Bahibulu 2

Zyalufutuko lupati

¹ Nkakaambo aako ncotweelede kuswiililisya kapati kuli zeezyo nzyotwakamvwa, kuti ambweni inga twasweeka. ² Majwi aayo Leza ngakaamba kwiindila mubangelo akalisinizizye. Aboobo uuli woonse watakaaswiilila wakaliletela cisubulo ceelede. ³ Ino swebo tuyooyokoka buti kuti katutaswiilili zyalufutuko lupati luli boobu? Mwami, mwini nguwakasaanguna kwaamba zyalufutuko oolu, eelyo aabo bakamvwa bakatwaambilisya kuti ngakasimpe. ⁴ Awalo Leza wakali kuyumya bumboni bwabo kwiindila mukucita zitondezyo zyanguzu, zigambya amaleele aamisyobo-misyobo. Alimwi wakabapa zipego zya Muuya Uusalala mbuli mukuyanda kwakwe.

Zyayooyo wakaleta lufutuko

⁵ Lino takuli kubangelo Leza nkwaakapa bulelo bwanyika iiza njotwaamba. ⁶ Pele umwi wakaambisya mu Malembe kuti,

“Ino muntu ncinzi kuti komuyeeya,

muntunsi nguni kuti komukwabilila?

⁷ Nikuba kuti kwakaindi kasyoonto wakamucesya kwiinda bangelo bako,

pele lino wamupa bulemu abwami

⁸ bwakulela zintu zyoonse.”

Lino kwaamba kuti Leza wapa muntu bulelo bwazyoonse caamba kuti kunyina citali mubulelo oobo. Pele kusikila sunu tatuboni muntu keendelezya zintu zyoonse pe. ⁹ Ngotubona buyo ngu Jesu, walo kwakaindi kaniini wakacesegwa kwiinda bangelo, watambula musini wabulemu nkaambo kalufu ndwaakapenga. Zyakaba boobo nkaambo muluse lwakwe Leza wakayanda kuti Jesu afwide bantu boonse. ¹⁰ Kwakaleelede kuli Leza, wakalenga akukwabilila zintu zyoonse, kuti abikke Jesu kuti alete bana bakwe banji kuzooba aanguwe mubulemu. Wakacita oobo kutondezya kuti Jesu ngo Musololi uulondokede nkaambo kakupenga kwakwe. ¹¹ Ooyo uusalazya bantu kuzwa ku zinyonyoono, abaabo basalazigwa kuzinyonyoono, bajisi Wisi omwe boonse. Nkakaambo aako Jesu ncatausi nsoni kubaita kuti bana bokwesu. ¹² Mbokuli wakati kuli Leza,

“Ndiyoobaambila bana bokwesu makani aanduwe.

Njookutembaula akati kambungano yabo.”

¹³ Alimwi wakati, “Njoosyoma Leza.” Alimwi wakati,

“Ndili waano abantu aabo Leza mbaakandipa.”

¹⁴ Lino mbokuli kuti bana aabo mbantu banyama abulowa, Jesu lwakwe wakaba muntu mbuli mbabo. Wakacita oobo kuti kwiindila mulufu lwakwe akamunyonyoone ooyo uujisi nguzu zyalufu, uuli ngu Saatani. ¹⁵ Aboobo wakabaangununa aabo boonse bakali bazike mubuumi bwabo nkaambo kakuyoowa lufu. ¹⁶ Nkaambo kaako moyo wakwe tuuli kubangelo pe. Pele mbubuli bwaamba Malembe kuti, “Moyo wakwe uli kulunyungu lwa Abulahamu.” ¹⁷ Eeci caamba kuti wakaba mbuli babunyina munzila zyoonse, mukuti abe Mupaizi Mupati uusyomeka silweengelelo mukumanina Leza milimo kutegwa zinyonyoono zyabantu zilekelelwe. ¹⁸ Aboobo lino ulakonzya kugwasya aabo basunkwa, nkaambo walo lwakwe wakasunkwa akupenga.