Bahibulu 6
1 Atuye kumbele mukwaamba makani aaelede basimide. Tutali kwiide kupilukila kwaamba zyantalisyo yakweempa akusiya milimo yabuyo kuti ambweni iinga tulasyoma cabuyo muli Leza, 2 munjiisyo zyakusalazya, zyakubikka maanza, zyakubuka kwabafu, azyalubeta lutamani. 3 Atuye kumbele! Eelyo, eeci ncotuticite kuti naa Leza wazumina.
4 Pele tacikonzeki kuboozya aabo bakasowa lusyomo kuti beempe. Leza wakalibamunikilide kale, nkabela bakalabila cipego cizwa kujulu, abalo bakatambula Muuya Uusalala. 5 Bakalabila kale bubotu bwa Majwi aa Leza, alimwi bakazimvwa kale nguzu zyaciindi ciciza. 6 Bafutatila Leza, eelyo mukucita boobo bacita mbuli kuti bakankamina Mwanaa Leza aciingano akumusampaula antangalala.
7 Lino Leza ulaleleka muunda uutambula mvula kanji-kanji akuzyalila balimi micelo mibotu. 8 Pele kuti muunda ooyo kuuzyala mamvwa azincenya ngwabuyo. Uli aafwiifwi kusinganyizigwa a Leza, eelyo ulanyonyoonwa amulilo.
9 Kwalo notwaamba bobuya, nobayandwa, tatudonaiki andinywe. Tulizi kuti mulaazileleko zimutola kulufutuko. 10 Nkaambo Leza mmululami. Takonzyi kuluba milimo njomwakacita, aluyando ndomwakatondezya nkaambo kazina lyakwe, ambomwakabelekela Bakilisito asunu mucibabelekela. 11 Kuyanda kwesu kupati nkwakuti umwi aumwi wanu ataleki kutondezya busungu oobu mane kumamanino, kuti zikacitike nzyomulangila. 12 Tatuyandi kuti mutokwaale, pele mube mbuli baabo bayookona Leza nzyaakasyomezya kwiindila mukusyoma akukkazika moyo kwabo.
Cisyomezyo camasimpe ca Leza
13 Lino Leza naakapa cisyomezyo kuli Abulahamu, wakakonkezya muli lwakwe mwini. Wakacita oobo nkaambo taakwe uumbi mupati kwiinda nguwe ngwaakali kukonzya kubanda mucikonke cakwe. 14 Eelyo wakati, “Ndasyomezya kuti njookuleleka alimwi njoovuzya lunyungu lwako.” 15 Lino Abulahamu wakalindila cakukkazika moyo, aboobo wakatambula eezyo Leza nzyaakasyomezya. 16 Bantu balakonka muzina lyamuntu uubainda, eelyo cikonke calusinizyo cili boobo cimana kukazyanya koonse. 17 Lino Leza wakali kuyanda kusinizya kuli baabo bayookona eezyo nzyaakasyomezya kuti taakwe nayoocinca cisyomezyo cakwe pe. Ncenciceeco wakasinizya mucisyomezyo cakwe naakakonka.
18 Lino kuli zintu zyobilo, zitakonzyi kucinca, eezi ncisyomezyo acikonke, alimwi Leza takonzyi kubeja ali nzizyo. Aboobo Leza wakali kuyanda kuyumya-yumya ndiswe, swebo nitwakatijila kulinguwe, mukuti tukakatile kululangilo ndwaakatupa. 19 Lulangilo oolu tulilujisi cakutazungaana mbuli musemu wabuumi bwesu. Lutusisya kujulu kuŋanda ya Leza kwiinda mucisitilizyo akunjila kubusena busalalisya mukati mwini. 20 Nkaambo kandiswe Jesu wakasaanguna kuunka ooko, waakuba Mupaizi Mupati walyoonse, mbuli bwamusyobo wa Melikezedeki.