Bahibulu 11
Zyalusyomo
1 Lino kusyoma nkutadonaika azintu nzyotulangila akusinizya kuti zintu nzyotutaboni nkozili ncobeni. 2 Nkaambo kalusyomo oolu basikale bakamubotezya Leza. 3 Alusyomo tulaziba kuti nyika yakalengwa amajwi aa Leza. Aboobo zintu eezi nzyotubona, zyakalengwa kuzintu nzyotutakonzyi kubona.
4 Alusyomo Abela wakapa kuli Leza cipaizyo citambulika kwiinda ca Kaini. Abela wakazuminwa kuti mmululami nkaambo Leza mwini wakaba kamboni mukutambula zipo zyakwe. Akaambo kalusyomo lwakwe Abela ucaambaula asunu, nikuba kuti ulifwide.
5 Alusyomo Enoki wakatolwa kujulu, taakafwa pe. Kwiina muntu wakamujana, nkaambo Leza wakamutola kujulu. Malembe atwaambila kuti Enoki katanatolwa kujulu, wakali kubotezya Leza. 6 Taakwe muntu uukonzya kubotezya Leza katakwe lusyomo. Nkaambo kufumbwa uuswena kuli Leza uleelede kuzumina kuti Leza mpali, alimwi akuti ulapa bulumbu kuli baabo bamuyandaula.
7 Alusyomo Nowa wakaswiilila kucenjezya kwa Leza kwaamba zintu zyakacili kuyooza nzyaatakali kukonzya kubona. Wakayaka bbwato kuti walo amukwasyi wakwe bafutulwe. Mukucita boobo Nowa wakazula baansi alimwi wakatambula bululami Leza mbwapa baabo bamusyoma.
8 Alusyomo Abulahamu wakaswiilila ciindi Leza naakamwiita kuti aye kucisi cimbi eeco ncaakamusyomezya kuti uyoomupa. Wakasiya cisi cakwe katezi kuti uya kuli. 9 Alusyomo wakaakukkala mucisi Leza ncaakamusyomezya mbuli mweenzu. Izaka a Jakobo bakatambula cisyomezyo ca Leza eeco, bakali kukkala mumatente mbuli Abulahamu. 10 Nkaambo Abulahamu wakali kulangila munzi uumbi uulaantalisyo njumu, wakayeeyegwa akuyakwa a Leza.
11 Alusyomo awalo Sala wakakonzya kujana mwana kali mucembele kale. Wakasyoma Leza kuti uyoobamba cisyomezyo cakwe. 12 Aboobo kumuntu omwe wakamanide kale, kuli Abulahamu kwakazwa mazyalani aabantu banji batabaliki mbuli nyenyezi zyakujulu amusenga wakunkomwe yalwizi.
13 Boonse bantu aaba bakali kusyomeka kusikila bafwa. Tiibakatambula zintu Leza nzyaakabasyomezya, pele bakazibonena buyo alaale akuzitangalila. Bakalizi kuti ansi aano bakali buyo beenzu batakkalilili. 14 Mbubakaamba boobo bakacisalazya kuti balangila cisi cabo cibagaminine. 15 Tabayeeyi kupiluka kucisi ncibakasiya pe. Kuti nibali kuyeeya, nibali kunga bajana ciindi cakupiluka. 16 Peepe, twabona kuti balangila cisi cimbi cibotu kwiindilila, eeci ncisi cakujulu. Nkaako Leza tausi nsoni kwaambwa kuti ngu Leza wabo, nkaambo nguwakabayakila munzi.
17 Alusyomo Abulahamu wakatituule Izaka mbuli cipaizyo ciindi Leza naakamusunka. Nikuba kuti wakali yooyo Leza ngwaakapede cisyomezyo, pele wakalilibambilide kale kumutuuzya mbuli cipaizyo mwanaakwe alikke buyo. 18 Zyamwana ooyo Leza wakaambide kuti, “Muli Izaka moyoojana lunyungu.” 19 Abulahamu wakali kusyoma kuti Leza ulakonzya kubusya mufu. Aboobo tulakonzya kweezya kuti wakatambula Izaka mbuli wabusigwa kubafu.
20 Alusyomo Izaka wakaleleka Jakobo a Isau akubasyomezya kuti bayootambula zileleko zibotu kumbele.
21 Alusyomo Jakobo naakali aafwiifwi kufwa, wakaleleka bana boonse bobilo ba Josefa, mpawo wakasiminina amusako wakwe, walumba Leza.
22 Alusyomo Josefa, naakali aafwiifwi kufwa, wakaamba kuti caakuba ciindi Baisilayeli bayoolonga mu Ijipiti. Wakabalailila mbobakeelede kuyoocita amafuwa aakwe.
23 Alusyomo bazyali ba Mozesi naakazyalwa bakamusisa kwamyezi yotatwe, nkaambo bakabona kuti mwana mubotu. Tiibakayoowa mulawo wamuleli pe.
24 Alusyomo Mozesi wakakaka kwiitwa kuti muzyukulu wa Falo. 25 Wakayanda kupenzegwa antoomwe abantu ba Leza kubaazya kutangala akukkomana muzibi kwakaindi kasyoonto. 26 Wakayeeya kuti kusampaulwa akaambo ka Munanike wa Leza nkubotu kwiinda buvubi bwa Ijipiti. Kayi wakali kulangila bulumbu bwakacili kuyooboola kumbele.
27 Alusyomo Mozesi wakazwa mu Ijipiti, taakwe naakayoowa bukali bwamuleli wamumo pe. Taakapiluka nkaambo mbuli kuti wakabona yooyo uutaboneki. 28 Alusyomo wakabamba Pobwe lya Kwiindilila, alimwi wakalailila kuti bantu basansaile bulowa azicinda kuti mungelo uunyonyoona bana bataanzi atagumi bana ba Baisilayeli.
29 Alusyomo Baisilayeli bakazubuka Lwizi Lusalala anyika njumu nta. Baijipiti nibakasoleka kuzubuka, maanzi akabavuppa baloba myoo!
30 Alusyomo bwaanda bwamunzi wa Jeliko bwakakolomokela ansi, nibakamana kubuzinguluka Baisilayeli kwamazuba aali ciloba. 31 Alusyomo Lahabu mwaamu taakajailwa aamwi abaabo batakaswiilila Leza, mukuti wakabatambula kabotu basikutwela.
32 Sena nkencaamba kuya kumbele? Nsicijisi ciindi cakwaamba zya Gidiyoni, Balaki, Samusoni, Jefuta, Devedi, Samuyele, alimwi abasinsimi. 33 Aaba bantu alusyomo lwabo bakazunda masi, bakaleta bululami munyika, eelyo bakatambula eeco Leza ncaakabasyomezya. Bakamuma milomo yabasyuumbwa. 34 Bakazima bukali bwabbibi lyamulilo, bakayokoka kuzwa kundomo zyamapanga. Bakali bateteete, pele bakatambula nguzu. Bakaba basinguzu mulumamba, makamu aabasilumamba aakazwa kule bakaatanda.
35 Alusyomo bakaintu bakafwidwa bakatambula bantu babo kabali baumi. Lino bamwi basyomi bakali kutundululwa akubikkwa muntolongo kusikila kulufu nkaambo bakakaka kwaangununwa. Balo balaalulangilo lwakubusigwa akunjila buumi bubotu kwiindilila. 36 Bamwi bakaweelwa akukwabbaulwa. Bamwi bakali kwaangwa nketani akubikkwa muntolongo. 37 Bamwi bakali kujaigwa akuumwa mabwe, bamwi bakali kukosolwa muzipaanzi zyobilo, bamwi bakajazigwa mapanga. Bamwi bakali kusama zisalu zyambelele azyampongo, bakali bacete, bakali kupenzegwa akugutaikwa. 38 Munyika tiimwakabeelede, bakali kuya bupobaila buyo munkanda amuzilundu. Bakali kukkala mumampangala amumalindi. 39 Lino bantu aaba boonse tulabayeeya nkaambo kalusyomo lwabo. Nikuba boobo tiibakabona eeco Leza ncaakazyomezezye pe. 40 Nkaambo Leza wakali tubambilide swebo cintu cibotu kwiinda, kuti batalondolwi balikke katutako swebo.