Bagalatiya 5
Amujatisye lwaangunuko lwa Bukilisito
1 Kilisito wakatwaangununa kuti twaangunuke ncobeni. Aboobo amwiime, mutanjili alimwi mujoko lyabuzike.
2 Lino mebo lwangu nde Paulu, ndamwaambila kuti naa mwazumina kuti mupalulwe mukutobela mbabo, milimo ya Kilisito tiili yampindu kulindinywe pe. 3 Ndamwaambila alimwi kuti kufumbwa uutobela mulawo wakupalulwa uleelede kubamba Mulawo woonse mbuubede. 4 Nywebo nomuyanda kululamikwa amulawo, mwalikosola nobeni kuzwa kuli Kilisito, alimwi mwasiya luse lwa Leza. 5 Nkaambo, Leza kwiindila mu Muuya Uusalala wakatupa lusyomo, tulindilila bululami mbotulangila kapati bwakujulu. 6 Nkaambo notuli muli Kilisito Jesu, kupalulwa nikuba kutapalulwa takujisi mulimo, pele cipati ncakuti muntu abe aalusyomo lubeleka muluyando.
7 Mwakali kucita kabotu, ino kayi nguni wakamulesya kuti mutaswiilili zyabwini? 8 Takonzyi kuba Leza wakamwiita pe. 9 Tumena tuniini tulafufumusya mulwi oonse. 10 Mukuti tuli omwe mu Mwami, ndasyoma kuti tamutaandaane andime mumizeezo. Pele ooyo uumunyonganya naa nguni, Leza uyoomusubula kapati.
11 Pele kuti naa ncamasimpe kuti mebo nkambauka zyakuti bantu bapalulwe, ino nkaambo nzi ncecipenzegwa? Nicali cakasimpe, caamba kuti nindagwisya cilebyo cakukambauka zyalufu lwa Kilisito aciingano. 12 Nicali cibotu kuti aabo bamunyonganya balizibe beni.
13 Nywebo nobakwesu, Leza wakamwiita kuti mwaangunuke. Aboobo amucenjele kuti mutabelesyi lwaangunuko oolu mukutobela zisusi zyanu. Pele amubelekelane muluyando. 14 Nkaambo Milawo yoonse ili mumulawo ooyu uuti, “Yanda mweenzinyoko mbubonya mbuli mboliyanda omwini.”
15 Pele kuti naa mulapenzyanya mbuli banyama, amucenjele kuti mutanyonyoonani.
Zyamilimo yabuntunsi amicelo ya Muuya Uusalala
16 Ndamwaambila kuti muleke Muuya Uusalala umusolwede ndendilyo nimutakwe kutobela zisusi zyabuntunsi. 17 Nkaambo zisusi ziyanda kukazya eezyo ziyanda Muuya, eelyo ziyanda Muuya zikazya eezyo ziyanda zisusi zyanu. Zintu eezi zilalwana cakuti tamukonzyi kucita zibotu nzyomuyanda kucita. 18 Pele naa Muuya Uusalala wamusolweda, tamuceendelezegwi a Mulawo.
19 Lino milimo yabuntunsi njeeyi, bwaamu, busofwaazi, kutalilesya, 20 kukomba baleza bapange, bulozi, kutamvwana, kukazyanya, munyono, kunyema, kuliyanda, kupampana, kwaandaanya, 21 bbivwe, bukolwi, budakwa azimwi zili boobo. Ndamucenjezya mbubonya mbuli mbundakamucenjezezye kale, kuti aabo bacita zili boobo tabakanjili mubwami bwa Leza pe.
22 Pele micelo ya Muuya Uusalala njeeyi, kuyandana, kutangala, luumuno, busicamba, luzyalo, bubotu, kusyomeka, 23 kulibombya akulilesya. Taakwe mulawo uulesya zintu eezi pe. 24 Lino aabo bakwe Kilisito Jesu, bakakankamina aciingano zisusi zyabo antoomwe azyoonse nzyoziyanda.
25 Kuti naa Muuya Uusalala wakatupa buumi, nguwenya uube nguutusolweda munzila zyesu zyoonse. 26 Tutali kulisumpuli, nikuba kukalazyanya, tuleke kuba aabbivwe kuli umwi aumwi.