntu uupona. 9 Kapati tulakonzya kwaamba boobu kuti ciindi Abulahamu naakapa kwakkumi, Levi (uujisi mukowa uupegwa kwakkumi) awalo wakapa kwakkumi. 10 Nkaambo Levi taakanazyalwa, pele tulakonzya kwaamba kuti wakali mumubili wawisi Abulahamu, ciindi Melikezedeki naakaswaangana anguwe.
11 Lino milawo yakatambula Baisilayeli yakakkazikizidwe abupaizi bwa Balevi. Nicakali kukonzeka kulondoka mubupaizi oobu, nikwatakayandika bupaizi bumbi mbuli bwamusyobo wa Melikezedeki, bwiindene abobuya bwa Aloni. 12 Mbuli bupaizi mbubwacinca, awalo Mulawo mbubonya. 13 Nkaambo Mwami wesu waambwa waawa wakali wamusyobo uumbi waandeene. Alimwi kunyina naba omwe wamukowa ooyo wakabeleka mulimo wabupaizi kucipaililo pe. 14 Tulizi kuti Mwami wesu uzwa kumusyobo wa Juda, alimwi Mozesi taakagama mukowa ooyo naakali kwaamba zyabupaizi pe.
Mupaizi uuli mbuli Melikezedeki
15 Kucinca kwabupaizi kwalibonya antangalala, twabona kuti kwasika mupaizi uumbi uuli mbuli Melikezedeki. 16 Walo taakaba mupaizi kweendelana amulawo waamba zyabuzyalwe bwabupaizi pe. Pele wakaba mupaizi kwiindila munguzu zyabuumi bwakwe butamani. 17 Nkaambo Malembe alati,
“Unooli Mupaizi akutamani.
Bupaizi bwako mbwamusyobo wa Melikezedeki.”
18 Aboobo mulawo wakaindi wasiigwa nkaambo ucinyina nguzu alimwi tuugwasyi. 19 Kayi Mulawo taakwe niwakalondola muntu naba omwe pe. Pele mubusena bwawo tulaalulangilo lwiindilila, alimwi alulangilo oolu tulaswena aafwiifwi kuli Leza.
20 Cimbi cipati ncakuti Leza wakakonka. Bapaizi bamwi bakali kwiide kuba bapaizi kakunyina cikonke. 21 Pele Jesu wakaba Mupaizi kwiindila mucikonke, Leza naakati kulinguwe,
“Mwami Leza wakakonkezya,
alimwi takonzyi kucinca muzeezo wakwe wakuti,
‘Unooli mupaizi akutamani.’”
22 Aboobo Jesu nguutusinizizya cizuminano ciinda kubota.
23 Mpokuli akwaandaana kumbi. Aabo bapaizi bamwi bakali banji, nkaambo bakali kufwa. Aboobo cakali kubakacila kutola aambele mulimo wabo. 24 Pele Jesu nkwali lyoonse, nkabela mulimo wakwe wabupaizi tuumani pe. 25 Nkaambo kaako walo ulakonzya kubafutwida limwi aabo baswena aafwiifwi kuli Leza kwiindila mulinguwe, nkaambo ulapona lyoonse kuti abakombelezezye.
26 Cakayandika kuti tube a Mupaizi Mupati uuli boobu uusalala, uutakwe butongo naa kampenda, uuzandwidwe kuzwa kuli basizibi, alimwi uusumpwidwe kwiinda zyoonse zyakujulu. 27 Nkabela tali mbuli bapaizi bapati bamwi pe. Teelede kutuula zipaizyo mazuba oonse akaambo kazinyonyoono zyakwe, amana azinyonyoono zyabantu. Nkaambo wakacita oobo naakalyaaba kuba cipaizyo lomwe ciindi naakalituula lwakwe mwini. 28 Mulawo wakabikka bantu bateteete kuti babe bapaizi bapati. Pele majwi Leza ngaakakonkezya musule aamilawo eeyo akabikka Mwanaakwe uulondokede, kuti abe Mupaizi Mupati akutamani.